އިސްލާމް ދީނާ ދުރުކޮށް އިސްލާމްކަން ޗައިނާގެ މުސްލިމުންގެ ކިބައިން ފޮހެލުމަށް ޗައިނާ ސަރުކާރުން ފުޅާ ދާއިރާ އެއްގައި ހިންގާ ދަށު ދަރަޖައިގެ ކަންކަމުގެ ވާހަކަތައް އާއްމުވެ މުޅި ދުނިޔެ ސިއްސުވާލައިފިއެވެ.

މިކަން ފަޅާ އެރީ ޗައިނާ ސަރުކާރުން މުސްލިމުންނަށް އަމާޒުކޮށް ހިންގާ ކޭމްޕެއްގައި މަޖުބޫރުން ގެންގުޅުނު ބައެއް މީހުން އެވާހަކަތައް ހުޅަނގުގެ މީޑިއާ އާ ހިއްސާ ކުރުމުންނެވެ.

މުސްލިމުން ހައްޔަރު ކޮށްގެން އެމީހުންގެ އަގީދާ ފުހެލުމަށް ޗައިނާ ސަރުކާރުން ހިންގާ މާ ސިންގާ ކޭމްޕްގެ ބޮޑު މިން އިންޑިއާގެ ދެބައިކުޅަ އެއްބައި ވަރު ވާނެ ކަމަށް ލަފާ ކުރެވޭ ކަމަށް މީޑީއާ ރިޕޯޓުތައް ބުނެއެވެ.

ޗައިނާގެ މުސްލިމުން އިސްލާމް ދީނާ ދުރުކުރަން ޗައިނާ ސަރުކާރުން ހިންގާ މި ކޭމްޕްގައި ގެންގުޅޭ މުސްލިމުންނަށް ނަފްސާނީ ގޮތުންނާއި ޖިސްމާނީ ގޮތުން ލާ އިންސާނީ އަނިޔާތައް ދޭ ކަމުގައި ވެއެވެ.

ޗައިނާގެ ހުޅަނގުގެ ޕްރޮވިންސެއް ކަމަށްވާ ޒިންޖިއާންގައި ހިންގާ މި ކޭމްޕްގައި މިލިއަނެއްހާ މުސްލިމުން ހައްޔަރު ކޮށްގެން ގެންގުޅޭ ކަމަށް ވެއެވެ.

ކޭމްޕުން ސަލާމަތްވި މީހުންގެ ތެރޭގައި ހިމެނުނު ކަޒަގިސްތާނުގެ ރައްޔިތެއް ކަމަށްވާ އޮމިރު ބިކާލީ ވޮޝިންގޓަން ޕޯސްޓަށް ކިޔައިދިން ގޮތުގައި އެމީހުންނަށް ކޭމްޕްގައި އޫރު މަސް ކެއުމަށާއި ރާ ބުއިމަށް މަޖުބޫރު ކުރުވިއެވެ.

އޭނާ ކިޔައިދިން ގޮތުގައި ކޭމްޕް ތަކުގައި މައިގނަޑު ގޮތެއްގައި ކުރާ މަސައްކަތަކީ އިސްލާމް ދީނާ ދުރުކުރުމާއި، ޗައިނާގެ ކޮމިއުނިސްޓް ޕާޓީއަށް މުސްލިމުންގެ ފިކުރު އަނބުރާލުމެވެ.

ބިކާލީ ބުނި ގޮތުގައި އޭނާ ހައްޔަރު ކޮށްގެން ގެންގުޅުނީ އެއްވެސް ކުށެއް ކޮށްގެން ނޫނެވެ. އަދި ހައްޔަރު ކޮށްފައި ހުރި މުއްދަތުގެ ތެރޭގައި ގާނޫނީ ވަކީލެއްގެ އެހީތެރިކަންވެސް ހޯދުމުގެ ފުރުސަތު ވެސް އޭނާ އަކަށް ނުލިބެއެވެ.

