ސަރުކާރު ވައްޓާލަން އުޅުމަށް ތުހުމަތު ކުރެވޭ ބައެއް ފަރާތްތަކަށް ރިޝްވަތު ދިން ކަމަށް ތުހުމަތު ކުރެވޭ މައްސަލައަކާ ގުޅިގެން ކުރީގެ ރައީސް މައުމޫން އަބްދުލްގައްޔޫމްގެ ދަރިކަނބަލުން ޔުމްނާ މައުމޫން، ހޯމަ ދުވަހު ފުލުހުންގެ އިދާރާއަށް ހާޒިރުވުމަށް އަންގާފައިވާ އެންގުން ފަސްކޮށް ދެއްވުމަށް އޭނާ އެދިވަޑައިގެންފި އެވެ.
އެކްޓިންގ ކޮމިޝަނަރ އޮފް ޕޮލިސް އަބްދުﷲ ނަވާޒަށް އެޑްރެސް ކުރައްވާ ޔުމްނާ ފޮނުއްވާފައިވާ ސިޓީގައި ވަނީ ހޯމަ ދުވަހު ހަވީރު 16:00އަށް ފުލުސް އޮފީހަށް ހާޒިރު ވުމަށް އަންގާފައިވާ ޗިޓް ލިބިފައިވާ ކަމަށާއި ނަމަވެސް މިވަގުތު ދަރިފުޅުގެ ކަންކަން ހަމަޖައްސަން ހުންނެވީ ހަމައެކަނި އޭނާ ކަމަށާއި ދަރިފުޅު ބެލުމަށް އިތުރު ގޮތެއް ހޯއްދަވަމުން ގެންދަވާ ކަމަށެވެ. ދޮށީ ދަރިފުޅު ހޯމަ ދުވަހުގެ ރޭ މާލެ އަންނަ ގޮތަށް ހަމަޖެހިފައިވާތީ، އަންގާރަ ދުވަހުގެ 16:00 އަށް ފުލުސް އޮފީހަށް ހާޒިރުވާންޖެހޭ ގޮތަށް ހަމަޖައްސާ ދެއްވުން އެދޭ ކަމަށް ޔުމްނާގެ އެ ސިޓީގައި ވެއެވެ.
Have requested @PoliceMv to reschedule as my father not well, my younger daughter quite on her own with her father in prison. My elder daughter is coming back tonite so will be easier for me to attend @PoliceMv tomorrow afternoon. @hrcmv @UNHumanRights pic.twitter.com/QClBmpvgJT
— Yumna Maumoon (@yumna_maumoon) May 7, 2018
ޔުމްނާ ފުލުސް އޮފީހަށް ހާޒިރުކުރަނީ ރައްޔިތުންގެ މަޖިލީހުގެ މެމްބަރުންނަށާއި ސުޕްރީމް ކޯޓުގެ ބައެއް ފަނޑިޔާރުންނަށް ރިޝްވަތުގެ ގޮތުގައި ފައިސާ ދީގެން ގާނޫނީ ގޮތުން އުފެދިފައިވާ ސަރުކާރު ބަޔަކު ރާވައިގެން ގާނޫނާ ހިލާފަށް ގާނޫނީ ވެރިކަން ވައްޓާލަން މަސައްކަތް ކުރިކަމަށް ތުހްމަތުކުރާ މައްސަލައިގައިކަން ފުލުހުން ފޮނުވާފައިވާ ޗިޓްގައިވެ އެވެ.
ޔުމްނާގެ މައްޗަށް މި ތުހްމަތުކޮށްފައިވާއިރު އޭނާގެ ބައްޕާފުޅު މައުމޫނާއި ފިރިކަލުން މުހައްމަދު ނަދީމާއި އެއްބަނޑުއެއްބަފާ ކޮއްކޯފުޅު ފާރިސް މައުމޫނުގެ މައްޗަށްވެސް އެ ފަދަ ތުހްމަތުތަކެއްކޮށްވަނީ ދައުވާ އުފުލާފަ އެވެ. އަދި އެ ބޭފުޅުން ތިއްބެވީ އުފުލާފައިވާ ޓެރަރިޒަމްގެ ދައުވާއާ ގުޅިގެން ބަންދުކޮށްފަ އެވެ.