މޯލްޑިވިއަން ޑިމޮކްރެކިޓިކް ޕާޓީ (އެމްޑީޕީ) ގެ ރިޔާސީ ޕްރައިމަރީ، ބޮޑު އަޣުލަބިއްޔަތަކުން ކާމިޔާބުކުރައްވައި، އެ ޕާޓީގެ ރިޔާސީ ޓިކެޓް ކުރީގެ ރައީސް މުހައްމަދު ނަޝީދު ކަށަވަރުކުރައްވައިފިއެވެ.

އެމްޑީޕީގެ ރިޔާސީ ޕްރައިމަރީގައި ވާދަކުރެއްވުމުގެ ވަގުތު ހަމަވިއިރު ޕްރައިމަރީގައި ވާދަކުރައްވީ ހަމައެކަނި ރައީސް ނަޝީދުއެވެ. އެހެންކަމުން އެ ޕާޓީއިން ބުދަ ދުވަހު ކުރިޔަށް ގެންދިޔަ ޕްރައިމަރީގައި އެޕާޓީގެ މެމްބަރުންގެ މެދުގައި ނަގާފައިވަނީ ފެންނަ ނުފެންނަ ވޯޓެކެވެ.

މި ވޯޓްގައި ބައިވެރިވި އެމްޑީޕީގެ މެމްބަރުންގެ ތެރެއިން 43922 މީހުން ވަނީ ރައީސް ނަޝީދަށް އެޕާޓީގެ ރިޔާސީ ޓިކެޓް ދޭން ފެންނަ ކަމަށް ވޯޓްދީފައެވެ. ޖުމްލަ 14 މީހަކު ރައީސް ނަޝީދަށް ރިޔާސީ ޓިކެޓް ދޭން ނުފެންނަ ކަމަށް ވޯޓް ދިންއިރު 75 މީހުން ވަނީ ބާތިލު ވޯޓް ލާފައެވެ. މި ޕްރައިމަރީގައި އެ ޕާޓީގެ 44011 މެމްބަރުން ވަނީ ވޯޓް ލާފައެވެ. ރައީސް ނަޝީދު ޕްރައިމަރީ ކާމިޔާބުކުރެއްވީ ވޯޓްލި މީހުންގެ 99.8 އިންސައްތަ ތާއިދާއެކުއެވެ.

މާލެއާއި ރާއްޖޭގެ މީހުން ދިރިއުޅޭ ހުރިހާ ރަށެއްގެ އިތުރުން ރާއްޖެއިން ބޭރުގައިވެސް މި ޕްރައިމަރީގެ ވޯޓްލުން ކުރިޔަށް ގެންދިޔައިރު އެމްޑީޕީގެ ގިނަ އަދަދެއްގެ މެމްބަރުން ވަނީ ވޯޓްލުމަށް ނުކުމެފައެވެ. އިލެކްޝަންސް ކޮމިޝަނުގެ އެދިލުމަކަށް ފުލުހުން ވަނީ މި ޕްރައިމަރީ ހުއްޓުވުމަށް ނާކާމިޔާބު މަސައްކަތްތަކެއް ކޮށްފައެވެ.

މި ކާމިޔާބާއެކު ރައީސް ނަޝީދު ވެގެންދާނީ މިއަހަރުގެ ސެޕްޓެމްބަރު މަހު އޮންނަ ރިޔާސީ އިންތިހާބަށް ގުޅިފައިވާ ޕާޓީތަކުން ނެރޭ އެއް ކެނޑިޑޭޓްގެ މަޤާމަށް އެމްޑީޕީއިން ހުށަހަޅާނެ ކެނޑިޑޭޓަށެވެ.