މަޝްހޫރު ވިޔަފާރިވެރިޔާ، ގ.ހުދުކޮކާ މުޙައްމަދު ހަސަންފުޅު (އެމެޓީ ސޭޓް / ކަނޑޫދޫ ކުޑަ މުހައްމަދުފުޅު) ނިޔާވެއްޖެއެވެ.

އެމްއެންޑީއެފްގެ ކާނަލް ޑރ ޢަލީ ޝާހިދު މުހައްމަދުގެ ބައްޕަ ނިޔާވީ އައިޖީއެމްއެޗްގައި ފަރުވާދެމުން ދަނިކޮށް ބުދަ ދުވަހުގެރޭ ދަންވަރު 2:30 ހާއިރުއެވެ.

މުޙައްމަދު ހަސަންފުޅުގެ ޢާއިލާއިން ބުނި ގޮތުގައި އޭނާ އައިޖީއެމްއެޗްގައި އެޑްމިޓް ކުރީ ކުއްލިއަކަށް ހާލު ބޮޑުވެގެން މުލަ ރޯދަ ވިލޭރެއެވެ. 

ރައްޔިތުންގެ މަޖިލީހުގެ ތ އަތޮޅު މެންބަރުކަންވެސް ކުރައްވާފައިވާ މުހައްމަދު ޙަސަންފުޅަކީ، ރައީސް އިބްރާހީމް ނާސިރުގެ ވެރިކަމުގައި ސިފައިންގޭގައިވެސް ޚިދުމަތް ކުރެއްވި ބޭފުޅެކެވެ. އަދި އެންމެ ފުރަތަމަ ރާއްޖެއިން ބޭރުން ރާއްޖެއަށް މުދާ އެތެރެކޮށްގެން ބާޒާރުގައި ވިއްކި 5 ވިޔަފާރިވެރިންގެ ތެރޭގައިވެސް އޭނާ ހިމެނެއެވެ.

މުޙައްމަދު ހަސަންފުޅު ނިޔާވިއިރު 7 ފިރިހެން ބޭފުޅުންނާއި 4 އަންހެން ބޭފުޅުން ލިބިފައިވެއެވެ. ނިޔާވިއިރު އަނބިކަނބަލުންނާއި 10 ބޭފުޅުން ދުނިޔޭގައި އެބަތިއްބެވިއެވެ.

އުމުރުން 77 އަހަރުގައި ނިޔާވި މުޙައްމަދު ހަސަންފުޅުގެ ޖަނާޒާއާއި މޫނު ދެއްކުން އޮންނާނީ އާސަހަރާގައެވެ. އަދި ކަށުނަމާދު ކުރުން އޮންނާނީ ބުރާސްފަތި ދުވަހުގެ އަސުރު ނަމާދަށްފަހު އިސްލާމީ މަރުކަޒުގައެވެ.