ރާއްޖޭގައި މިހާރު ތަރައްގީ ކުރަމުން ގެންދަނީ 140 ރިސޯޓު ކަމަށާއި ރިސޯޓު ހެދުމުގެ މަޝްރޫއު މިހާރު ވެސް ކުރިއަށް ދާކަމަށް ޓޫރިޒަމް މިނިސްޓަރ އަލީ ވަހީދު ވިދާޅުވެއްޖެއެވެ.
ޓޫރިޒަމް މިނިސްޓްރީގައި ބޭއްވި ނޫސްވެރިންގެ ބައްދަލުވުމުގައި މިނިސްޓަރު އަލީ ވަހީދު ވިދާޅުވީ ތަރައްގީ ކުރަމުން ގެންދާ 140 ރަށުގެ ތެރެއިން 54 ރަށެއްގެ މަސައްކަތް އެކި ސަބަބުތަކާ ހުރެ ހުއްޓިފައިވާ ކަމަށާއި 93 ރިސޯޓެއްގެ ތަރައްގީގެ މަސައްކަތްތައް ކުރިއަށް ދާކަމަށެވެ. ރާއްޖޭގައި ރަޖިސްޓްރީ ކޮށްގެން ހިންގަމުން ދަނީ ޖުމްލަ 144 ރިސޯޓެއް ކަމަށް އޭނާ ވިދާޅުވިއެވެ. އަދި ހޮޓެލްގެ ގޮތުގައި 12 ހޮޓެލާއި ގެސްޓް ހައުސްގެ ގޮތުގައި 508 ގެސްޓްހައުސް ރަޖިސްޓަރ ކޮށްފައިވާ ކަމަށް މިނިސްޓަރ ވިދާޅުވިއެވެ.
"ރާއްޖޭގައި މިވަގުތު 144 ރިސޯޓު ހިންގަމުން އެބަދޭ. ހޮޓަލުގެ ގޮތުގައި 12 ތަނެއް، ރަޖިސްޓާޑް ގެސްޓުހައުސްގެ ގޮތުގައި 508 ގެސްޓު ހައުސް އަދި ލިވަބޯޑް ވެސަލްސްގެ ގޮތުގައި 148 ވެސަލް ރަޖިސްޓްރީ ކޮށްފައިވޭ،" އަލީ ވަހީދު ވިދާޅުވިއެވެ.
ރާއްޖޭގައި ގިނަ އަދަދެއްގެ ރިސޯޓު ތަަރައްގީ ކުރަމުންދާއިރު، މިދިޔަ މަހު ރާއްޖެ އަށް ވަނީ 1،207،852 (އެއްމިލިއަން ދެލައްކަ ހަތްހާސް އަށްސަތޭކަ ފަންސާސް ދެ )ޓޫރިސްޓުން ޒިޔާރަތްކޮށްފައެވެ.
