ޔޫތު މިނިސްޓަރު އިރުތިޝާމް އާދަމާއި ރައްޔިތުންގެ މަޖިލީހުގެ ހުޅުދޫ ދާއިރާގެ މެންބަރު މުހައްމަދު ޝާހިދު (ޝާޑު) ގެ ކައިވެނީގެ ރަން ކިޔައިފި އެވެ.
ރާއްޖެއެމްވީ އަށް މައުލޫމާތު ދެއްވަމުން ޝާހިދު ވިދާޅުވީ ރަން ކިޔުމުގެ ހަފްލާ ބޭއްވީ ހޯމަ ދުވަހުގެ ރޭ ކަމަށެވެ. އަދި ކައިވެނި އޮންނާނީ މިމަހުގެ 17 ވަނަ ދުވަހު ކަމަށް ވެސް ޝާހިދު ވިދާޅުވި އެވެ.
ނަމަވެސް، މިނިސްޓަރު އިރުތިޝާމް ރަން ކިޔުއްވި އަދަދާ ގުޅޭ މައުލޫމާތެއް ޝާހިދު ނުދެއްވަ އެވެ.
މައުލޫމާތު ލިބިފައިވާ ގޮތުގައި ދެ ބޭފުޅުންގެ ކައިވެނީގެ ހަފްލާ ބޭއްވުމަށް ހަމަޖެހިފައިވަނީ ދަރުބާރުގޭގަ އެވެ.
އިރުތިޝާމް އާއި ޝާހިދު ކައިވެނި ބައްލަވައިގަންނަވަން އުޅުއްވާކަމުގެ އަޑު ފެތުރިފައިވަނިކޮށް، އެ ދެބޭފުޅުން އެއްކޮށް ނަގާފައިވާ ސެލްފީތަކާއި ފޮޓޯތައް ސޯޝަލް މީޑިއާގައި ވަނީ ދައުރުވެފައެވެ.
މިމަހުގެ 17 ވަނަ ދުވަހު ބާއްވާ ކައިވެނި ހަފްލާ އަށް މިނިސްޓަރު އިރުތިޝާމް ވަނީ ޔޫތް މިނިސްޓްރީގެ ބައެއް މުވައްޒަފުންނަށް ދައުވަތު ދެއްވާފަ އެވެ. މިނިސްޓްރީގެ މުވައްޒަފުންނަށް ދައުވަތު ދެއްވާ މިނިސްޓްރީގެ ވައިބާ ގްރޫޕުގައި ފޮނުއްވި މެސެޖުގެ ސްކްރީން ޝޮޓެއް ވެސް ސޯޝަލް މީޑިއާގައި ދަނީ ދައުރުވަމުންނެވެ.
މިއީ މިނިސްޓަރު އިރުތިޝާމްގެ އަލަތު ކައިވެންޏަށް ވާއިރު، ޝާހިދުގެ ކުރީގެ ކައިވެނިތަކުން ތިން ކުދިން ތިބެ އެވެ.
