މި އަހަރުގެ މޭ މަހު ބާއްވަން ހަމަޖެހިފައިވާ އިނގިރޭސިވިލާތުގެ ޕްރިންސް ހެރީ އާއި ހޮލޯވުޑްގެ ތަރި މޭގަން މާކަލްގެ ކައިވެނީގެ ހަފްލާގައި، ދުނިޔޭގެ މަޝްހޫރު އަންހެން ގްރޫޕެއް ކަމަށްވާ ސްޕައިސް ގަރލްސްގެ ޕަރފޯމް ކުރާ ވާހަކަ އެ ގްރޫޕްގެ މެމްބަރަކު ދޮގުކޮށްފިއެވެ.
އަންގާރަ ދުވަހު ލަންޑަންގައި އޮތް ހަފްލާއެއްގައި ވާހަކަ ދައްކަމުން ގްރޫޕްގެ މެމްބަރެއް ކަމަށްވާ މެލް ސީ، ނުވަތަ ސްޕޯޓީ ސްޕައިސް ބުނީ، "އަދި ދައުވަތެއް މެއިލްއަކަށް ނާދޭ" ކަމަށެވެ.
މެލް ސީ މިހެން ބުނެފައި މިވަނީ "ސަޕްއިސް ގަރލްސް"އަށް ރޯޔަލް ވެޑިންގ އަށް ދައުވަތު ލިބިފައި ވާކަމަށް ގްރޫޕްގެ އެހެން މެމްބަރެއް ކަމަށްވާ މެލް ބީ ބުނިތާ ދުވަސްކޮޅެއް ފަހުންނެވެ. ނިމިގެން ދިޔަ ހަފްތާގައި އެމެރިކާގެ ޓޯކް ޝޯވއެއް ކަމަށްވާ "ދަ ރިއަލް"ގައި ވާހަކަ ދައްކަމުން މެލް ބީ ވަނީ ހެރީ އާއި މޭގަންގެ ކައިވެނީގެ ހަފްލާގައި ސްޕައިސް ގަރލްސްއަށް ޕަރފޯމް ކުރަން ފުރުސަތު ލިބިފައިވާކަން ދޭހަވާ ގޮތަށް ވާހަކަ ދައްކާފައެވެ. ނަމަވެސް ސީދާ އެހެން ބުނެފައެއް ނުވެއެވެ.
"އަދި މެއިލްއެއް ނުލިބޭ، ސްނޯއާ ހެދީ ތާށިވީ ކަމަށް ވާނީ،" މެލް ސީ ބުނެފައި ވެއެވެ.
މީގެ އިތުރުން މެލް ސީ ބުނީ މެެލް ބީ ބުނި ޖޯކެއް މީޑިއާގައި މާ ބޮޑު ކުރެވުނީ ކަމަށް ގަބޫލު ކުރާ ކަމަށެވެ.
އަދި، ދަ ސަންއަށް ދީފައިވާ އިންޓަވިއުއެއްގައި މެލް ސީ ބުނީ، ހެރީ އާއި މޭގަންގެ ކައިވެންޏަށް ގްރޫޕް ދާން ޕްލޭން ކޮށްފައި ނުވާނެ ކަމަށާއި، މި އަހަރުގެ ތެރޭގައި ސްޕައިސް ގަރލްސް ސްޓޭޖް މަތިން ފެނިގެންދާނެ ކަމަށް ގަބޫލު ނުކުރާ ކަމަށެވެ.
"އެެންމެން ވެސް ވަރަށް ބިޒީ، އެއްކޮށް ކަމެއް ކުރެވޭނެ ކަމެއް ނޭނގޭ، ހަމަ ގައިމު ވެސް މިއީ އެވަގުތެއް ނޫން،" މެލް ސީ ބުންޏެވެ.
