ފަސް އަހަރު ދުވަހަށް ފުޑް ކޯޓްތައް ހިންގާނެ ބަޔަކު ހޯދުމަށް ހައުސިންގ މިނިސްޓްރީން އިއުލާނުކޮށްފިއެވެ.

ހައުސިންގ މިނިސްޓްރީން އާންމުކޮށްފައިވާ ބަޔާނުގައި ބުނެފައި ވަނީ، މާލޭ ހުޅަނގު ދެކުނުގައި ތަރައްގީ ކޮށްފައިވާ 960 އަކަފޫޓުގެ ފުޑްކޯޓް ފަސް އަހަރުގެ މުއްދަތަށް ހިންގަން ބޭނުންވާ ފަރާތްތަކުން މިމަހުގެ 21 ވަނަ ދުވަހު އެ މިނިސްޓްރީއަށް ހާޒިރުވެ މައުލޫމާތު ސާފުކުރުމަށް އެދޭ ކަމަށެވެ.

މިކަމާ ގުޅޭ ލިޔެކިޔުންތައް މަރޗު 21 އިން މަރޗު 28 އަށް ހައުސިންގ މިނިސްޓްރީގެ ކައުންޓަރުން ލިބިގެންދާނެ ކަމަށް އެ މިނިސްޓްރީން ބުނެއެވެ.

ހައުސިނގް މިނިސްޓްރީން ވަނީ ފުޑްކޯޓްތަކުގެ ތެރެއިން އަމީނީ މަގާވީ ފަޅީގައި ފުޑް ކޯޓްތައް އޭފްރީލް މަހުގައި ހުޅުވޭނެ ކަމަށާއި އިއްޒުއްދީން މަގާވީ ފަޅި، މެއި މަހު ހުޅުވޭނެ ކަން ވަނީ އިއުލާނުކޮށްފައިވާއެވެ.

ފުޑް ކޯޓްތަކުގެ މަސައްކަތް ނިންމާނެ ކަމަށް މިނިސްޓަރ ތާރީހުތަކެއް ހާމަކުރެއްވި އިރު މީގެ ކުރިން ވެސް ފުޑް ކޯޓްތައް ހުޅުވޭނޭ ކަމަށް ބުނެ ގިނަ ތާރީހުތަކެއް އެސްޓީއޯ އާއި ހައުސިންގ މިނިސްޓްރީ އިން ވަނީ ހާމަކޮށްފައެވެ.

ގާތްގަނޑަކަށް 30 ހާސް އަކަފޫޓުގެ އެ ސަރަހައްދުގައި 25 ނުވަތަ 27 ފުޑް ކޯޓް އެޅޭނެ ކަމަށް ހައުސިންގް މިނިސްޓްރީން ހާމަކޮށްފައި ވެއެވެ. ކުރިން އެ ސަރަހައްދުގައި ގާތްގަނޑަކަށް 40 ވަރަކަށް ކަޑަ ނުވަތަ ފުޑް ސްޓޯލް ހުއްޓެވެ.

ފުޑް ކޯޓްތަކުގެ މަސައްކަތް 2016 ވަނަ އަހަރުގެ ޖެނުއަރީ މަހުގައި ފެށުނު ނަމަވެސް، އެ އަހަރުގެ ޖުލައި މަހުން ފެށިގެން މަސައްކަތް ހުއްޓުމަކަށް އައެވެ. އެ މަސައްކަތް އެންމެ ފުރަތަމަ ހަވާލު ކުރެވުނީ ހަ މަސް ދުވަހުގެ ތެރޭގައި ނިންމާލުމަށެވެ.