އިސްރާއީލުން ވެރިވެގެންފައިވާ ފަލަސްތީނުގެ ޤުދުސްގައި އެމެރިކާގެ އެމްބަސީ ހުޅުވުމަށް ބާއްވާ ރަސްމިއްޔާތަށް ވަޑައިގަންނަވާ އެމެރިކާގެ އިސް ބޭފުޅުންގެ ލިސްޓު ރިޔާސީ ގަނޑުވަރު ވައިޓް ހައުސްއިން އާއްމު ކޮށްފިއެވެ.

އިސްރާއީލުގެ ވެރިރަށް ތެލްއަވީވުގައި ހުންނަ އެމެރިކާގެ އެމްބަސީ ޤުދުސްއަށް ބަދަލުކުރުމަށް ނިންމާފައިވަނީ މިމަހުގެ 14 ވަނަ ދުވަހުއެވެ. ތެލް އަވީވުން ޤުދުސްއަށް އެމްބަސީ ބަދަލު ކުރުމަށް ނިންމީ ޤުދުސްއަކީ އިސްރާއީލުގެ ވެރިރަށުގެ ގޮތުގައި އެމެރިކާއިން މިދިޔަ ޑިސެމްބަރު މަހު ބަލައިގަތުމާއި ގުޅިގެންނެވެ. އެ ނިންމުމަކީ އެމެރިކާގެ ރައީސް ޑޮނަލްޑް ޓްރަމްޕްގެ ރިޔާސީ ވައުދުފުޅެކެވެ. 

އެމެރިކާއިން މިރަސްމިއްޔާތަށް ވަޑައިގަންނަވާ 5 ބޭފުޅުންގެ ވަފުދުގައި ހިމެނިވަޑައިގަންނަވަނީ ދަރިކަނބަލުން އިވާންކާ ޓްރަމްޕްއާއި، އިވާންކާގެ ފިރިކަލުން ޖެރަޑް ކުޝްނާގެ އިތުރުން، ޓްރެޝަރީ ސެކްރެޓަރީ ސްޓީވް މަނޫޗިން، އެމެރިކާއިން އިސްރާއީލަށް ކަނޑައަޅާފައި ހުންނަވާ ސަފީރު ޑޭވިޑް ފްރިޑްމަން އަދި ޓްރަމްޕްގެ މެދުއިރުމަތީގެ ޚާއްސަ މަންދޫބު ޖޭސަން ގްރީންބްލެޓް އެވެ. މި ރަސްމިއްޔާތުގައި ޓްރަމްޕް ބައިވެރިވެވެވަޑައެއް ނުގަންނަވާނެއެވެ. 

އެމްބަސީ ހުޅުވާ ރަސްމިއްޔާތަށް ވަޑައިގަންނަވާނެ ބޭފުޅުން ވައިޓް ހައުސްއިން އިއުލާންކުރިއިރު، އެމްބަސީއަށް ދާން އޮންނަ މަގު އަންގައިދޭ ނިޝާން ބޯޑު ޤުދުސްގެ މަގުތަކުގައި ހޯމަ ދުވަހު ވަނީ ހަރުކޮށްފައެވެ. މި ބޯޑުގައި ޢަރަބި، ޢިބްރީ އަދި އިނގިރޭސި ބަހުން 'ޔޫ.އެސް އެމްބަސީ' ޖަހާފައި ހުރެއެވެ. 

ޤުދުސްއަކީ އިސްރާއީލުން ވެރިރަށުގެ ގޮތުގައި ބެލިނަމަވެސް، އެބިމަކީ 1967ވަނަ އަހަރުގެ ހަނގުރާމައިގައި ބައިނަލްއަޤްވާމީ ޤާނޫނުތަކާއި ޚިލާފަށް އިސްރާއީލުން ހިފާފައިވާ ބިމަކަށް ވާތީ، އެމެރިކާއާއި ބައިނަލްއަޤްވާމީ މުޖްތަމައުން މީގެ ކުރިން އިސްރާއީލުގެ ވެރިރަށުގެ ގޮތުގައި ބަލަމުން އައީ ތެލްއަވީވް އެވެ. އަދި ހުރިހާ ޤައުމެއްގެ އެމްބަސީތައް ވެސް ހުރީ ތެލްއަވީވް ގައެވެ. އެހެން ނަމަވެސް މީގެ ކުރިން އަމަލުކުރަމުން އައި އުޞޫލުން ފެޔަށް ޖެހިވަޑައިގެން ޓްރަމްޕް ވަނީ މެދުއިރުމަތީގައި ސުލްހަ ޤާއިމްކުރެވޭނީ އިސްރާއީލުގެ ވެރިރަށަކީ ޤުދުސްކަމަށް ބަލައިގެންކަމަށް ވިދާޅުވެ، އެމެރިކާގެ އެމްބަސީ ބަދަލުކުރާނެކަން ހާމަކުރައްވާފައެވެ.

އެމެރިކާގެ އެމްބަސީ މިމަހުގެ 14ވަނަ ދުވަހު ޤުދުސްއަށް ބަދަލުކުރަން ނިންމިއިރު، ހޯމަ ދުވަހު އިސްރާއީލުގެ ޚާރިޖިއްޔާއިން ބުނީ މިމަހުގެ ފަހިކޮޅު ޕެރަގުއާއީގެ އެމްބަސީވެސް ޤުދުސްއަށް ބަދަލުކުރަން ނިންމާފައިވާ ކަމަށެވެ. އެހެން ނަމަވެސް ގިނަ ޤައުމުތަކުން އަދިވެސް ބުނަމުން ދަނީ އެމްބަސީ ބަދަލު ނުކުރާނެ ކަމަށެވެ.

ޤުދުސްއަކީ ޔަހޫދީންގެ އިތުރުން ނަޞާރާއިންނާއި މުސްލިމުން ވެސް މުޤައްދަސްތަނެއްގެ ގޮތުގައި ބަލާ ރަށެކެވެ. އަދި ފަލަަސްތީނުން އެޤައުމުގެ މިނިވަން ދައުލަތެއްގެ ވެރިރަށެއްގެ ގޮތުގައި ބަލަނީވެސް އިރުމަތީ ޤުދުސްއެވެ. އެމެރިކާއިން ނިންމުމާއި ގުޅިގެން ފަލަސްތީނުގެ އިތުރުން ދުނިޔޭގެ އެކި ކަންކޮޅުތަކުގައި، ޚާއްސަކޮށް މުސްލިމް ޤައުމުތަކުގައި، ވަރުގަދަ މުޒާހަރާތަކެއް ކުރިއަށް ދިޔައެވެ.