އިޝާން ޓައްކަރު އަދި ޖާންވީ ކަޕޫރު ލީޑް ރޯލުން ފެނިގެންދާ "ދަޅަކް" ގެ ޓްރެއިލާރ ރިލީޒްކޮށްފިއެވެ.

ކަރަން ޖޯހަރުގެ ދަރްމާ ޕްރޮޑަކްޝަން އިން އުފައްދާފައިވާ މި ފިލްމްގެ ޓްރެއިލާ ރިލީޒް ކޮށްފައި ވަނީ ހޯމަ ދުވަހުއެވެ.

ރާޖަސްތަންގެ ހިތްގައިމު މަންޒަރުތައް ދައްކުވައިދޭ ތިން މިނެޓްގެ މި ހިތްގައިމު ޓްރެއިލާ އިން އެ ދެ މީހުންގެ ލޯބީގެ އަސަރުގަދަ ގުޅުން ފެނިގެން ދެއެވެ.

އަޖޭ އަތުލްސް ބެކްގަރައުންޑް މިއުޒިކް ހަދާފައިވާ މި ޓްރެއިލާ ބަލާލުމުން ފިލްމު ބަލާހިތްވެގެން ދާނެ ކަމަށް ޚަބަރުތައް ބުނެއެވެ.

ޝަޝާންކް ޚައިތަން ޑައިރެކްޓްކުރާ މި ފިލްމުގެ މަސައްކަތް ފަށާފައި ވަނީ މިދިޔަ ނޮވެމްބަރު މަހުއެވެ. މަރާތީ ފިލްމެއް ކަމަށްވާ "ސައިރާތު" އަސްލަކަށް ބަލައިގެން އުފައްދާ "ދަޅަކް"އަކީ މަސްވެރިއެއްގެ ފިރިހެން ދަރިފުޅަކާއި ސިޔާސީ މީހެއްގެ އަންހެން ދަރިއަކާ މެދު އުފެދޭ ލޯބީގެ ވާހަކައެއްގެ މައްޗަށް ބިނާކޮށް އުފައްދާފައިވާ ފިލްމެކެވެ. "ސައިރާތު" ސިނަމާތަކަށް އައިސްފައި ވަނީ 2016 ވަނަ އަހަރުގައެވެ. އެ ފިލްމަށް ވަނީ ބޮޑު ތަރުހީބެއް ލިބިފައެވެ.

"ސައިރާތް" އަސްލަކަށް ބަލައިގެން އުފައްދާ " ދަޅަކް" ރިލީޒް ކުރުމަށް ހަމަޖެހިފައި ވަނީ އަންނަ ޖުލައި މަހުގެ 20 ވަނަ ދުވަހުއެވެ.

މި ދެ ފިލްމުގައި މައިގަނޑު އެއްގޮތްވި ނަމަވެސް "ސައިރާތު" އާޚިލާފަށް "ދަޅަކް" ގައި ފެނިގެންދާ ލޯބީގެ ވާހަކަ ނިސްބަތް ވަނީ އިންޑިއާގެ ރާޖަސްތާނަށެވެ. "ސައިރާތު"ގެ ވާހަކައަކީ އިންޑިއާގެ މަހަރާޝްތްރަގައި ހިނގައިދާ ލޯބީގެ ފިލްމެކެވެ.

ޖާންވީ ބޮލީވުޑަށް ތައާރަފުވާ މިފިލްމުގެ 25 މިނިޓް އޭނާގެ މަންމަ ސްރީދޭވީ މަރުވުމުގެ ކުރިން ބެލި ކަމަށް ބުނެ ދާދި ފަހުން ޖާންވީ ދީފައިވާ އިންޓަވިއުއެއްގައި ވަނީ ބުނެފައެވެ. ޖާންވީ ބުނީ އޭނާގެ މަންމަ މަރުވުމުގެ ކުރިން ފިލްމުގެ އިންޓަވަލް ކުރީގެ ފުރަތަމަ 25 މިނިޓް ބެލި ކަމަށާއި ފިލްމާއި ދޭތެރޭ ވަރަށް އުފަލުން ހުރި ކަމަށެވެ. އަދި ރަނގަޅު ކުރަންވީ ކަންތައްތައް އޭނާއަށް ސްރީދޭވީ ކިޔައިދިން ކަމަށް ޖާންވީ ވަނީ ބުނެފައެވެ.

ޖާންވީގެ މަންމަ އަދި މަޝްހޫރު އެކްޓްރެސް ސްރީދޭވީ މަރުވެފައި ވަނީ މިދިޔަ ފެބްރުއަރީ މަހުގެ 24 ގައެވެ.