އިރާނާއި ދުނިޔޭގެ ބައެއް ބާރުތަކާ ދެމެދު ވެވުނު ނިއުކްލިއާ އެއްބަސްވުން ނެތިނުކޮށްލުމަށް ނުވަތަ އެ އެއްބަސްވުުމުގައި ދެތިބުމަށް އިނގިރޭސި ޚާރިޖީ ވަޒީރު ބޮރިސް ޖޮންސަން އެމެރިކާގެ ރައީސް ޑޮނަލްޑް ޓްރަމްޕް އަށް ގޮވާލައްވައިފިއެވެ. 

އެމެރިކާ އަށް ދަތުރުފުޅު ކުރައްވަމުން ގެންދަވާ ޖޮންސަން އެމެރިކާގެ ޓީވީ ޗެނަލެއް ކަމަށްވާ ފޮކްސް ނިއުސްގެ ފޮކްސް އެންޑް ފްރެންޑްސް ޕްރޮގްރާމްގައި ވާހަކަފުޅުދައްކަވަމުން ވިދާޅުވީ 2015 ގައި އިރާނާއެކު ވެވުނު އެއްބަސްވުމަކީ ހުރިހާ ގޮތަކުން ފުރިހަމަ އެއްބަސްވުމެއް ނޫންކަމަށެވެ. އަދި ގައުމުތަކުން "އިރާނާ މެދު ހަރުކަށިވާން ޖެހޭ ކަަމަށާއި އެ އެއްބަސްވުމުގައި ހުރި މައްސަލަތައް ހައްލުކުރަން ޖެހޭ ކަމަށެވެ." ޖޮންސަންގެ ވާހަކަފުޅުގައި އެމަނިކުފާނު ވިދާޅުވީ އިރާނާ އެކު އެއްބަސްވުމެއް ނެތްނަމަ އިރާނުން ނިއުކްލިއާ ހަތިޔާރު ތަރައްގީ ކުރާނެ ކަމަށާއި އަދި އިރާނު ހިމެނޭ ސަރަހައްދު ހަމަނުޖެހުމެއްގެތެރެއަށް ވެއްޓޭނެ ކަމަށެވެ. އިރާނާ އެކު ވެފައިވާ އެއްބަސްވުުމުގެ ދަށުން އެގައުމަށް ހިންގޭނީ މަދު ނޫނީ ލިމިޓެޑް ނިއުކްލިއާ ހަރަކާތްތަކެެކެވެ. މީގެ ރައްދުގައި އިރާނާމެދު އަޅާފައިވާ ދަތިކުރުމުގެ ފިޔަވަޅުތަކަށް ލުޔެއް ލިބިގެން ދާނެއެވެ. 

2015 ގައި އިރާނާއެކު ވެވުނު އެއްބަސްވުމުގައި ހިމެނޭ ގައުމުތަކަކީ އެމެރިކާ، ޔޫކޭ، ރަޝިއާ، ފްރާންސް، ޗައިނާ އަދި ޖަރުމަނެވެ. 

އިނގިރޭސި ޚާރިޖީ ވަޒީރު އެމެރިކާ އަށް ކުރައްވަމުން ގެންދަވާ ދަތުރުފުޅުގައި އެމެރިކާގެ ރައީސް ޑޮނަލްޑް ޓްރަމްޕް އާއި ބައްދަލު ކުރެއްވުމަށް ހަމަޖެހިފައި ނުވެއެވެ. އެހެންނަމަވެސް އެމެރިކާގެ ނައިބު ރައީސް މައިކް ޕެންސް އާއި ނެޝެނަލް ސެކިޔުރިޓީ އެޑްވައިޒަރު ޖޯން ބޮލްޓަން އާއި އަދި ކޮންގްރެސްގެ ފޮރިން ޕޮލިސީ ލީޑަރުންނާ ބައްދަލު ކުރައްވާނެއެވެ. 

އިރާނުގެ ނިއުކްލިއާ އެއްބަސްވުން އެމެރިކާގެ ރައީސް ޓްރަމްޕް ސިފަ ކުރައްވާފައި ވަނީ "މޮޔަ" އެއްޗެއްގެ ގޮތުގައެވެ. އިރާނުގެ ނިއުކްލިއާ އެއްބަސްވުމަށް އެމެރިކާ އިން އަމަލު ކުރުން މަތީ ދެމިތިބޭނެތޯ މި މެއި 12 ގެ ކުރިން ރައީސް ޓްރަމްޕް ނިންމަވާނެއެވެ.