މެލޭޝިއާގެ ކުރީގެ ބޮޑުވަޒީރުގެ ނައިބު އަންވަރު އިބްރާހިމް ފަދަ ބޭފުޅުންގެ މަސައްކަތްފުޅު ތަކުން ހިތްވަރު ލިބިގަންނަން ޖެހޭ ކަމަށް މިސަރުކާރުގެ ފުރަތަމަ ނައިބް ރައީސް ޑރ މުހައްމަދު ޖަމީލު ވިދާޅުވެއްޖެއެވެ.
މެލޭޝިއާގެ ބޮޑު ވަޒީރުގެ ކުރީގެ ނައިބު އަންވަރު މިނިވަންކުރުމާއި ގުޅިގެން މަރުހަބާ ދަންނަވާ ކުރައްވާފައިވާ ޓްވީޓެއްގައި ޑރ ޖަމީލު ވިދާޅުވީ އަންވަރަކީ އިސްލާހީ މަސައްކަތްތައް ކުރުމުގައި ލާމަސީލު ލީޑަރެއް ކަމަށެވެ.
Congratulations to ex-Deputy PM & reformer @anwaribrahim on being pardoned & freed from jail. #Malaysia & Muslim world draws inspiration from leaders like you who continue to defend & stand by democratic principles & human rights no matter what the consequences are. pic.twitter.com/tMqehTVacx
— Mohamed Jameel Ahmed (@MJameelAhmed) May 16, 2018
ޑރ ޖަމީލު ވިދާޅުވީ ޑިމަކްރަސީއާ، އިންސާނީ ހައްގުތައް ދެމެހެއްޓުމަށް އަންވަރު ކުރައްވާފައިވާ މަސައްކަތްތަކުން ބާރާއި، ހިތްވަރު ލިބިގަންނަންޖެހޭ ކަމަށެވެ. އަދި މުސްލިމް އުންމަތްތަކުން އަންވަރު ކަހަލަ ބޭފުޅުން ނަމޫނާ އަކަށް ބަލަންޖެހޭ ކަމަށް ވެސް ޑރ ޖަމީލު ވިދާޅުވިއެވެ.
މީގެ އިތުރަށް ކުރީގެ ރައީސް މުހައްމަދު ނަޝީދު ވެސް ވަނީ އަންވަރު މިނިވަންވުމާއި ގުޅިގެން މަރުހަބާ ދަންނަވާފައެވެ. ރައީސް ނަޝީދު ވިދާޅުވީ ކަމެއް ހާސިލް ކުރުމަށް ހިތްވަރާއެކު މަސައްކަތް ކޮށްފިނަމަ ކާމިޔާބު ވާނެ ކަމަށެވެ.
When you never, ever give up, good things finally happen. Congratulations to @anwaribrahim, @drwanazizah and @n_izzah. With the support of the Malaysian people, you did it!
— Mohamed Nasheed (@MohamedNasheed) May 16, 2018
މެލޭޝިއާގެ އިދިކޮޅު ލީޑަރު އަންވަރު ދެވަނަ ފަހަރަށް ޖަލަށް ލެއްވީ 2015 ވަނަ އަހަރު ކުރީގެ ބޮޑުވަޒީރު ނަޖީބު ރައްޒާގްގެ ވެރިކަމުގަ އެވެ. އަންވަރުގެ މައްޗަށް ޖަލު ހުކުމް އިއްވީ އޭނާގެ ސިޔާސީ ހަޔާތް ނިމުމަކަށް ގެންނެވުމަށް ނަޖީބު ބޭނުންފުޅުވެގެން ކަމަށާއި، ހިންގީ ސިޔާސީ ޝަރިއަތެއް ކަމަށް އަންވަރު ވަނީ ވިދާޅުވެފައެވެ.
މެލޭޝިއާގެ އާންމު އިންތިހާބުގައި އެގައުމުގެ ބޮޑުވަޒީރު ނަޖީބް ރައްޒާގު ކުރިމަތިވެވަޑައިގެންނެވި ނާކާމިޔާބީއާ ގުޅިގެން ރާއްޖޭގެ ސިޔާސީ އިދިކޮޅި ފަރާތްތަކުން ވަނީ އުފާފާޅު ކުރައްވާފައެވެ. އަދި މިއަހަރު ބާއްވާ ރިޔާސީ އިންތިހާބުގައި ރައީސް ޔާމީން ވާދަކުރައްވައިފިނަމަ ލިބިވަޑައިގަންނަވާނީ ހަމަ އެ ނަތީޖާ ކަމަށް ސިޔާސީ ބޭފުޅުން ގެންދަވަނީ ވިދާޅުވަމުންނެވެ.
