މެސެޖިން އެޕްލިކޭޝަން، ޓެލެގްރާމް ބްލޮކްކުރުމަށް އިރާންގެ ކޯޓުން ނެރުނު އަމުރަށް އެ ޤައުމުގެ ރައީސް ހަސަން ރޫހާނީ ފާޑުވިދާޅުވެއްޖެ އެވެ.
40 މިލިއަނަށްވުރެ ގިނަ އިރާނުގެ ރައްޔިތުން ޓެލެގްރާމް ބޭނުންކުރާއިރު، އެ ޤައުމުގެ ކޯޓުން ޓެލެގްރާމް ބްލޮކްކުރުމަށް މުވާސަލާތީ ހިދުމަތްދޭ ކުންފުނިތަކަށް އަމުރުކޮށްފައިވަނީ އޭޕްރީލް މަހުގެ 30 ވަނަ ދުވަހު އެވެ. އެގޮތަށް އެ ކޯޓުން އަމުރުކޮށްފައިވަނީ ޤައުމީ ސަލާމަތަށާއި، ހުއްދަނެތި މުޒާހަރާކުރުމަށް ރޭވުމުގެ ފުރުސަތު ލިބޭކަމަށް ބުނެ އެވެ.
ކޯޓުގެ ނިންމުމަށް ފާޑުވިދާޅުވެ، ހުކުރު ދުވަހު ރޫހާނީ ކުރެއްވިި އިންސްޓަގްރާމް ޕޯސްޓެއްގައި ބުނެފައިވަނީ ޓެލެގްރާމް ބްލޮކްކުރުމަށް ޖުޑީޝަރީން ނިންމި ނިންމުމަކީ އޭނާގެ ސަރުކާރުން ތާއީދުކުރާ ނިންމުމެއް ނޫން ކަމަށެވެ. އަދި އެކަމަށް ހުއްދަދީފައިނުވާނެ ކަމަށްވެސް ރޫހާނީ ވިދާޅުވި އެވެ.
ރޫހާނީ ވިދާޅުވިގޮތުގައި ޓެލެގްރާމް ބްލޮކްކުރުމަށް ކޯޓުން ނިންމި ނިންމުމަކީ ޑިމޮކްރަސީއާއި ނުބައްދަލު ނިންމުމެއް ކަމަށެވެ. އަދި ޓެލެގްރާމް ބޭނުންކުރަނީ އާންމު ރައްޔިތުންކަމަށާއި، އެފަދައިން މުވާސަލާތީ ވަސީލަތެއް ބްލޮކްކުރާއިރު އާންމު ރައްޔިތުންގެ ބަހެއް އެކަމުގައި އޮންނަންޖެހޭނެކަމަށްވެސް ރޫހާނީ ވިދާޅުވި އެވެ.
އިރާނުގެ ޖުޑީޝަރީ ކޮންޓްރޯލްކުރަނީ އެ ޤައުމުގެ ރޫހާނީ ލީޑަރު އާޔަތުﷲ އަލީ ޚާމަނާއީ އެވެ. އެ ޤައުމުގެ އުއްތަމަ ފަނޑިޔާރުވެސް އައްޔަނުކުރައްވާފައިވަނީ އާޔަތުﷲ އަލީ ޚާމަނާއީ އެވެ.
ޓެލެގްރާމް ބްލޮކްކުރުމަށް އެ ޤައުމުގެ ކޯޓުން 30 އޭޕްރީލްގައި ނިންމި ނިންމުމަކީ އެގޮތަށް ނިންމި ފުރަތަމަ ނިންމެއް ނޫނެވެ. ނިމުނު 2017 ވަނަ އަހަރުގައި ޓެލެގްރާމް ޗެނަލްތަކުގެ ގިނަ އެޑްމިނިސްޓްރޭޓަރުންތަކެއް އިރާނުގައި ވަނީ ހައްޔަރުކޮށްފަ އެވެ. އަދި އެ މީހުންގެ މައްޗަށް ވަނީ ޖަލު ހުކުމްތައްވެސް އިއްވާފަ އެވެ.
ޓެލެގްރާމް ބްލޮކްކުރުމަށް ނިންމި ނިންމުމާއި ގުޅިގެން ހިއުމަން ރައިޓްސް ވޮޗްއިންވެސް ވަނީ ކަންބޮޑުުވުން ފާޅުކޮށްފަ އެވެ. އަދި އެއީ ހިޔާލު ފާޅުކުރުމުގެ މިނިވަންކަމަށް ހުރަސްއެޅުމުގެ ގޮތުން ކޮށްފައިވާކަމެއްކަމަށް އެ ޖަމާއަތުން ވަނީ ސިފަކޮށްފަ އެވެ.
ޓެލެގްރާމްގެ އިތުރުން، ފޭސްބުކް އަދި ޓުވިޓާރވެސް އެ ޤައުމުން ވަނީ ބްލޮކްކޮށްފަ އެވެ. ނަމަވެސް ވީޕީއެން ސޮފްޓްވެއާރތައް މެދުވެރިކޮށް އަދިވެސް އެ ޤައުމުުގެ ރައްޔިތުން އެ އެޕްލިކޭޝަންތައް ބޭނުންކޮށްހަދަ އެވެ.
