ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލް ޤައްޔޫމަކީ ތެދުވެރި އިޚްލާސްތެރިއެއްކަމަށް އެމަނިކުފާނު ވިދާޅުވެއްޖެއެވެ.
ޕީޕީއެމް އުފެއްދެވި ރައީސް މައުމޫންގެ އަތްޕުޅުން ކޯޓު މެދުވެރިކޮށް ޕީޕީއެމްގެ ކޮންޓްރޯލް ނަންގަވާފައިވާ ރައީސް ޔާމީން މިހެން ވިދާޅުވީ ޕީޕީއެމްގެ ރިޔާސީ ޓިކެޓް އެރުވުމަށް އާދީއްތަ ދުވަހުގެރޭ ދަރުބާރުގޭގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
ދައުލަތުގެ މީޑިޔާގެ ޑެޕިއުޓީ މެނޭޖިން ޑިރެކްޓަރު މުހައްމަދު އިކްރާމް އަބްދުއް ލަތީފް ރައީސް ޔާމީނަށް ހުޝާމިދު ކުރައްވާ ފަށުވި އިބާރާތުން ދެއްކި ވާހަކައަށް އިޝާރާތް ކުރައްވާ ރައީސް ޔާމީން ވިދާޅުވީ އެމަނިކުފާނަކީ އެވިދާޅުވާފަދަ ބޭފުޅެއް ނޫން ކަމަށާއި ދޮންބަންޑާރައިންނާއި މުހައްމަދު ތަކުރުފާނުފަދަ ބޭފުޅެއް ނޫން ކަމަށެވެ. ނަމަވެސް އެމަނިކުފާނަކީ ތެދުވެރި އިޚްލާސްތެރިއެއް ކަމަށް ރައީސް ޔާމީން ވިދާޅުވިއެވެ.
"އަޅުގަނޑަށް ވަރަށް ޙައްޤުނޫން ބަސްތައް އިކްރާމް ހަދިޔާ ކުރެއްވި. އެއްގޮތަކަށްވެސް ޙައްޤުނޫން ތައުރީފް އެއްވެސް މީހަކަށް ކުރުމަކީ ރަނގަޅު ކަމެއް ނޫން. އެއްގޮތަކަށްވެސް އަޅުގަނޑެއް ޤަބޫލެއް ނުކުރަން އަޅުގަނޑަކީ އެވިދާޅުވި ލިސްޓްގައި އެއްވެސް ހިސާބަކުން ހިމެނޭނެ ކަމަށް އުއްމީދުކުރި މީހެއް ނޫން. ހުވަފެނަކުންވެސް ދުށް މީހެއް ނޫން. އެކަމަކު އަޅުގަނޑަކީ ތެދުވެރިއެއް. އަޅުގަނޑަކީ އިޚްލާސްތެރިއެއް. އަޅުގަނޑަކީ މަސައްކަތް ކުރާ މީހެއް. އަޅުގަނޑަކީ ރައްޔިތުންގެ އިތުބާރު އަޅުގަނޑުގެ މަސައްކަތާއި އިޚްލާސްތެރިކަމުން ހޯދާމީހެއް" ދޮންބަންޑާރައިންނާއި އަލިރަސްގެފާނު އަދި ބޮޑުތަކުރުފާނުފަދަ ބޭފުޅުންނާ އެއްހަމަކޮށް އިކުރާމް ދެއްކި ވާހަކައާއި ގުޅިގެން ރައީސް ޔާމީން ވިދާޅުވިއެވެ.
ރައީސް ޔާމީން ވިދާޅުވީ އެމަނިކުފާނު ރައްޔިތުންގެ ތާއީދު ހޯދަނީ ޤައުމުގެ އެންމެން ބޭނުންވެފައިވާ ކަންކަން ފުއްދައިދީގެން ކަމަށާއި މި ކުރިމަތި ލައްވަނީ ގައުމީ މަސްއޫލިއްޔަތަކާއި ކަމުގައެވެ. އަދި ރިޔާސީ އިންތިހާބަކީ ދިވެހިންގެ ބަހާތަކާއި ރުކުންތައް ރައްކާތެރި ކުރަނީ ކިހާވަރަކަށްތޯ ބެލުމަށް ކުރާ ޓެސްޓެއްކަމަށާއި ޒުވާނުން ހާއްސަކޮށް އެކަމާއި މެދު ވިސްނަން ޖެހޭ ކަމުގައެވެ.
މީގެ އިތުރުން ރައްޔިތުން އެމަނިކުފާނަށް އިތުބާރު ކުރަނީ ރާއްޖޭގައި އެތައް ޒަމާނެއް ވަންދެން ހައްލު ނުވެ ހުރި މައްސަލަތަކެއް ހައްލު ކުރުމަށް ކުރިމަތިލައްވާތީކަމަށްވެސް ރައީސް ޔާމީން އާދިއްތަ ދުވަހުގެރޭ ވިދާޅުވިއެވެ.
