ކުކުޅެއް ވަގަށް ނަގަން އުޅުނު މީހަކު ކުކުޅާ އެކު އައްޑޫ ސިޓީން ހައްޔަރުކޮށްފިއެވެ.
ފުލުހުންގެ މީޑީއާ އޮފިޝަލަކު "ރާއްޖެއެމްވީ"އަށް ވިދާޅުވީ އައްޑޫ ސިޓީ ފޭދޫގައި ކުކުޅެއް ވަގަށް ނަގަން އުޅުނު 31 އަހަރުގެ މީހަކު ފުލުހުންގެ ބެލުމުގެ ދަށަށް ގެނެސްފައިވާ ކަމަށެވެ. އޭނާގެ ވަނަވަރެއް ފުލުހުން ހާމައެއް ނުކުރެއެވެ.
އެ ކުކުޅު ވަގަށް ނެގި މީހާ ހައްޔަރަށް ގެންދިޔަ މަންޒަރު ފެންނަ ފޮޓޯތަކެއް ރާއްޖެއެމްވީއަށް ވަނީ ލިބިފައެވެ. ފޮޓޯތަކުން ފެންނަ ގޮތުގައި ފުލުހުންގެ ވެހިކަލަށް އޭނާ އަރުވާފައި ވަނީ ވަގަށް ނަގަން އުޅުނު ކުކުޅާ ވެސް އެކުގައެވެ. ފޮޓޯތަކުން ފެންނަ ގޮތުގައި ކުކުޅު އޮތީ ހަރަކާތް ހުއްޓި، މަރުވެފައެވެ.
އެ ކުކުޅު މަރުވީ ވަގަށް ނަގަން އުޅުނު މީހާގެ އަމަލުތަކުން ކަމެއް، ނުވަތަ ހައްޔަރު ކުރުމުގެ ތެރޭގައި ހިނގި ކަމަކުން ކަމެއް ނޭނގެއެވެ.
