ގުގުރުމާއެކު ބޯކޮށް ވާރޭވެހި އަދި ވައިގަދަވާނެ ކަމަށް ލަފާކުރެވޭތީ ހއ. އާއި ބ. އަތޮޅާ ދެމެދުގެ ރަށްތަކަށް ވައިޓް އެލާޓް ނެރެފި އެވެ.
ރާއްޖޭގެ މޫސުމާބެހޭ ގައުމީ އިދާރާ، މޯލްޑިވްސް މީޓިއޮލޮޖިކަލް ސާރވިސް (މެޓް އޮފީސް) އިން ބުނީ ރާއްޖޭގެ އުތުރާއި މެދު ރާއްޖެތެރެ ހިމެނޭ ގޮތަށް، ހއ. އާއި ބ. އަތޮޅާ ދެމެދުގެ ރަށްތަކަށް ގުގުރުމާއެކު ބޯކޮށް ވާރޭވެހި، އަދި ވިލާގަނޑުގައި ގާތްގަނޑަކަށް ގަޑިއަކު 40 މޭލަށް ވައިގަދަ ވާނެކަމަށް ލަފާކުރެވޭތީ އާދިއްތަ ދުވަހުގެ ހެނދުނު 09:45 އިން ފެށިގެން މެންދުރުފަހު 15:45 އަށް ވައިޓް އެލާޓް ނެރެފައިވާ ކަމަށެވެ.
ALERT WHITE
— Maldives Meteorology (@MetMaldives) May 20, 2018
INFORMATION:
Heavy rain and thunderstorms with gusty winds of 40 mph expected.
Area: Between Haa Alif and Baa atoll.
Period: 20/0945 hrs - 20/1545 hrs.
ISSUED: 0915 hrs 20 May 2018.
-MetService-
މެޓް އޮފީހުން ބުނީ ކުރިއަށް އޮތް 24 ގަޑިއިރު، ރާއްޖޭގެ އެކި ހިސާބުތަކަށް ވިއްސާރަ ކުރާނެ ކަމަށާއި ބައެއް ހިސާބުތަކަށް ގުގުރުމާއެކު ބޯކޮށް ވާރޭ ވެހޭނެ ކަމަށް ލަފާކުރެވޭ ކަމަށެވެ.
ރާއްޖޭގެ މެދުތެރޭގައި އަތޮޅުތަކަށް ވައިޖެހެނީ ދެކުނާއި ހުޅަނގުދެކުނުން ގަޑިއަކު 13 މޭލާއި 23 މޭލާ ދެމެދުގެ ބާރުމިނުގައި ކަމަށާއި އެހެން ހިސާބުތަކަށް ވައިޖެހެނީ ގަޑިއަކު 07 މޭލާއި 17 މޭލާ ދެމެދުގެ ބާރުމިނުގައި ކަމަށާއި ވިލާގަނޑުގައި ގަޑިއަކު 40 މޭލަށް ވައިގަދަވާނެ ކަމަށް ލަފާކުރެވޭ ކަމަށްވެސް މެޓް އޮފީހުން ބުނެއެވެ.
މެޓް އޮފީހުން ބުނީ ރާއްޖޭގެ މެދުތެރޭގެ އަތޮޅުތަކުގެ ކަނޑުތައް އާއްމުގޮތެއްގައި ގަދަވާނެ ކަމަށާއި އަދި އެހެން ހިސާބުތަކުގެ ކަނޑުތައް އާދައިގެ ވަރަކަށް ގަދަވެފައި ވިލާގަނޑުގައި ގަދަވާނެ ކަމަށް ލަފާކުރެވޭ ކަމަށެވެ.
ރާއްޖެއަށް މިހާރު ކުރަމުންދާ ވިއްސާރައަކީ ހުޅަނގު މޫސުމުގެ ވިއްސާރަ އެވެ. މިއަދަކީ ހުޅަނގު މޫސުމުގެ ހަތަރު ވަނަ ނަކަތް ކަމަށްވާ ރޯނު ނަކަތުގެ ފުރަތަމަ ދުވަހެވެ.
