ގުޅިފައިވާ ޕާޓީތަކުގެ ކެންޑިޑޭޓް އިބްރާހިމް މުހައްމަދު ސާލިހު (އިބޫ) އަމިއްލަފުޅު ދަތުރުފުޅެއްގައި ރާއްޖެއިން ބޭރަށް ވަޑައިގަތުމަށް ފަހު ހޯމަ ދުވަހު ހެނދުނު ރާއްޖެ ވަޑައިގަންނަވާނެކަން އެނގިއްޖެ އެވެ. 

ރިޔާސީ އިންތިހާބަށް އަތޮޅު ތެރޭގެ ރަށްތަކަށް ކުރައްވާ ދަތުރުތައް މެދުކަނޑާލެއްވުމަށް ފަހު، މި މަހުގެ 17 ވަނަ ދުވަހު އިބޫ އިނގިރޭސި ވިލާތަށް ވަޑައިގަތީ ދަރިކަނބަލުންގެ ގްރެޖުއޭޝަންގައި ބައިވެރިވެވަޑައިގަތުމަށެވެ. 

އިބޫ ހޯމަ ދުވަހު އެނބުރި މާލެ ވަޑައިގަންނަވާއިރު، ރިޔާސީ އިންތިހާބަށް ވާދަކުރުމުގެ ފުރުސަތު ހޯމަ ދުވަހު ހުޅުވާލާނެ އެވެ. 

އިބޫ ވަޑައިގަތުމާއެކު ގުޅިފައިވާ ސިޔާސީ ޕާޓީތަކުގެ ކެމްޕެއިން ހަރަކާތްތަކުގައި އެމަނިކުފާން ބައިވެރިވަޑައިގަންވާނެއެވެ. އަދި ކެމްޕެއިންގެ ދަތުރުތަށް ފައްޓަވާނެވެ.  

ރާއްޖެއިން ބޭރަށް ވަޑައިގެންވުމުގެ ކުރިން އިބޫ ވަނީ އައްޑޫ ސިޓީ އާއި ފުވައްމުލަކަށް ވަޑައިގެން ދޮރުން ދޮރަށް ކެމްޕެއިން ކުރައްވާފަ އެވެ.