މޯލްޑިވްސް އެއާޕޯޓްސް ކޮމްޕެނީ ލިމިޓެޑްގައި ދިގު މުއްދަތަކަށް ޚިދުމަތްކުރި މުވައްޒަފުންނާއި، ކުންފުނީގެ ވަޒީފާއިން މުސްކުޅިކުރި މުވައްޒަފުންގެ އަގު ވަޒަންކޮށްފިއެވެ.
އަންގާރަ ދުވަހުގެ ރޭ ދަރުބާރުގޭގައި ބޭއްވި ހަފްލާގައި 143 މުވައްޒަފަކު ދިގުމުއްދަތަކަށް ޚިދުމަތްކުރައްވާފައިވާތީ ވަނީ ޙާއްސަ އެވޯޑް ދެއްވައިފައެވެ. ހާއްސަ އެވޯޑް ލިބިފައިވަނީ ކުންފުންޏަށް 20 އަހަރު ޚިދުމަތް ކުރި 86 މުވައްޒަފަކާއި، 25 އަހަރު ޚިދުމަތްކުރި 39 މުވައްޒަފަކާއި، 30 އަހަރު ޚިދުމަތްކުރި 9 މުވައްޒަފަކާއި، 35 އަހަރު ޚިދުމަތްކުރި 9 މުވައްޒަފަކަށެވެ. އޭގެއިތުރުން 20 މުވައްޒަފަކު ކުންފުނީގެ ޚިދުމަތުން ރިޓަޔަރކޮށްފައިވާތީ އެބޭފުޅުންގެ އަގުވަޒަންކޮށް ވަނީ އެވޯޑްދީފަ އެވެ.
އެމްއޭސީއެލްގެ އެކްޓިންގ މެނޭޖިން ޑައިރެކްޓަރ މޫސާ ޞާލިޙް ވިދާޅުވީ ކުންފުނީގެ އެންމެ މުހިންމު ރައުސްމާލަކީ ކުންފުނީގެ މުވައްޒަފުން ކަމަށާއި މުވައްޒަފުންގެ ކުރިއެރުމަށާއި ލާބަޔާއި މަންފާއަށް ގިނަ މަސަކަތްތަކެއް ކުރެވޭކަމަށެވެ. ޒުވާން މުވައްޒަފުންނަށް މަސައްކަތުގެ ދާއިރާ ތަރައްޤީ ކުރެވޭނީ އެތަނެއްގައި ތިބޭ ގިނަ ދުވަސްވީ މުވައްޒަފުންގެ ތަޖުރިބާ އާއި އެހީތެރިކަން ލިބިގެން ކަމަށް އޭނާ ވިދާޅުވި އެވެ.
