2009ވަނަ އަހަރަށް ފަހު ލުބްނާނުގައި ބޭއްވި ފުރަތަމަ އާއްމު އިންތިޚާބުގައި ކާމިޔާބު ހޯދިއްޖެ ކަމަށް ޝީޢީންގެ ޖަމާއަތް ހިޒްބުﷲ އިން ބުނެފިއެވެ.

އިންތިޚާބުގެ ރަސްމީ ނަތީޖާ އިއުލާންކުރުމުގެ ކުރިން ހިޒްބުﷲގެ ލީޑަރު ހަސަން ނަސްރުﷲ ވިދާޅުވީ އިންތިޚާބުގައި ލިބުނު ކާމިޔާބީއާއި އެކު، އިސްރާއީލާއި ދެކޮޅަށް ކުރާ މަސައްކަތަށް އިތުރު ނަސްރެއް ލިބިއްޖެ ކަމަށެވެ. 

އިންތިޚާބުގައި ބޮޑުވަޒީރު ސާދު ޙަރީރީގެ ފިއުޗަރ މޫވްމަންޓް ޕާޓީއަށް ޤާނޫނު ހަދާ މަޖިލީހުގައި ކުރިން ލިބިފައިވާ ގޮނޑިތަކުގެ ތިންބައިކުޅަ އެއް ބައި ގޮނޑިތައް ވަނީ ގެއްލިފައެވެ. އެހެން ނަމަވެސް ލުބްނާނުގެ އިންތިޚާބީ ނިޒާމު އޮންނަ ގޮތުން ސަރުކާރު އެކުލަވާލައްވަން ޖެހިވަޑައިގަންނަވާނީ ސާދު ޙަރީރީއަށެވެ. ލުބްނާނުގެ ނިޒާމު އޮންނަ ގޮތުން ބޮޑުވަޒީރުކަމުގައި ހުންނަވާނީ ސުންނީ މުސްލިމެކެވެ. އަދި ޤާނޫނު ހަދާ މަޖިލީހުގެ ރައީސްކަމުގައި ޝީޢީއަކު ހުންނަވަން ޖެހޭއިރު، ރައީސްކަމުގައި ހުންނަވާނީ ނަޞާރާއެކެވެ. 

ނަތީޖާ ނިކުތް ގޮތުން ސާދު ހަރީރީ އެކުލަވާލާ ސަރުކާރުގައި އެމަނިކުފާނުގެ އަމިއްލަ ބާރު ކުޑަވާނެއެވެ. 

ވަގުތީ ނަތީޖާތައް ދައްކާ ގޮތުން ލުބްނާނުގެ ޤާނޫނު ހަދާ މަޖިލީހުގެ 128 ގޮނޑީގެ ތެރެއިން 67 ގޮނޑި ކާމިޔާބުކުރީ ހިޒްބުﷲއެވެ. ބޮޑުވަޒީރު ސާދު ހަރީރީގެ ޕާޓީއަށް މީގެ 9 އަހަރު ކުރިން ބޭއްވި އިންތިޚާބުގައި 33 ގޮނޑި ލިބުނު ނަމަވެސް، މިފަހަރު ލިބުނީ އެންމެ 21 ގޮނޑިއެވެ. 

ހިޒްބުﷲ އަކީ ހުޅަނގުގެ ޤައުމުތަކުންނާއި އިސްރާއީލުން ޓެރަރިސްޓް ޖަމާޢަތެއްގެ ގޮތުގައި ބަލާ ޖަމާޢަތެކެވެ.