މިދިޔަ އޭޕްރީލް މަހުގެ 21 ވަނަ ދުވަހު މޫދަށް ގޮސް އުޅެނިކޮށް ގެއްލުނު ދެކުދިން ހޯދުމުގެ މަސައްކަތް އަދިވެސް ހުއްޓާނުލައި ކުރިއަށް ގެންދާކަމަށް އެމްއެންޑީއެފުން ބުނެފިއެވެ.
އެމްއެންޑީއެފްގެ އިންފޮރމޭޝަން އޮފިސަރ ކެޕްޓަން އިބްރާހީމް އާޒިމް ވިދާޅުވީ ކަނޑުގެ މަގުންނާއި ވައިގެ މަގުންވެސް އެކުދިން ހޯދުމުގެ މަސައްކަތް އަދިވެސް ކުރަމުންދާކަަމަށެވެ.
ގެއްލިގެން ހޯދަމުން ދަނީ ހިތަދޫ ޗަނބޭލީގޭ އަލީ ފަހުމީ، 17 އަހަރު އަދި ޓޮޕާޒް މަޔާމީން އަލީ، 14 އަހަރު އެވެ.
ހިތަދޫ ކޯއްޓޭ ސަރަހައްދަށް އެޕްރީލް 21 ވަނަ ދުވަހު މޫދަށް އެރި އުޅެނިކޮށް އޮއިގަނޑުގައި ޖެހުނު ތިން ކުދިންގެ ތެރެއިން އެއް ކުއްޖަކު، މީހަކު ގޮސް ސަލާމަތްކުރި އެވެ. ތިން ކުދިންގެ ތެރެއިން ސަލާމަތްވެފައިވަނީ އަލީ ރާއިފްއެވެ.
