ޖެނުއަރީ މަހުގެ 25 ވަނަ ދުވަހު ރިލީޒްކުރި ބޮލީވުޑްގެ ފިލްމު ޕަދްމާވަތަށް 500 އަށް ވުރެ ގިނަ ކުރޯރް ރުޕީސް ލިބިއްޖެއެވެ.

މިފިލްމަށް މިހާތަނަށް ލިބިފައިވަނީ 564 ކުރޯރް އިންޑިއަން ރުޕީސްއެވެ. އެހެންކަމުން މިދިޔަ އަހަރު އެޅުވި ސަލްމާންޚާންގެ ކާމިޔާބު ފިލްމު 'ޓައިގަރ ޒިންދާހޭ' އަށްވުރެ ޕަދްމާވަތަށް ލިބުނު އާމްދަނީ ވަނީ ބޮޑުވެފައެވެ. ޓައިގާ ޒިންދާހޭއަށް ލިބިފައިވަނީ 262 ކުރޯރް އިންޑިއަން ރުޕީސްއެވެ.
ޕަދްމާވަތުގެ ކާމިޔާބީއާއި އެކު އެފިލްމު ވަނީ މުޅިދުނިޔެއިން މިހާތަނަށް އެންމެ ބޮޑު އާމްދަނީއެއް ލިބުނު ހަތް ފިލްމުގެ ތެރޭގައި ހިމެނިފައެވެ. އަދިވެސް މި ފިލްމަށް ލިބޭ ތަރުހީބު ބޮޑުވެގެންދާއިރު ކުރިއަށް އޮތްތަނުގައި ފިލްމަށް ލިބޭ ކާމިޔާބު ބޮޑު ވާނެކަމަށް ވަނީ ބެލެވިފައެވެ.

މިހާތަނަށް އިންޑިއާގައި އުފެއްދި އެންމެ އަގުބޮޑު ފިލްމު ކަމަށްވާ ޕަދްމާވަތު އުފައްދަން 200 ކުރޯޑް އިންޑިއަން ރުޕީސް (31 މިލިއަން ޑޮލަރު) ވަނީ ހޭދަކޮށްފައެވެ. މި ފިލްމުގައި ދައްކައިދެނީ 14 ވަނަ ގަރުނުގައި އުޅުނު ހިންދޫ ރާނީއެއް ހާސިލްކުރުމަށް މުސްލިމް ރަސްކަލެއް ކަމަށްވާ އަލާއުއްދީން ޚިލްޖީ ހިންގާ ކަންތައްތަކެއްގެ ވާހަކައެވެ. ފިލްމުގެ ލީޑްރޯލް ކުޅެފައި ވަނީ ބޮލީވުޑްގެ ތަރި ދީޕިކާ ޕަދުކޯން އާއި ޝާހިދު ކަޕޫރު އަދި ރަންވީރު ސިންގހެވެ.