ދައުލަތުގެ މަޤާމުތަކުގައި މިއަދު ތިބި މީހުން މަތީ ތައުލީމް ހާސިލް ކުރީ ދައުލަތުގެ ޚަރަދުގައި ކަމަށާއި، މިއަދުގެ ދަރިވަރުންނަށް ވެސް ޑިގްރީއާއި ހަމަޔަށް ދައުލަތުން ހިލޭ ކިޔަވައިދެވެން ޖެހޭނެ ކަމަށް މަޖިލީހުގެ ކުރީގެ ރައީސް އަބްދުﷲ ޝާހިދު ވިދާޅުވެއްޖެއެވެ.
އާދިއްތަ ދުވަހު ޝާހިދު ކުރެއްވި ޓުވީޓެއްގައި ވިދާޅުވީ މިސަރުކާރުގެ ކޮރަޕްޝަނާއި ވައްކަން 10 އިންސައްތަ އަށް ތިރިވިޔަސް އެކަމަށް ބޭނުންވާ ފައިސާ ބަޖެޓަށް ލިބޭނެ ކަމަށެވެ.
Dhawlathuge maqaam thakuga miadhu thibi meehun mathee thau’leem haasilkuree dhawlathge kharadhuga. Miadhuge dharivarunnahves degree aa hama ah dhawlathun hiley kiyavaidheven jeheyne. Mi sarukaaruge corruption aa vakkan 10% ah thiriviyas mikamah beynunvaa faisaa budget ah libeyne!
— Abdulla Shahid (@abdulla_shahid) May 6, 2018
ޝާހިދު މިހެން ވިދާޅުވެފައި މިވަނީ އޭލެވެލް އަދި އޯލެވެލް އިމްތިޙާނުން ރަނގަޅު ނަތީޖާ ހޯދާ ދަރިވަރުންނަށް ވެސް ސްކޮލަރޝިޕް ދިނުމުގައި މިހާރުގެ ސަރުކާރުން ގެންގުޅޭ އުޞޫލުތަކާއިމެދު ބެލެނިވެރިން ކަންބޮޑުވުން ފާޅުކުރަމުންދާ ދުވަސްވަރެއްގައެވެ.
ދައުލަތުގެ މަތީ މަޤާމުތަކުގައި ތިއްބެވި ބޭފުޅުންނަށް ރައީސް މައުމޫންގެ ސަރުކާރުގައި ހިލޭ ކިޔަވައިދީފައިވާއިރު، ފަހުން ފައިސާ ދައްކާ ގޮތަށް ވެސް ބައެއް ފަރާތްތަކަށް ކިޔަވައިދީފައިވެއެވެ. މިހާރުގެ އެޑިއުކޭޝަން މިނިސްޓަރ ޑރ. އައިޝަތު ޝިހާމާއި، ރައީސް އަބްދުﷲ ޔާމީނަކީ ވެސް ސަރުކާރުގެ ޚަރަދުގައި ކިޔަވައިވިދާޅުވެފައިވާ ބޭފުޅުންނެވެ.
ޑިގްރީއާއި ހަމަޔަށް ދައުލަތުން ހިލޭ ކިޔަވައިދެވެން ޖެހޭނެ ކަމަށް ޝާހިދު ވިދާޅުވިއިރު، ރާއްޖެ ކޮމަންވެލްތުން ވަކިވުމުން ގިނަ އަދަދެއްގެ ސްކޮލަރޝިޕް ގެއްލިގެން ދިޔަ ކަމަށް ޝާހިދު ވަނީ ކުރިން ފާހަގަ ކުރައްވާފައެވެ.
