ދުނިޔޭގެ ރީތިގެ ރާނީ ހޯދުމަށް ބާއްވަމުން އަންނަ "މިސް ވޯލްޑް" މުބާރާތުގައި މި އަހަރުގެ މިސް ވޯލްޑަކަށް މެކްސިކޯގެ މޮޑެލް އަދި ވޮލެންޓިއަރު ވެނެއްސާ ޕޮންސް ޑެލިއޯން ހޯދައިފިއެވެ.
ހޮނިހިރު ދުވަހު ޗައިނާގެ ސަންޔާގައި މިސް ވޯލްޑް ހޯދުމަށް ބޭއްވި ހަފްލާގައި ވެނެއްސާ އެ މަގާމު ހޯދާފައިވަނީ ދުނިޔޭގެ އެކި ކަންކޮޅުތަކުން 117 ބައިވެރިންނާއި ވާދަކޮށެވެ.
މޮޑެލް ކުރުމުގެ އިތުރުން ވޮލެންޓިއަރެއްގެ ގޮތުގައި ހަރަތާތްތެރިވާ އުމުރުން 26 އަހަރުގެ ވެނެއްސާ 68 ވަނަ މިސްވޯލްޑްގެ ތާޖް އަޅުވައިދިނީ 2017 ވަނަ އަހަރުގެ މިސްވޯލްޑް ހޯދާފައިވާ އިންޑިއާގެ މަނޫޝީ ޗިއްލާއެވެ.
ވެނެއްސާ މިސް ވޯލްޑްގެ އެއްވަނަ ހޯދާފައިވާއިރު އޭނާ ވެގެން ގޮސްފައިވަނީ މެކްސިކޯއަށް މިސް ވޯލްޑް ހޯދައިދިން ފުރަތަމަ ފަރާތަށެވެ. ވެނެއްސާއާއި ވާދަކޮށް މިސްވޯލްޑް 2018 ގެ ދެވަނަ ހޯދާފައިވަނީ ތައިލޭންޑް ތަމްސީލުކުރި އުމުރުން 20 އަހަރުގެ ނިކޮލެން ޕިޗަޕަ ލިމްސް ނުކަންއެވެ.
ނިކޮލެން އަކީ ބިޒްނަސް އެޑްމިނިސްޓްރޭޝަންގެ ދާއިރާއިން ކިޔަވަމުންދާ ދަރިވަރެކެވެ. މި ފަހަރުގެ ގަދަ ފަހެއްގެ ތެރޭގައި ހިމެނިފައިވަނީ މިސް ބެލަރޫސް މާރިޔާ ވަސިލެވިޗް، މިސް ޖެމެއިކާ ހަދީޖާ ރޮބިންސަންގެ އިތުރުން މިސް އުގާންޑާ ކުއެން އަބެނަކޮޔޯއެވެ.
ހިނިތުންވުމާއި އެކު އޭނާ ވެފައި ހުރި އުފާ ފާޅުކުރަމުން ވެނެއްސާ ބުނީ މިސް ވޯލްޑް ލިބުން ގަބޫލުކުރަން ދަތިކަމަށެވެ.
މެކްސިކޯގެ ގުއާނާ ހުއާޓޯއި ޔުނިވާސިޓީއިން އިންޓަނޭޝަނަލް ބިސްނަސްއިން ޑިގްރީ ހާސިލް ކުރުމަށްފަހު ވެނެއްސާ ދަނީ އިންސާނީ އެހީތެރިކަން ފޯރުވައިދޭ ޖަމާއަތްތަކުގައި ވޮލެންޓިއަރެއްގެ ގޮތުގައި ހަރަކާތްތެރިވަމުންނެވެ.
