ޖަލު ހުކުމެއް އައިސްފައިވާތީ ރިޔާސީ އިންތިހާބުގައި މި ފަހަރު ކުރީގެ ރައީސް މުހައްމަދު ނަޝީދަށް ވާދަ ނުކުރެއްވޭނެ ކަމަށް ވިދާޅުވެ ސަރުކާރުން ވާހަކަ ދައްކަވާއިރު ގާނޫނު އަސާސީގައި އޮތީ ހަމަ އެކަނި ރިޔާސީ އިންތިހާބަށް ކުރިމަތިލާ މީހާގެ ޝަރުތު ތޯ ސުވާލު ކުރައްވައި، މަޝްހޫރު ގާނޫނީ ވަކީލް ހިސާން ހުސެއިން ސަރުކާރުގެ ވާހަކަތަކަށް ރައްދެއް ދެއްވައިފި އެވެ.
ބ.ތުޅާދޫގައި ހުކުރު ދުވަހުގެ ރޭ ބޭއްވި ނަޝީދުގެ ޕްރައިމަރީ ކެމްޕެއިން ޖަލްސާގައި ވާހަކަ ދައްކަވަމުން ނަޝީދުގެ ގާނޫނީ ވަކީލު ހިސާން ހުސުއިން ވިދާޅުވީ އެމަނިކުފާނުގެ މައްޗަށް ކޮށްފައިވާ ޝަރީއަތަކީ އިންސާފެއް ހަމައެއް ނެތި، އެތައް ހައްގުތަކެއް ނިގުޅައިގަނެ ހިންގާފައިވާ ޝަރީއަތެއް ކަމަށެވެ. އަދި އެ ހުކުމާ އަޅުވައި، ނަޝީދަށް ކުރިމަތި ނުލެއްވޭނެ ކަމަށް ސަރުކާރުން ބުނަމުންދާއިރު ގާނޫނު އަސާސީގައި އޮތީ ހަމަ އެކަނި ރިޔާސީ އިންތިހާބަކަށް ކުރިމަތިލާ ކެންޑިޑޭޓެއްގެ ޝަރުތުތައް އެކަނި ނޫން ކަމަށް ހިސާން ވިދާޅުވިއެވެ.
"މީހަކާ މެދު އިންސާފުވެރި ކަމާއެކު ޝަރީއަތް ކުރެވުމުގެ ހައްގު. ސިޔާސީ ހަރަކާތްތަކުގައި ބައިވެރިވުމުގެ ހައްގު. މިނިވަން ކަމާއެކު ތިމާ އިހްތިޔާރުކުރާ މީހަކަށް ވޯޓުލުމުގެ ހައްގު. އެއްވެ އުޅުމުގެ މިނިވަންކަމުގެ ހައްގު. މިއިން އެއްވެސް ކަމަކަށް ބެލުމެއް ނެތި ސަރުކާރުން މި ބުނަނީ އިންތިޚާބަކައް ކުރިމައްޗެއް ނުލެވޭނެ އޭ. ގާނޫނު އަސާސީގައި އޮތީ ހަމަ އެކަނި ރިޔާސީ އިންތިހާބަކަށް ކުރިމަތިލުމުގެ ޝަރުތުއެކަނި ތޯ. އެހެން އެއްވެސް ހައްގެއް، ގާނޫނު އަސާސީގެ ދެވަނަ ބާބުގައި އެވާ އެއްވެސް ހައްގެއް ނެތީތޯ؟، އަޅުގަނޑުމެންގެ ލޯމަތިން އެބައި ފޮހެވިގެން ދިޔައީ ތޯ،" ހިސާން ވިދާޅުވި އެވެ.
