ރަޝިޔާގެ ވެރިރަށް މޮސްކޯގައި މިހާރު ކުރިއަށްދާ މޮސްކޯ އިންޓަރނޭޝަނަލް ޓްރެވަލް އެންޑް ޓުއަރިޒަމް ފެއަރގައި ރާއްޖެއަށް ޓްރެވަލް އެޖެންޓުންގެ ޝައުޤުވެރިކަމެއް ނެތްކަމަށް ދިވެހި ޓްރެވަލް އެޖެންޓުން ބުނެފިއެވެ.
ކުއްލި ނުރައްކަލުގެ ޙާލަތު އިއުލާންކޮށްފައި އޮތުމުގެ ސަބަބުން ޖަރުމަނުގެ ބަރލިންގައި އޮތް ދުނިޔޭގެ އެންމެ ބޮޑު ޓްރެވަލް ފެއަރކަމަށްވާ އައިޓީބީގައި ރާއްޖެއަށް ބޭރުގެ ޓްރެވަލް އެޖެންޓުންގެ ޝައުޤުވެރިކަން ކުޑަވެފައިވަނިކޮށް ރަޝިޔާއިންވެސް މިފަހަރު ލިބޭ ތަރުހީބު ފިނިވުމުން ފަތުރުވެރިކަމުގެ ދާއިރާގެ ފަރާތްތައް ތިބީ ކަންބޮޑުވެފައެވެ.
ރާއްޖޭގެ އެންމެ ބޮޑު އެއް ޓްރެވަލް އެޖެންޓް، ޔޫސުފް ރިފްޢަތު ކުރެއްވި ޓްވީޓެއްގައި ވިދާޅުވީ އައިޓީބީ ފެއަރއެކޭ އެއްފަދައިން މޮސްކޯ ފެއަރގައިވެސް ޓްރެވަލް އެޖެންޓުން ރާއްޖެއާއިމެދު ޝައުޤުވެރިކަމެއް ނެތްކަމަށެވެ. އަދި މިހާރު އިއުލާންކޮށްފައިވާ ކުއްލި ނުރައްކަލުގެ ޙާލަތުގެ ސަބަބުން ރާއްޖޭގެ އިޤްތިޞާދަށާއި ރާއްޖޭގެ ނަމަށް އެކަމުގެ ނޭދެވޭ އަސަރު ކުރަމުންދާކަމަށާއި، ލަސްކުރުމެއް ނެތި ކުއްލި ނުރައްކަލުގެ ޙާލަތު އުވާލަން ޖެހޭކަމަށެވެ.
Just as in ITB Berlin, here in Moscow Fair travel agents are not interested in #Maldives and very few are visiting here The #stateofemergency must be lifted without further delay. It has already damaged the economy and the image of the Maldives immensely, #SOE is ridiculous! pic.twitter.com/wUuuwdE8Fn
— Yoosuf Riffath (@YRiffath) March 13, 2018
ފެބްރުއަރީ މަހުގެ 5 ވަނަ ދުވަހުން ފެށިގެން ރާއްޖޭގައި ކުއްލި ނުރައްކަލުގެ ޙާލަތު އިއުލާންކުރުމާއިއެކު ރާއްޖެއަށް ފަތުރުވެރިން އަންނަ ބޮޑެތި މާކެޓްތަކުން ރާއްޖެއަށް ނައުމަށް އެޤައުމުތަކުގެ ރައްޔިތުންނަށް އަންގައި، ޓްރެވަލް އެޑްވައިޒަރީތައް ނެރުނެވެ. އެއާއިއެކު ގިނަ އަދަދެއްގެ ބުކިންގތަކެއް ކެންސަލްވަމުންދާކަމަށް ރިސޯޓްތަކުންނާއި ގެސްޓްހައުސްތަކުން ގެންދަނީ ބުނަމުންނެވެ.
ކުއްލި ނުރައްކަލުގެ ޙާލަތާއިއެކު ފަތުރުވެރިކަމުގެ ދާއިރާއަށް ބޮޑެތި ގެއްލުންތަކެއް ލިބި، ރިސޯޓްތަކުންވެސް ދަނީ ބޮޑެތި ޑިސްކައުންޓްތަކެއް ދެމުންނެވެ. ސަރުކާރުން ރާއްޖޭގެ މަސްރަހު ރަނގަޅުކަމަށް ދައްކަން މަސައްކަތް ކުރިނަމަވެސް، ބޭރު ދުނިޔޭގެ ކުރިމަތީގައި ރަނގަޅު ތަސައްވަރެއް ދެއްކިފައި ނެތުމުގެ ސަބަބުން، ޖުމްލަކޮށް މުޅި އަހަރު މިކަމުގެ ނޭދެވޭ އަސަރުކުރާނެކަން ފަތުރުވެރިކަމުގެ ދާއިރާގެ ތަޖުރިބާކާރުން ފާހަގަކުރައްވައެވެ.