އޭނާ ކިޔައިދިން ގޮތުގައި އޫރުމަސް ކެއުމަށާއި ރާ ބުއިމަށް ދެކޮޅު ހެދުމުން އަދަބެއްގެ ގޮތުން ފާރެއްގައި ލައްގާ ދެއަތް މައްޗަށް ނަގާފައި ކޮޅަށް ބަހައްޓައެވެ. މިގޮތައް ކޮންމެ ފަހަރަކު ފަސްގަޑީއިރު ވަރު ބަހައްޓާ ކަމަށް އޭނާ ބުންޏެވެ. އެ ގޮތައް ކޮޅަށް ބެހެއްޓުމަށް ފަހު އޭގެ ފަހުން އެކަހެރި ތަނެއްގައި ބަންދުކޮށް ކާން ނުދީ 24 ގަޑީއިރު ބެހެއްޓި ކަމަށް އޭނާ ބުންޏެވެ. އޭނާ ބުނީ މިފަދަ އަނިޔާ ތައް ވިއްސަކަށް ދުވަސް ވަންދެން ދިން ތަނާ އަމިއްލަ އަށް މަރުވާން ވެސް ހިތައް އެރި ކަމަށެވެ. އޭނާ ވަނީ ކޭމްޕުގައި ހަތް މަސް ދުވަހު ހައްޔަރު ކޮށްފައި ބަހައްޓާފައެވެ.

އެސޯސިއޭޓެޑް ޕްރެސް އަށް އެތަނުގެ އަނިޔާތަކުގެ ވާހަކަ ކިޔައި ދެމުން ދިޔައިރު އެ ހިތްދަތި ހަނދާންތައް އާވެ ބިކާލީ އަށް ރޮވުނު ކަމަށް އެ ނޫހުގައި ބުނެފައިވެއެވެ.

އޭނާ ކިޔައިދިން ގޮތުން އަމިއްލަ ދީނަށް އެއްޗެހި ކިޔުއްވުމާއި، އަމިއްލަ އީމާން ކަމަށް މަލާމަތް ކުރުމަށް ކޭމްޕްގައި ޖައްސައެވެ.

އޭނާ ބުނީ ނަފްސާނީ ގޮތުން ދޭ މިފަދަ އަނިޔާ ތަކުގެ އަސަރު ވަރަށް ބޮޑަށް ކުރާ ކަމަށާއި، ކޭމްޕުން ސަލާމަތްވި ފަހުން ވެސް އެހަނދާންތައް އަބަދު ނުފިލާ ހުންނާތީ ނިދަންވެސް އުނދަގޫވާ ކަމަށެވެ.

ޗައިނާ ސަރުކާރުން ޒިއާންޖިންގ ގައި ހިންގާ ލާ އިންސާނީ މި ކޭމްޕަކީ ޔޫއެސް ކޮމިޝަން އޮން ޗައިނާ އިން ބުނެފައިވާ ގޮތުގައި މައިނޯރިޓީ އަކަށް އަމަޒުކޮށް ދުނިޔޭގައި ހިންގާ މިފަދަ އެންމެ ބޮޑު ކޭމްޕެވެ. މިއީ ސީދާ ވަކި ސަގާފަތެއް ފުހެލުމަށް ޓާގެޓް ކޮށްގެން ހިންގާ ޕްރޮގްރާމެއް ކަމަށްވެސް އެ ކޮމިޝަނުން ހާމަކޮށްފައި ވެއެވެ.

ޗައިނާ އިން "ރީ އެޑިއެކޭޝަން" ގެ ނަމުގައި އިސްލާމް ދީން އެގައުމުން ނައްތާލުމަށް ހިންގާ މި ކޭމްޕްގައި ހިންގާ ލާ އިންސާނީ އަނިޔާތަކާ ބެހޭ ގޮތުން އެސޯސިއޭޓެޑް ޕްރެސް އިން ޗައިނާ ސަރުކާރާ ސުވާލު ކުރުމުން ބުނި ކަމަށް ވަނީ "އެކަހަލަ ކަމެއް ހިނގާ ކަމެއް ނޭގޭ" ކަމަށެވެ.

ކޭމްޕްގައި ހިންގާ ލާއިންސާނީ އަމަލުތަކުގެ ވާހަކަތަކަށް ޗައިނާގެ ސަރުކާރުން މިހާތަނަށް މާ ބޮޑު އެއްޗެއް ބުނެފައި ނުވި ނަމަވެސް ޗައިނާގެ ބައެއް އޮފިޝަލުންގެ ނަޒަރުގައި މިއީ ވަކިވެގަތުމާއި، ދީނީ ގޮތުން ހައްދުފަހަނަ އަޅާ ދިޔުން ހުއްޓުވުމަށް އެ މީހުންގެ ނަޒަރުގައި ކުރަންޖެހޭ ކަމެކެވެ.

