ކްރިމިނަލް ކޯޓުން އިއްވި ހުކުމަކާ ގުޅޭ ގޮތުން ގާނޫނީ ވަކީލު ހިސާން ހުސެއިން މީޑިޔާއަށް ދެއްވި އިންޓަވިއުއަކާ ގުޅިގެން އޭނާ ކްރިމިނަލް ކޯޓަށް ހާޒިރުކުރާތީ ކުރީގެ ރައީސް މުހައްމަދު ނަޝީދު ކަންބޮޑުވުން ފާޅުކުރައްވައިފިއެވެ.
ރައީސް ނަޝީދު ކުރެއްވި ޓުވީޓެއްގައި ވިދާޅުވީ ހިސާން ކޯޓަށް ހާޒިރުކުރުމަކީ ބިރު ދެއްކުމަށް ހިންގާ އަމަލެއް ކަމަށެވެ. އަދި އެއީ ގާނޫނުގައި ކަނޑައަޅާފައިވާ ހަމަތަކަށް ދެވޭ "ހަމަލާއެއް" ކަމަށްވެސް އެމަނިކުފާނުގެ އެ ޓުވީޓްގައި ވިދާޅުވެފައިވެ އެވެ.
I have been summoned to Criminal Court for tomorrow at 10 am. pic.twitter.com/UnwBECBCeJ
— Hisaan ؟ (@hisaanhussain) May 13, 2018
ހޯމަ ދުވަހު ކްރިމިނަލް ކޯޓަށް ހިސާން ހާޒިރުވުމަށް އަންގާފައިވަނީ ހޯމަ ދުވަހުގެ ހެނދުނު 10.00ގައެވެ. ހިސާނަށް ފޮނުވާފައިވާ ޗިޓްގައިވާ ގޮތުން އޭނާ ކޯޓަށް ހާޒިރު ވުމަށް އަންގާފައިވަނީ އުއްތަމަ ފަނޑިޔާރު އަބްދުﷲ ސައީދާއި ސުޕްރީމް ކޯޓުގެ ފަނޑިޔާރު އަލީ ހަމީދުގެ މައްޗަށް އުފުލި ރަސްމީ ހައިސިއްޔަތުން ކުރަން ޖެހޭ ކަމަކަށް ނުފޫޒު ފޯރުވުމުގެ ދައުވާ ސާބިތުވާ ކަމަށް ކޮށްފައިވާ ހުކުމާ ގުޅޭ ގޮތުން މީޑިޔާއަށް ދީފައިވާ މައުލޫމާތަކާ ގުޅިގެންނެވެ.
The Criminal Court’s summoning of attorney @hisaanhussain is a blatant act of intimidation, and another assault on the rule of law.
— Mohamed Nasheed (@MohamedNasheed) May 13, 2018
މިމަހުގެ 10 ވަނަ ދުވަހުއޮތް ޝަރީއަތުގައި އެދެބޭފުޅުންގެ މައްޗަށް ކުށްސާބިތުވާކަމަށް ނިންމައި އެކުށުގެ އަދަބެއްގެ ގޮތުން އެއް އަހަރާއި ހަތް މަހާއި ހަ ދުވަހަށް އެ ދެބޭފުޅުން ޖަލަށް ލުމަށް ކްރިމިނަލް ކޯޓުން ހުކުމްކުރިފަހުން ކޯޓުން ނިކުންނަވާ ހިސާން އިންޓަވިއު ދެއްވާފައިވަނީ ހަމައެކަނި ރާއްޖެ ޓީވީއަށެވެ. ހިސާނަކީ އުއްތަމަ ފަނޑިޔާރު އަބްދުﷲ ސައީދާއި ޖުމްހޫރީ ޕާޓީގެ ލީޑަރު ގާސިމް އިބްރާހިމާއި އެމަނިކުފާނުގެ ދަރިކަލުން ސިޔާދު ގާސިމްގެ އިތުރުން ރައީސް ނަޝީދުގެ ވެސް ގާނޫނީ ވަކީލެވެ.
