އިލެކްޝަން ކޮމިޝަނުން ރިޔާސީ އިންތިޚާބު އޮބްޒާވްކުރުމަށް ބޭރުގެ ގައުމުތަކަށް ދައުވަތު ނުދީ ދިގުދައްމާނެ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
މިއަހަރު ބާއްވާ ރިޔާސީ އިންތިޚާބާ ބޭހޭ ގޮތުން ރައީސް ނަޝީދު ހުކުރު ދުވަހު ކުރެއްވި ޓްވީޓެއްގައި ވިދާޅުވީ ރިޔާސީ އިންތިޚާބު އޮބްޒާވް ކުރުމަށް ބޭރުގެ ގައުމުތަކުގެ އޮބްޒާވަރުންނަށް ދައުވަތުދޭނެ ކަމަށާއި، ނަމަވެސް ދައުވަތު ދޭނީ ރިޔާސީ އިންތިޚާބަށް ވަރަށް ބޮޑަށް ވަގުތު ކުޑަތަންވުމުން ކަމަށެވެ. އަދި ދައުވަތު ނުދީ މަޑުކުރަނީ މާ ލަހުން ދައުވަތުދީފި ނަމަ ބޭރުގެ އޮބްޒާވަރުންނަށް ރާއްޖެ ނާދެވޭނެކަން އެކޮމިޝަނަށް އެނގޭތީ ކަމަށް ވިދާޅުވެފައި ވެއެވެ.
އެމްޑީޕީގެ ރިޔާސީ ޕްރައިމަރީގައި ކަންތައްތައް ހިނގައިދިޔަ ގޮތަށް އަލިއަޅުއްވަލައްވައި ރައީސް ނަޝީދު ވިދާޅުވީ އެމްޑީީޕީގެ ޕްރައިމަރީން އެކަނި ވެސް އިލެކްޝަން ކޮމިޝަނަށް އެއްވެސް ކަހަލަ އިތުބާރެއް ނެތްކަން ހާމަވެފައިވާ ކަމަށެވެ. އަދި މިސަބަބުތަކާ ހުރެ، މިނިވަން ދެފުށް ފެންނަ އިންސާފުވެރި އިންތިޚާބެއް ބޭއްވެނީ އިލެކްޝަން ކޮމިޝަނުގައި މިހާރު ތިއްބެވި މެންބަރުން ބަދަލުކޮށް އަލުން އެކޮމިޝަން އެކުލަވާލައިގެން ކަމަށް އެމަނިކުފާނު ވިދާޅުވިއެވެ.
The Maldives EC cynically waited until the last possible moment to invite foreign election observers, knowing that they can’t come without proper prior notice. MDP primaries proved EC has zero credibility. EC must change to have a genuinely free, fair and inclusive election.
— Mohamed Nasheed (@MohamedNasheed) June 8, 2018
ރައީސް ނަޝީދު މިހެން ވިދާޅުވެފައިވާއިރު އިލެކްޝަންސް ކޮމިޝަނުގެ ރައީސް އަހުމަދު ޝަރީފް ވިދާޅުވީ، މިއަހަރުގެ ރިޔާސީ އިންތިޚާބަކީ ދުނިޔެއަށް އެންމެ ބޮޑަށް ހުޅުވާލައިގެން ބާއްވާނެ އިންތިޚާބު ކަމަށެވެ. އަދި މިއަހަރުގެ ރިޔާސީ އިންތިޚާބުގެ ވޯޓުލުން 23 ސެޕްޓެމްބަރު 2018ވާ އާދީއްތަ ދުވަހު ބާއްވާ ގޮތަށް އިލެކްޝަންސް ކޮމިޝަނުން ހަމަޖައްސަވާ އިއުލާންކޮށްފައެވެ.