ޕްރިޔަންކާ އާއި ނިކް ޖޯނަސްގެ ކައިވެނީގެ ތައްޔާރީތައް މިމަހުގެ 28 ގައި ފެށުމަށް ވަނީ ހަމަޖެހިފައެވެ.

އެ ދުވަހަކީ މިމަހުގެ 14 އަދި 15 ގައި ކައިވެނިކުރި ދިޕިކާ ޕަދުކޯން އާއި ރަންވީރު ސިންގް ގެ ކައިވެނީގެ ދެވަނަ ހަފްލާ ބޭއްވުމަށް ހަމަޖެހިފައިވާ ތާރީހެވެ.

މިޑް ޑޭގައި ރިޕޯޓްކޮށްފައިވާ ގޮތުން މި ޖޯޑު ކައިވެނި ކުރުމަށް ހަމަޖެހިފައިވަނީ ޖޯދްޕޫރުގައެވެ.

ދިޕިކާއި އާއި ރަންވީރުގެ ކައިވެނި ކުރިއަށް ދިޔަގޮތަށް ދެ ގޮތަކަށް މި ޖޯޑުގެ ކައިވެނި ކުރުމަށް ހަމަޖެހިފައިވާކަމަށް ޚަބަރުތައް ބުނެއެވެ. އެގޮތުން ޑިސެމްބަރު 2 ގައި ހިންދީ ސަގާފަތާއި އެއްގޮތަށް ކައިވެނި ކުރުމަށް ހަމަޖެހިފައިވާއިރު ޑިސެމްބަރު 3 ގައި ކްރިސްޓިއަން ސަގާފަތާއި އެއްގޮތަށް ކައިވެނި ކުރުމަށް ހަމަޖެހިފައިވާ ކަމަށް ރިޕޯޓްތައް ބުނެއެވެ.

ދާދިފަހުން ޕްރިޔަންކާގެ މަންމަ މަދޫ ޗޯޕްރާވެސް ވަނީ ޖޯދުޕޫރުން ފެނިގެން ގޮސްފައެވެ.

ޕްރިޔަންކާގެ ގާތް އެކުވެރިއެއް ކަމަށްވާ ޑަޗަސް އޮފް ސުޒެކްސް މެގަން މާކަލް އާއި ފިރިމީހާ ޕްރިންސް ހެރީ މިކައިވެނީގައި ފަހަރެއްގައި ބައިވެރި ނުވެވުނު ނަމަވެސް ހޮލީވުޑްގެ ގިނަ ތަރިންތަކެއް ބައިވެރިވާނެ ކަމަށް ގާތްމީހަކާ ހަވާލާދީ ރިޕޯޓްކޮށްފައި ވެއެވެ.

ޕްރިޔަންކާ އާއި އޭނާގެ މަންމަ ދާދިފަހުން ވަނީ ޕެރިސްގައި މި ހަފްލާއަށް ޚާއްސަ ފޮނިކާތަކެތި ގަނެފައެވެ.

ސްކައި އިޒް ފިންކްގެ ކޯސްޓަރ ފަރްޚާން އަކްތަރު ވެސް ޕްރިޔަންކާ ގެނެސްދީފައިވާ މެކަރޮންސްގެ ފޮޓޯ އޭނާގެ އިންސްޓްގްރާމްގައި ހިއްސާކޮށްފައެވެ.

މީގެ އިތުރުން މި ފިލްމްގެ ކޮސްޓިއުމް ޑިޒައިނަރ އޭކާ ލަޚާނީވެސް ވަނީ " ޝާދީކެ ލައްޑޫ " ޖެހުމަށްފަހު އޭނާގެ ފޮނި ކާތަކެތި އިންސްޓަގްރާމްގައި ހިއްސާކޮށްފައެވެ. އަދި އޭނާ ވަނީ ޕްރިޔަންކާއަށް ޝުކުރު އަދާކޮށްފައެވެ.

އެ މެކަރޮންސް އަކީ އާކާޝް އަމްބާނީ އާއި ޝްލިކާ މެހެތާގެ އެންގޭޖްމަންޓް ހަފްލާގައި ހަދާފައި ހުރި ބްރޭންޑް ގެ މެކަރޮންސް ކަމަށް ރިޕޯޓްކޮށްފައި ވެއެވެ.

ޕްރިޔަންކާ މިވަގުތު ދަނީ ޝޮނާލީ ބޯސްގެ ފިލްމް ގެ ޝޫޓިންތައް ދިއްލީގެ ޗާންދަނީ ޗޯކް ސަރަހއްދުގައު ޝޫޓް ކުރަމުންނެވެ.