ޗައިނާ ސަރުކާރުން އިސްލާމް ދީނާ ދެކޮޅަށް ހިންގާ މި ކޭމްޕްތަކުގައި ހައްޔަރު ކޮށްގެން ގެންގުޅެނީ ހަމައެކަނި ޗައިނާ މީހުންނެއް ނޫނެވެ. ބޭރު ގައުމުތަކުގެ މުސްލިމުން ވެސް މީގެ ތެރޭގައި ހިމެނެއެވެ.

އިންސާނީ ހައްގު ތަކަށް މަސައްކަތް ކުރާ ޖަމްއިއްޔާ އެއް ކަމަށްވާ ހިއުމަން ރައިޓްސް ވޮޗް އިން ހުސްވި ހަފްތާގައި ނެރެފައިވަ ރިޕޯޓެއްގައި ބުނެފައިވަނީ، ޗައިނާގައި ދިރިއުޅޭ މުސްލިމުންނަށް އުޅެން ޖެހިފައިވަނީ ވަރަށް ނިކަމެތި ހާލުގައި ކަމުގައެވެ. އެމީހުންގެ ކޮންމެ އަމަލެއް ބަލަން އެތައް ފުލުހުންނެއް ފާރަ އަށް ތިބޭ ކަމަށް ބުނެފައިވެއެވެ.

ޒިއާންޖިންގ ގެ ގޯތިގެދޮރަށް ޗައިނާގެ އޮފިޝަލުން ވަދެ އެތާނގައި ދިރިއުޅޭ މުސްލިމުންނާ ސުވާލުކޮށް އެމީހުންގެ ވިސްނުމާއި ފިކުރު ހުންނަ ގޮތަކާއި، ދީނީ ގޮތުން ގަބޫލު ކުރާ ގޮތްތަކާ ބެހޭ ގޮތުން ޗައިނާގެ އޮފިޝަލުން އަބަދާ އަބަދު ގެންދަނީ މައުލޫމާތު އެއް ކުރަމުން ކަމަށް ހިއުމަން ރައިޓްސް ވޮޗް އިން ހާމަ ކޮށްފައިވެއެވެ.

ބިކާލީ ބުނީ އޭނާ ހައްޔަރު ކޮށްގެން ގެންގޮސް ބަންދު ކުރި ސެލްގައި ސާޅީސް މީހުން ތިބި ކަމަށާއި އޭގެ ތެރޭގައި ޓީޗަރުންނާއި ޑޮކްޓަރުންނާއި ނަރުހުންނާއި ކިޔަވާ ކުދިންވެސް ތިބި ކަމަށެވެ.

ކޭމްޕްގައި ކޮންމެ ކެއުމެއްގެ ފަހުން ކޮމިއުނިސްޓް ޕާޓީއަށާއި، ޗައިނާ އަށާއި، ރައީސް ޝީ އަށް ޝުކުރު އަދާ ކުރަން ޖެހޭ ކަމަށް ބިކާލީ ބުންޏެވެ.

ބިކާލީ ބުނީ ކޭމްޕްގައި އެމީހުންނަށް ޚާއްސަ ފިލާވަޅުތައް ނަގައި ދިނުމަށް ފުލުހުންނާއި ޝަރުއީ ދާއިރާގެ އޮފިޝަލުން އަންނަ ކަމަށާއި، އެމީހުންގެ އަބަދާ އަބަދު ދޭ ފިލާވަޅަކީ، އިސްލާމް ދީނަކީ ނުރައްކާތެރި ދީނެއް ކަމަށާއި، އެމީހުން ތަބާވާން ޖެހޭނީ ޝަރީއާ އަށް ނޫން ކަމަށާއި އޭގެ ބަދަލުގައި އެމީހުން ވަފާތެރި ވާން ޖެހޭނީ ޗައިނާގެ ގާނޫނަށް ކަމަށެވެ.

ޗައިނާގެ މުސްލިމުންނަށް އެތާނގެ ސަރުކާރުން ވިސްނައިދެނީ ގުރުއާން ކިޔެވުމާއި ނަމާދު ކުރުމަކީވެސް ހައްދުފަހަނަ އަޅާ ދިޔުން ކަމަށެވެ. އެއިން ކަމެއް ކުރެވިއްޖެ ނަމަ އެއީ ގޯސް ކަމެއް ކުރެވުނީ ކަމަށް ތަކުރާރު ކޮށް އެމީހަކު ލައްވާ ކިޔުއްވާ ކަމަށްވެސް ވެއެވެ.