އިދިކޮޅު ފާރާތްތައް ބުދަ ދުވަހުގެރޭގެ މުޒާހަރާ ފަށަށް ތައްޔާރުވެފައި ވަނިކޮށް ފުލުހުންނާއި ދެކޮޅަށް ބޭނުންކުރުމަށް ތައްޔާރުކޮށްފައި ހުރި 105 މިރުސް ފެން ފެކެޓް ފެނުނުކަމަށް ބުނެ ފޮޓޯއާއި އެކު ފުލުހުން ކުރި ޓްވީޓާއިއެކު ސޯޝަލް މީޑިއާގައި ފާޑުކިއުންތައް އޮއްސާލައިފިއެވެ.

ފުލުހުން ކުރި ޓްވީޓްގައި ބުނެފައިވަނީ އެތަކެތި ފެނުނީ މުޒާހަރާ ކުރަން ހަމަޖެހިފައި އޮތް ސަރަހައްދުން ކަމަށެވެ. އަދި އެތަކެތި ފެނުނުކަމަށްބުނެ، ފުލުހުން ކުރި ޓްވީޓާއި ގުޅިގެން އެތަށް ބައެއްގެ ފާޑުކިއުންތައް ފުލުހުންނަށް އަމާޒުވިއެވެ.

އެމީހުން ފާހަގަކުރި ގޮތުގައި، މިފަދަ ގޮތަކަށް އެއްވެސް އެފަދަ އާލާތެއް ބޭނުންނުކޮށް ރައްޔިތުން މުޒާހަރާ ކުރާތާ އެތައް ޒަމާނެއްވީއެވެ. އަދި މުޒާހަރާ ކުރަމުން ދާތާ އެތަކެއް ދުވަސްތައް ފާއިތުވެ ދިޔަ އިރު، މީހެއްގެ މުދަލަށް، އަދި ތަކެއްޗަކަށްވެސް އަރައި ނުގަނެ ސުލްހަވެރިކަމާއެކު މުޒާހަރާ ކުރުމަކީ އެފަރާތްތަކަށް އާ ކަމެއްވެސް ނޫނެވެ.

އޭގެ ބަދަލުގައި މިހާތަނަށްވެސް ބާރުގެ ބޭނުންކޮށް އަނިޔާލިބި، އެތަށް ބަޔަކަށް ޖިސްމާނީ ހާނިއްކަވީ ފުލުހުންގެ ފަރާތުންކަމަށް ފާޑުކީ ގިނަ ބަޔަކު ފާހަގަކުރިއެވެ.

އެގޮތުން މި ޓްވީޓާއި ގުޅިގެން ވައިކަރަދޫ ދާއިރާގެ މެންބަރު މުހައްމަދު ނާޒިމް ވިދާޅުވީ އެއީ ފުލުހުން އަމިއްލައަށް ތައްޔާރުކުރި ތަކެތި ކަމަށެވެ.

އަނެއްބަޔަކު ބުނަމުން ދިޔައީ، މި ކަމަކީ ދޫނިދޫގައި ހައްޔަރުކޮށްފައި ތިބި މީހުން ވަކީލުންނާއި ބައްދަލު ކުރާތަން "ބަގް" ކުރާގޮތަށް ކުރިކަމެއް ކަމަށެވެ. އަދި ބައެއް މީހުން މިކަން ސިފަ ކުރި ބޮޑު ޖޯކެއްގެ ގޮތުގައެވެ. ޖޫސްޕެޓީ ކޮތަޅުގައި ބަންދުކޮށްފައި ހުރި އެތަކެއްޗާއި ގުޅޭގޮތުން ފާޑުކީ އެކަކު ބުނެފައިވަނީ، އެއްޗެހި ޕެކްކޮށް ހެދުމަކީ ސަރުކާރަށް ނިސްބަތްވާ ބޭފުޅުން ވަރަށް ފަރިތަކަމާއެކު ކުރައްވާކަމެއްކަަމަށެވެ.

އަނެއްބަޔަކު ބުނަމުން ދިޔައީ މިކަމަކީ، ކުރީގެ ޑިފެންސް މިނިސްޓަރު ކާނަލް މުހައްމަދު ނާޒިމްގެ ގެކޮޅުގައި ފިސްތޯލައެއް ޕްލާންޓް ކުރިގޮތަށް މުޒާހަރާގެ ބައިވެރިން ފްރޭމް ކުރުމަށް ބަޔަކު ރޭވި ރޭވުމެއް ކަމަށެވެ. ފުލުހުންނާއި ދެކޮޅަށް ބޭނުންކުރުމަށް ހަދާފައި ހުރި އެއްޗެއްތޯ އެތަކެތީގައި ލިޔެފައި އޮތީތޯވެސް އެއް ބަޔަކު ވަނީ ސުވާލު އުފައްދާފައެވެ. ފާޑުކީ ބައެއް ފަރާތްތަކުން ބުނެފައިވަނީ، އެގޮތަށް އިދިކޮޅު ފަރާތްތަކުން މާޒީގައި ކުރި މުޒާހަރާތަކުން ތަފާތު އެކި ޒާތްޒާތުގެ ތަކެތި ހޯދުމަކީ ފުލުހުން ކުރާކަމެއްކަމަށެވެ.

