އުތުރު ކޮރެއާގެ ނިއުކްލިއަރ ޓެސްޓް ސައިޓްތައް މެއި މަހު ބަންދުކުރާނެ ކަމަށް ދެކުނު ކޮރެއާއިން ބުނެފިއެވެ.
ތަރުޖަމާނު ވިދާޅުވީ ޕުންގިޔެ-ރީ ސައިޓް ބަންދުކުރާނީ އާއްމުންނާއި ބޭރުގެ ތަޖުރިބާކާރުން އަދި ދެކުނު ކޮރެއާއާއި އެމެރިކާއަށް ވެސް ދައުވަތު ދީގެން ކަމަށެވެ.
އުތުރު ކޮރެއާގެ ލީޑަރު ކިމް ޖޮން އުންއާއި ދެކުނު ކޮރެއާގެ ރައީސް މޫން ޖެއިން އިން ހުކުރު ދުވަހު ބައްދަލުކުރައްވައި ދެ ބޭފުޅުންވަނީ ކޮރެއަން ޕެނިންސިއުލާއަކީ ނިއުކްލިއަރ ހަތިޔާރު ނެތް ސަރަހައްދަކަށް ހެދުމަށް މަސައްކަތް ކުރެއްވުމަށް އެއްބަސްވެވަޑައިގެންފައެވެ.
ރައީސް އޮފީހުގެ ތަރުޖަމާނު ޔޫން ޔަންގް-ޗަން ވިދާޅުވީ ނިއުކްލިއަރ ޓެސްޓް ސައިޓްތައް ބަންދުކުރަން މެއި މަހު ފައްޓަވާނެކަމަށް ހާމަކުރައްވާފައިވާކަމަށެވެ.
ޔޫން އިތުރަށް ވިދާޅުވީ "ބައިނަލްއަގްވާމީ މުޖުތަމައަށް ދެފުށް ފެންނާނެހެން ކުރިޔަށް ގެންދިއުމަށް ދެކުނު ކޮރެއާ އާއި އުތުރު ކޮރެއާގެ ތަޖުރިބާކާރުންނަށް ދައުވަތު އަރުވާނެކަމަށް" އުތުރު ކޮރެއާގެ ލީޑަރު ވިދާޅުވިކަމަށެވެ.
ދެކޮރެއާގެ ޓައިމް ޒޯން އެއްގޮތް ކުރާނެކަމަށް ޔޫން ވިދާޅުވިއެވެ.
މިކަންކަމާއި ބެހޭ ގޮތުން އުތުރު ކޮރެއާއިން އަދި އާއްމުކޮށް އެއްޗެއް ބުނެފައެއްނުވެއެވެ.
ޕުންގިޔެ-ރީ ސައިޓް ހުންނަނީ އިތުރު އުތުރުގެ ފަރުބަދަމަތީ ސަރަހައްދެއްގައި ކަމަށްވާއިރު މިއީ އެ ގައުމުގެ މައި ނިއުކްލިއަރ ފެސިލިޓީއެވެ.
ނިއުކްލިއަރ ޓެސްޓްތައް ހަދަމުންދަނީ މެންޓެޕް ފަރުބަދައިގެ ދަށުގައި ގާއިމްކޮށްފައިވާ އޮންނަ ޓަނަލް ނިޒާމުގެ ތެރޭގައެވެ.
އެ ސައިޓްގައި 2006 ވަނަ އަހަރުން ފެށިގެން ހަ ނިއުކްލިއަރ ޓެސްޓެއް ކޮށްފައިވާއިރު އެންމެ ފަހުން ޓެސްޓެއް ކޮށްފައިވަނީ 2017 ސެޕްޓެމްބަރުގައެވެ.
