އެމެރިކާގެ ކުރީގެ ރައީސް ބަރަކް އޮބާމާގެ އަނބިކަނބަލުން މިޝެލް އޮބާމާގެ ބައޮގްރަފީ އަންނަ ނޮވެމްބަރު މަހު ނެރޭ ގޮތަށް ހަމަޖެހިއްޖެއެވެ.
މިޝެލްގެ އިންސްޓަގްރާމުގައި ހާމަކުރައްވާފައިވާ ގޮތުގައި މި ފޮތް ނެރޭނީ އަންނަ ނޮވެމްބަރު މަހުގެ 13 ވަނަ ދުވަހުއެވެ. މިޝެލް ހާމަކުރެއްވި ގޮތުގައި "ބިކަމިން"ގައި އެކަމަނާގެ އަމިއްލަ ތަޖުރިބާ ހިއްސާ ކުރައްވާފައި ވާނެއެވެ. އެ ފޮތުގައި އެކަމަނާ އެންމެ ކުޑައިރުއްސުރެ އެމެރިކާގެ ޝިކާގޯއަށް ވަޑައިގެން ކުރެއްވި ދިގު ދަތުރުގެ ވާހަކަ އާއި އެހެން މީހުން ބާރުވެރިކުރުވުމަށް އެކަމަނާ ކުރެއްވި މަސައްކަތް ފޮތުގައި ހިމަނުއްވާފައި ވާނެ ކަމަށް މިޝެލްގެ އިންސްޓްގްރާމުގައި ވަނީ ވިދާޅުވެފައެވެ. އަދި އެ ވާހަކަތައް ހިއްސާކުރެއްވުމަށް ކެތްމަދުވެފައި ހުންނެވި ކަމަށް މިޝެލް ވަނީ ވިދާޅުވެފައެވެ.
މިޝެލްގެ ބިކަމިން 24 ބަހަކުން ލިބެންހުންނާނެއެވެ. މި ފޮތް ނެރެނީ ޕެންގްއިން ރެންޑަމް ހައުސްއާ ގުޅިގެންނެވެ.
އެމެރިކާގެ ތާރީޚުގައި ފެނިގެންދިޔަ ފުރަތަމަ އެފްރިކަން- އެމެރިކަން ފަސްޓް ލޭޑީ މިޝެލްއާ ބެހޭ ގޮތުން އޭނާގެ ފިރިކަލުން އަދި އެމެރިކާގެ ކުރީގެ ރައީސް ބަރަކް އޮބާމާ ވިދާޅުވެފައި ވަނީ މިޝެލްއަކީ ހިތްވަރުގަދަ އަންހެނެއް ކަމަށާއި މުޅި އެމެރިކާ މިޝެލްއަށްޓަކައި ފަޚުރުވެރި ވާކަމަށެވެ. މިޝެލްވެފައި ވަނީ އެމެރިކާގެ ފަސްޓްލޭޑީންގެ ތެރެއިން ގިނަ ބައެއްގެ ލޯބި ލިބިވަޑައިގެންފައިވާ ފަސްޓްލޭޑީއަކަށެވެ.