"ޕެންޑްރައިވް، ފިސްތޯލަ، ކަޅުފޮށި، ކޮންޑަމް، ކިތާބީ ހެކި، ދެން މިހާރު މިރުސް ޕެކެޓް. ތިވާހަކަތައް އަޑުއަހާ ބަޔަކު މިހާރަކު ނޫޅޭ" ފުލުހުންގެ ޓްވީޓަށް ރައްދު ދެމުން މީހަކު ބުުފައިވެއެވެ.

ގިނަ ބަޔަކު ފާހަގަކުރި ގޮތުގައި މީގެ ކުރިން ކުރެވުނު ބޮޑެތި މުޒާހަރާތަކުގައިވެސް އާއްމު ރައްޔިތުން ފުލުހުންނާއި ކުރިމަތިލައި އެފަދަ އެއްވެސް އެއްޗެއް ބޭނުންކޮށްފައި ނުވާއިރު މިހާރު ބޭނުން ކުރަންވީ ބޭނުމެއް ނެތެވެ. އަދި ހަތިޔާރެއްފަދަ އެއްވެސް އާލާތެއް ނެތި މުޒާހަރާ ކުރަމުންދާ އާއްމު ރައްޔިތުންގެ ގަޔަށް ބޮލަށް އަރައި ޕެޕާސްޕްރޭ ޖަހަ ޖިސްމާނީ އަނިޔާ މިހާތަނަށްވެސް ލިބިފައި ހުރި ފުލުހުންގެ ފަރާތުންނެވެ.

ފުލުހުން ބުނެފައިވަނީ، ޖޫސްޕެޓީ ކޮތަޅުގައި ބަންދުކޮަށްފައި ހުރީ، މިރުސްފެން ކަމަށެވެ. އަދި ބުދަދުވަހުގެރޭގެ މުޒާހަރާގައި ފުލުހެއްގެ ގަޔަށް މުޒާހަރާގެ ބައިވެރިއަކު ކަޅުތެޔޮ ޖަހާފައިވާ ކަމަށާއި، އެމީހާ ހައްޔަރުވެސް ކޮށްފައިވާ ކަމަށެވެ. ބުދަދުވަހުގެރޭ މަޖީދީ މަގާއި ޗާނަދަނީ މަގާއި ގުޅޭ ހަތަރު އަނގޮޅި ކަންމަތީގައި އިދިކޮޅު ޕާޓީތަކުން ކުރި މުޒާހަރާގައި ފުލުހުން ބާރުގެ ބޭނުންކޮށް، ޕެޕަރ ސްޕްރޭ ޖެހުމުގެ ސަބަބުން އަނިޔާވި އެތަށް ބަޔަކަށް ވަނީ ހޮސްޕިޓަލް ތަކުން ފަރުވާ ދީފައެވެ. މަގުމަތިން މީހުންގެ ގަޔަށް ޕެޕަރސްޕްރޭ ޖެހުމުގެ އިތުރުން ބުދަދުވަހުގެރޭ ފުލުހުންގެ ބަޔަކު ވަނީ މުޒާހަރާ ކުރިއަށްދިޔަ ސަރަޙައްދުގައި ހުރި ގެއަކަށްވަދެ އެގޭގައި ތިބި މީހުންގެ ގަޔަށްވެސް ޕެޕަރ ސްޕްރޭ ޖަހާފައެވެ. އަދި ބައެއް މީހުންނަށް ޖިސްމާނީ ބޮޑެތި އަނިޔާތައް ލިބުނު އިރު، މުޒާހަރާގެ ބައެއް ބައިވެރިންނާއި އިދިކޮޅު ކޯލިޝަނުގެ ބައެއް މެންބަރުންވަނީ ހައްޔަރުކޮށްފައެެވެ.

މީގެ ކުރިންވެސް ފުލުހުން ވަނީ އެކި ފަހަރުމަތިން މި ފަދަ އެކި ތަކެތި މުޒާހަރާ ކުރާ ސަރަޙައްދުން ފެނުނު ކަމަށާއި، އެތަކެއްޗަކީ ފުލުހުންނަށް ހަމަލާ ދިނުމަށް، ނުވަތަ ހަމަނުޖެހުން އުފެއްދުމަށް ބޭނުންކުރަން ތައްޔާރުކޮށްފައިވާ ތަކެތި ކަމަށް ބުނެފައިވެއެވެ. އެގޮތުން ފުލުހުން "ހޯދާފައިވާ" ބައެއް ތަކެތީގެ ތެރޭގައި ފެން ހުސްކުރި ބިއްލޫރި ފުޅިއާއި، ޕޭވްމަންޓް ގަލާއި، އާޓިފިޝަލް ބީޗު ތެރޭގައި ހުރި ދަގަނޑު ބެންޗު ފަދަ ތަކެތި ހިމެނެއެވެ.