2017 ވަނަ އަހަރު އެންމެ ކާމިޔާބު އެއް ލަވަކަމަށްވާ "ބޮޑެކް ޔެލޯ" ކިޔާފައިވާ ކާޑީ ބީ ކައިވެނި ކޮށްފައިވާކަން ހާމަ ވެއްޖެއެވެ.

ކާޑީ އާއި ލޯބިވެރިޔާ އޮފްސެޓް ކައިވެނި ކުރަން އެންގޭޖްވެފައިވާކަން އިއުލާންކޮށްފައިވަނީ 2017 ވަނަ އަހަރުގެ އޮކްޓޯބަރ މަހެވެ. ކާޑީ ގާރު ކައިވެނި ކުރުމަށް އޮފްސެޓް އަހާފައިވަނީ ސްޓޭޖް މަތީ ޕަރފޯމް ކުރަމުންނެވެ. އޮފްސެޓްއަކީ މިގޯސް ބޭންޑަށް ނިސްބަތްވާ ކާމިޔާބު ރެޕް އާޓިސްޓެކެވެ.

އަދި އެންގޭޖްވިތާ ދުވަސްކޮޅެއް ފަހުން ކާޑީ ބަލިވެއިން ކަމުގެ ރިޕޯޓްތައް ފެތުރެން ފެށިއެވެ. އެއަށް އެއްޗެކޭ ނުބުނެ ހުރުމަށް ފަހު ކާޑީ ވަނީ ބަލިވެއިން ކަން މި އަހަރުގެ އޭޕްރިލް މަހު ހާމަކޮށްފައެވެ.

ނަމަވެސް މިހާރު ރިޕޯޓްތައް ބުނާ ގޮތުން، ކާޑީއާއި އޮފްސެޓްވަނީ މިދިޔަ އަހަރުގެ ސެޕްޓެމްބަރު މަހު ކައިވެނިކޮށްފައެވެ.

ޓްވިޓަރ މެދުވެރިކޮށް ކާޑީ ވަނީ މިކަންތައް ތެދުކޮށްފައެވެ.

"އަހަރެންގެ ހަޔާތުގެ ބައެއް ބައިތައް ދުނިޔެއާ ހިއްސާ ކުރަން ބޭނުން، އަނެއް ބައިތައް ހިއްސާ ކުރާކަށް ބޭނުމެއް ނުވޭ. ކައިވެނި ކުރުމަކީ އެފަދަ ކަމެއް. އަހަރަމެންގެ ރިލޭޝަންޝިޕް އޭރު ވަރަށް އާ. ދެ މީހުން އަދި ބޮޑުވާން ޖެހޭ އެކަމަކު އެކަކު އަނެކަކު ގެއްލެން ބޭނުން ނުވީ،" 25 އަހަރުގެ ކާޑީ ކިޔައި ދިނެވެ.

އެއް ދުވަހު ހޭލާފަ ދެ މީހުންވެސް ކައިވެނު ކުރަން ބޭނުންވީ ކަމަށާއި، "އެއްވެސް މޭކަޕެއް، އަނގޮޓިއެއް ނެތި" ހަމަ އިނީ ކަމަށެވެ. އަދި އެ ކުޑަ ހަފްލާގައި ދެ މީހުންގެ އިތުރުން ބައިވެރިވީ ކައިވެނި ކޮށްދިން ފަރާތާއި ކާޑީގެ ތިމާގެ މީހެއްކަމަށް އޭނާ ބުންޏެވެ.