ރައީސް ނަޝީދު މިނިވަން ކުރުމަށް އ.ދގެ ވާރކިންގ ގުރޫޕުން ގޮވާލުމުން އެ ނިންމުމަކީ ރާއްޖެއިން ތަބާވާން ޖެހޭ ނިންމުންތަކެއް ނޫން ކަމަށާއި ރާއްޖެއިން އަމަލު ކުރަމުންދާނީ ސުޕްރީމް ކޯޓުން ނިންމާ ނިންމުންތަކަށް ކަމަށް ސަރުކާރުން ބުނިކަން ހިސާން ފާހަގަ ކުރެއްވި އެވެ. އެހެން ނަމަވެސް ސަރުކާރުން ގަބޫލު ކޮށްގެން ތިބި ސުޕްރީމް ކޯޓާއި އދ.ގެ ހިއުމަންރައިޓްސް ކޮމިޝަނުން ވެސް ރައީސް ނަޝީދު ދޫކޮށްލަން އެންގުމުން އެކަމަށް ވެސް ރައީސް ޔާމިން ތަބާ ނުވުމުން ބޮޑު މަންޒަރު ސާފުވާ ކަމަށް ހިސާން ވިދާޅުވިއެވެ.
"ބޮޑު މަންޒަރު ބަލާލުމުން ސާފު ވެގެންދަނީ ރައީސް ޔާމިން ހަގީގަތުގައި އަމަލު ކުރައްވަން ބޭނުންވަނީ އެމަނިކުފާނު ނިންމަވާ ނިންމުންތަކަށް އެކަނިކަން. އެމަނިކުފާނު ރުހޭ ރުހުންތަކަށް ކަން. އެމަނިކުފާނު ހިތްޕުޅާނުވާ މީހެއް ނަމަ އެމީހަކީ ވުޖޫދުގައި ހުރެގެންވާ މީހެއް ކަމަކަށްވެސް ނުވޭ. އެމީހަކީ މިނިވަންކަމާއެކު ދިރިއުޅުމުގެ ހައްގު ލިބިގެންވާ މީހެއް ކަމަކަށްވެސް ވެގެން ނުވޭ،" ހިސާން ވިދާޅުވި އެވެ.
އެމްޑީޕީގެ ރިޔާސީ ޕްރައިމަރީގައި ނަޝީދަށް ތާއިދު ހޯދާ ދިނުމަށް ބޭއްވި މި ޖަލްސާގައި ހިސާން ވިދާޅުވީ އެކަނިވެރިމައިންނަށާއި ހާއްސަ އެހީއަށް ބޭނުންވާ މީހުނަށް އިނާޔަތް ދެއްވައި، ބޭސް ސިޓީއަށް ސަލާން ޖެހުން ނައްތާލައްވައި، އިޖްތިމާއީ ރައްކާތެރިކަން ހޯދާދެއްވި ރައީސަކީ ރައީސް ނަޝީދު ކަމަށެވެ. އަދި މިއަދު ރާއްޖޭގެ ޖަޒީރާކަން ނަގާލަން މަސައްކަތްކުރާއިރު ދިވެހި ރައްޔިތުން އެގޮތް ބޭނުން ނުވާކަމަށް ފާހަގަ ކުރައްވައި ޕްރައިމަރީގައި ރައީސް ނަޝީދު ބޭނުން ކުރައްވަމުން ގެންދަވާ ޝިއާރަށް ވެސް ތާއިދު ކުރައްވާ ހިސާން ވަނީ ވާހަކަ ދައްކަވާފައެވެ.
"އަޅުގަނޑުމެން ދިވެހި ރައްޔިތުން ބޭނުމެއް ނޫން މުޅި މާލެ އާއި މާލެ ވަށައިގެން އެކަނި ހިދުމަތްތައް ތައާރަފުވެ، އެތަނަށް އެންމެން ތޮއްޖެހި، ނޭވާ ނުލެވޭ ހާސްކަން ބޮޑު ދިރިއުޅުމެއް އުޅޭކަށް. އަޅުގަނޑުމެންގެ މި ޖަޒީރާވަންތަ ގައުމުގައި މި ކުދިކުދި ރީތި ރަށްތަކުގައި ހަމަޖެހިގެން ހިންދިރުވާލައިގެން އުޅެވޭނެ އާއިލާއެއް އުޅޭނެ މަންޒަރު ބަލަން އަޅުގަނޑުމެން ބޭނުމީ. އިރާދަކުރެއްވިޔާ އެމްޑީޕީގެ ދެން އަންނަ ވެރިކަމެއްގައި އެކަން ހަގީތަތަކަށް ހަދާދޭނެ،" ހިސާން ވިދާޅުވި އެވެ.