އަންނަ ރިޔާސީ އިންތިހާބުގައި ވާދަކުރެއްވުމާ މެދު އުންމީދު ކަނޑުއްވާނުލައްވާ ކަަމަށާއި ރައީސް ޔާމީން ބަލިކުރައްވާނޭ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ސްރީލަންކާގެ ވެރިރަށް ކޮލަމްބޯގައި ބުރާސްފަތި ދުވަހު ނޫސްވެރިންނާއި ބައްދަލުކުރައްވައި ރައީސް ނަޝީދު ވިދާޅުވީ ވޭތުވެދިޔަ ދެ އިންތިހާބުގައި ވެސް ބައިވެރިވެވޭނެ ކަން ކަށަވަރުވެފައިވަނީ އެންމެ ފަހު ވަގުތުގައި ކަމަށެވެ. އަދި، އަންނަ އިންތިހާބުގައި އެކަން ހަމަ އެގޮތަށް ތަކުރާރުވުން އެކަށީގެންވާ ކަމަށްވެސް ވިދާޅުވި އެވެ.
"ރައީސް ޔާމީންއަށް ކެރިވަޑައިގަންނަވަންޔާ އަޅުގަނޑާ ވާދަކުރައްވަވާ،" ނަޝީދު ވިދާޅުވި އެވެ.
ރާއްޖޭގައި ގާނޫނުތައް ބޭނުންކޮށް މިނިވަން އިންތިހާބަކަށް ހުރަސް އަޅައި، މިނިވަން މީޑިޔާއަށް ގިނަ ހަމަލާތަކެއް އަމާޒުކުރެވޭކަން ފާހަގަކުރައްވަމުން، ނަޝީދު ވިދާޅުވީ މިިނިވަން އިންތިހާބެއް ބޭއްވުމަށް ކުރަމުންދާ މަސައްކަތް ހުއްޓާނުލައްވާނެ ކަމަށެވެ.
ދިވެހިން އެދޭނީ ދިވެހިންގެ ހާލަތު ރަނގަޅުކުރަން ކަމަށާއި އެ ހުވަފެން ނަގާނުލެވޭނެ ކަމަށް ރައީސް ނަޝީދު ވިދާޅުވި އެވެ. އަދި، ގައުމުގައި ހިނގަމުންދާ ކަންތައްތަކުގެ ސަބަބުން ސަރުކާރާ މެދު އާންމުންގެ ހިޔާލު ބަދަލުވެ، ކުރިން ސަރުކާރަށް ތާއީދުކުރި ގިނަ ބައެއްގެ ސަޕޯޓު ސަރުކާރަށް ގެއްލެމުންދާ ކަމަށް ރައީސް ނަޝީދު ވިދާޅުވި އެވެ.
މިނިވަން އިންސާފުވެރި އިންތިހާބެއް ބޭއްވުމަށް ރައީސް ޔާމީން ހުރަސްއަޅުއްވާނޭ ކަމަށް ފާހަގަކުރައްވައި، ނަޝީދު ވިދާޅުވީ މިނިވަން އިންތިހާބެއް ބޭއްވުމަށް ރައީސް ޔާމީނަށް މަޖުބޫރުކުރަން ޖެހޭ ކަމަށެވެ. މި ނޫސްވެރިންގެ ބައްދަލުވުމުގައި ރައީސް ނަޝީދު ވަނީ ސަރުކާރުގެ ވަކިވަކި ބޭފުޅުންނަށް ދަތިކުރުމުގެ ފިޔަވަޅުތައް އެޅުމަށް ގޮވާލައްވާފަ އެވެ. އަދި، ސިޔާސީ މަސްލަހަތަށް ވުރެ ގައުމީ މަސްލަހަތު އިސްކުރަންޖެހޭ ކަމަށް ވެސް ވިދާޅުވި އެވެ.
