ޔޫތް މިނިސްޓްރީން އެކުލަވާލާފައިވާ ފެކްޓް ފައިންޑިން ކޮމިޓީގެ މަގްސަދާމެދު ސުވާލު އުފެދޭ ކަމަށް ރާއްޖޭގެ އެންމެ ކާމިޔާބު އެއް ކްލަބް މާޒިޔާ ސްޕޯޓްސް އެންޑް ރެކްރިއޭޝަނުން ސުވާލު އުފައްދައިފިއެވެ.
މި މަހުގެ 10 ވަނަ ދުވަހު ސޯޝަލް މީޑިއާގައި ޔޫތު މިނިސްޓަރު އަހުމަދު މަހުލޫފް ކުރެއްވި ޓުވީޓްގައި ވަނީ އޭއެފްސީ ކަޕްގައި ދިވެހި ކްލަބްތަކަށް ބައިވެރިނުވެވުނު ސަބަބު ހޯދައި އިސްލާހު ކުރަންޖެހޭ ކަންކަން ބެލުމަށް ފެކްޓް ފައިންޑިން ކޮމެޓީއެއް އެކުލަވާލާފައިވާ ކަމަށެވެ. ނަމަވެސް ބުދަ ދުވަހު މަހުލޫފް ކުރެއްވި ޓްވީޓްގައި ވިދާޅުވީ، ކޮމެޓީން ބަލާނީ ދައުލަތުން ފުޓުބޯޅަ އަށް ހަރަދުކުރި ފައިސާއަށް ވީގޮތް ކަމަށެވެ.
އެގޮތުން މާޒިޔާ އިން ހުކުރު ދުވަހު ކުރި ޓުވީޓެއްގައި ބުނީ، ޔޫތް މިނިސްޓްރީން އެކުލަވާލާފައިވާ ކޮމިޓީގެ މަގްސަދު އޮޅިފައިވާ ކަމަށާއި، ކޮމިޓީގެ މަގްސަދާމެދު ކަންބޮޑުވާ ކަމަށެވެ.
What is the real purpose of the fact finding committee? Mandate of the committee has changed overnight. Concerned about the purpose of this committee. Issues of FAM should be tackled according to FIFA/AFC statues, not as the Youth Minister pleases. @AhmedMahloof @bassam_jaleeI
— MAZIYA SPORTS (@MaziyaSr) December 20, 2018
މިކަމާ ގުޅިގެން އެފްއޭއެމުން ބުނީ ޒިންމާދާރުކަން ކުޑަގޮތަށް އެކިފަހަރު އެކިގޮތަށް ސޯޝަލް މީޑިއާގައި މިނިސްޓަރު މަހުލޫފް ހާމަކުރާ މައުލޫމާތުގެ ސަބަބުން ކްލަބްތަކާއި، އެސޯސިއޭޝަންގެ ހައިބަތައް އުނިކަން އަންނަމުންދާ ކަމަށެވެ.
ޔޫތު މިނިސްޓްރީން އެކުލަވާލި ކޮމިޓީއާ ގުޅިގެން އޭއެފްސީގައި އެފްއޭއެމުން ލަފައަކަށް އެދުމުން އޭއެފްސީން ވަނީ އެފްއޭއެމްގެ އެއްވެސް ކަމެއްގެ ތެރެއަށް ތިން ވަނަ ފަރާތަކަށް ނުވަދޭނެ ކަމަށާއި، ހާލަތު ވަރަށް ގާތުން ބަލަމުން އަންނަ ކަމަށް ބުނެފައެވެ.
އެހެންނަމަވެސް މިނިސްޓަރު މަހުލޫފް ބުދަ ދުވަހު ކުރެއްވި ޓުވީޓްގައި ވިދާޅުވީ، އެފްއޭއެމްގެ ތެރެއަށް މިނިސްޓްރީން ނުވަންނަ ކަމަށާއި، އެކަން އެފްއޭއެމްގެ ރައީސް ބައްސާމް އަދީލް ޖަލީލްއަށް ވެސް ދަންނަވާފައިވާނެ ކަމަށެވެ. އަދި އޭއެފްސީ އާއި ފީފާއިން ރާއްޖެއަށް ފިޔަވަޅެއް ނާޅާނެ ކަމަށްވެސް މިނިސްޓަރު މަހުލޫފް ކުރެއްވި ޓުވީޓްގައި ވަނީ ވިދާޅުވެފައެވެ.
