އިރާނުގެ ނިއުކްލިއަރ އެއްބަސްވުމުން އެމެރިކާ ބޭރުވެ، ދަތިކުރުމުގެ ފިޔަވަޅު އިޔާދަކުރުމުން އެއްބަސްވުމުގައި ސޮއިކުރި ދުނިޔޭގެ ބާރުގަދަ އެހެން ގައުމުތަކާއެކު މަޝްވަރާ ކުރަން ނިންމައިފިއެވެ.
އީރާނުގެ ރައީސް ހަސަން ރޫހާނީ ވިދާޅުވީ އެމެރިކާގެ ނިންމުމަކީ ގަބޫލުކުރެވޭނެ ނިންމުމެއް ނޫން ކަމަށާއި އެމެރިކާއިން އެއްބަސްވުމުން ވަކިވިޔަސް އޭގައި ސޮއިކޮށްފައި ތިބި ދުނިޔޭގެ އެހެން ގައުމުތަކާއެކު މަޝްވަރާ ކުރައްވާނެކަމަށެވެ.
ރޫހާނީގެ ބަހުގެ ހަމަލާ އަންގާރަ ދުވަހު ދެއްވި އިރު، އެމެރިކާގެ ރައީސް ޓްރަމްޕް ވަނީ 'ޖޭސީޕީއޯއޭ' ގެ ނަން ދެވިފައިވާ ނިއުކިލިއަރ އެއްބަސްވުމަކީ ފެށުނީއްސުރެންވެސް ދޯހަޅި އެއްބަސްވުމެއް ކަމަށް ވިދާޅުވެ، އެއީ އެމެރިކާގެ ރައްޔިތުންނަށް ހުރި ލަދެއް ކަމަށް ބުނެ އެއްބަސްވުމުން ވަކިވެފައެވެ.
"ކުރީގަ އޮތް އެއްބަސްވުމުން ހާސިލްވި ނަތީޖާ ދެންތިބި ގައުމުތަކާއި ގުޅިގެން ލިބޭނެނަމަ، އެއްބަސްވުން ދަމަހައްޓާނަން. ބައިނަލް އަގްވާމީ މުއާހަދާތަކަށްވެސް އެމެރިކާއިން އަހަންމިއްޔަތުކަން ނުދޭ މިންވަރު މި ފެންނަނީ. އަހަރެން ވާނީ ފޮރިން މިނިސްޓްރީއަށް އަންގާފަ ޗައިނާ، ރަޝިއާ އަދި ހުޅަނގުގެ ގައުމުތަކާއި އެކު އަންނަން އޮތް ހަފްތާ ތަކުގައި މަޝްވަރާ ކުރަން. މި މަދު ދުވަސް ކޮޅުތެރޭގަ އެހެން ގައުމުތަކާއެކު ކުރެވޭ މަޝްވަރާއިން އަހަރުމެންނަށް ޖޭސީޕީއޯއޭއިން ފައިދާ އެންމެ ރަނގަޅަށް ވާނެކަން ޔަގީން ކުރެވިއްޖިއްޔާ އެއްބަސްވުން ދެމަހައްޓާނަން،" ޓްރަމްޕް އަށް ރައްދު ދެއްވުމުގެ ގޮތުން ރޫހާނީ ވިދާޅުވިއެވެ.
އީރާނާއި އެކު ވެފައިވާ ނިއުކްލިއަރ އެއްބަސްވުމުން ވަކިވުމަށް އެމެރިކާއިން ނިންމި ނިންމުމަށް އެކި ފަރާތްތަކުން ފާޑުކިޔަމުންދާއިރު، މިހާތަނަށް މި ނިންމުމަށް މަރުހަބާ ކިޔާފައިވަނީ، ސައުދީ އަރަބިއާގެ އިތުރުން މެދުއިރުމަތީގައި އީރާނާއި މެދު އެންމެ ހަސަދަވެރިވާ އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އެކަންޏެވެ. ނަތަންޔާހޫ ވަނީ ރައީސް ޓްރަމްޕްގެ ނިންމެވުމަކީ ރަނގަޅު ނިންމެވުމެއް ކަމަށާއި، އީރާނުގެ ނިއުކްލިއަރ އެއްބަސްވުމަކީ ވަރަށް ގޯސްކޮށް ހަދާފައިވާ އެއްބަސްވުމެއް ކަމަށް ވިދާޅުވެފައެވެ.
