ސަރުކާރުން އަނިޔާވެރިވެ، ފަސާދައިގެ އަމަލުތައް ހިންގަމުންދާތީ ސަރުކާރުން ވަކިވެވަޑައިގެންނެވި، އަދާލަތު ޕާޓީގެ ކައުންސިލް މެމްބަރު ޝެއިޚް މުހައްމަދު ދީދީ ޕީޕީއެމްއަށް ސޮއިކުރައްވައިފި އެވެ.
މުހައްމަދު ދީދީ ސޮއިކުރައްވަން ޕީޕީއެމް އިން ހޯމަ ދުވަހުގެ ރޭ ބޭއްވި ރަސްމިއްޔާތެއްގައި، ސުޕްރީމް ކޯޓުގެ ހުކުމް ތަންފީޒު ނުކުރައްވާ ހުންނެވި ރައީސް އަބްދުﷲ ޔާމިން އަބްދުލްގައްޔޫމް ބައިވެރިވެޑައިގެންނެވި އެވެ.
ޕީޕީއެމްއަށް ސޮއިކުރެއްވި މުހައްމަދު ދީދީ ވަނީ ކުރިން މި ސަރުކާރުގައި އިސްލާމިކް މިނިސްޓްރީގެ ސްޓޭޓް މިނިސްޓަރުކަން ކުރައްވާފަ އެވެ. އޭނާ ސަރުކާރުން ވަކިވެވަޑައިގަތީ، އިދިކޮޅު ސިޔާސީ ލީޑަރުންނަށް ސަރުކާރުން އަނިޔާވެރިވެ، ފަސާދައިގެ އަމަލުތައް ތަކުރާރުވަމުންދާ ކަމަށް ބުނެ، އަދާލަތު ޕާޓީން ސަރުކާރަށް ކުރި އިތުބާރު އަނބުރާ ގެނައުމުން އެކަމަށް އިހްތިރާމު ކުރުމުގެ ގޮތުންކަމަށް ކުރިން އޭނަ ވަނީ ވިދާޅުވެފަ އެވެ.
ޕީޕީއެމުން އިން ހޯމަ ދުވަހުގެ ރޭ ބޭއްވި ރަސްމިއްޔާތުގައި ށ. ފީވަކު އެމްޑީޕީ ދާއިރާގެ ރައީސް ހަސަން ޒުހުރީ ވެސް ސޮއިކުރެއްވި އެވެ.
ޝެއިޚް މުހައްމަދު ދީދީ ޕީޕީއެމް އަށް ސޮއިކުރެއްވިއިރު، މުހައްމަދު ދީދީ ވެސް ފައުންޑަރ މެމްބަރެއްގެ ގޮތުގައި އުފެއްދެވި އަދާލަތު ޕާޓީގެ ރައީސް ޝެއިޚް އިމްރާން އަބްދުﷲ ވަނީ 12 އަހަރަށް ވަނީ ޖަލަށް ލައިފަ އެވެ. އިމްރާން ޖަލަށް ލާފައިވާނީ ބޭއިންސާފުން ކޮށްފައިވާ ހުކުމެއްކަމަށް ގިނަ ބަޔަކު ބުނެ އެވެ. ރައީސް އަބްދުﷲ ޔާމީން ވެރިކަމަށް ގެންނެވުމަށް މަސައްކަތްކުރި އަދާލަތު ޕާޓީން، ސަރުކާރަށް ކުރި ތާއިދު އަނބުރާ ގެންދިޔައީ އަނިޔާވެރި ކަމާއި ފަސާދަ ބޮޑުވެގެން ކަމަށް ބުނެ އެވެ.
