ޓްރީ ޓޮޕް ހޮސްޕިޓަލުގެ މަސައްކަތް 2015 ވަނަ އަހަރުގައި ފެށިގެން ދިއަ އިރު އެ މަސައްކަތް ކުރުމުގައި އެންމެ އިސްކޮށް ހަރަކާތްތެރިވީ ފަރާތްތަކުން ފާހަގަކުރި އެއް ކަމަކީ ރާއްޖޭގެ ސިއްހީ ނިޒާމުގެ ތެރެއިން މިހާރު ދެމުން ނުދާ ހިދުމަތްތަކެއް ފޯރުކޮށްދީ ރާއްޖެއިން ބޭރަށް ގޮސް ދިވެހިން ސިއްހީ ހިދުމަތް ހޯދުމަށް ކުރާ މަސައްކަތަށް ނިމުމެއް ގެނައުމަށެވެ.

ޓްރީ ޓޮޕް ހޮސްޕިޓަލްގެ އިންވެސްޓްގައި ހިއްސާވަނީ ޗަމްޕާ ހުސެއިން އަފީފާއި، ޗަމްޕާ މުހައްމަދު މޫސާ އާއި އަހުމަދު ނަޒީރާއި އަހުމަދު ސަލީމް (ގަދަގޭ ސަލީމް)، އިބްރާހިމް ނޫރައްދީނާއި އަބްދުލްޣަނީ އަދި ސަލީމްގެ ދަރިކަލުން އާދަމް ސަލީމް (އެޑަމް) ގެ އިތުރުން ޑރ. އިބްރާހިމް ވިޝާން އަދި ލާސް ޕީޓާއެވެ.

 މި ހޮސްޕިޓަލުގެ މަސައްކަތަށް 110 މިލިއަން ޑޮލަރު ހަރަދުވެފައިވެއެވެ.

މި ހޮސްޕިޓަލުގެ ހިދުމަތްތައް މާރޗް 1 އިން ފެށިގެން ލިބިގެންދާ އިރު ގިނަ ހިދުމަތްތަކެއް އަންނަނީ ދެމުންނެވެ. އެގޮތުން ޑައިލިސިސް ސެންޓަރަކާއި އޮން ކޮލޮޖީ ނުވަތަ ކެންސަރުގެ ބައްޔަށް ފަރުވާ ދިނުމަށްޓަކައި ކީމޯތެރަޕީގެ ހިދުމަތާއި ހިތުގެ ބަލިތަކުގެ އޮޕަރޭޝަންތަކާއި ނާރުގެ ބަލިތަކަށް ހާއްސަ ހިދުމަތްތައް ވެސް ހިމެނެ އެވެ. މީގެ އިތުރަށް އާންމުކޮށް ހޮސްޕިޓަލުތަކުން ލިބޭ ހިދުމަތްތަކުގެ އިތުރަށް ސްޕީޗް ތެރަޕީއާއި އޮކިއުޕޭޝަނަލް ތެރަޕީ އާއި ބްލަޑް ބޭންކެއް ވެސް ވަނީ ގާއިމްކޮށްފައެވެ.

މާރޗު މަހުގައި އެ ހޮސްޕިޓަލުން ފޯރުކޮށްދޭ ގިނަ ހިދުމަތްތަކެއް ފަށާ އިރު އަންނަ ޖޫން މަހުގެ ނިއަލަށް ހޮސްޕިޓަލުން ފޯރުކޮށްދޭ ހުރިހާ ހިދުމަތްތަކެއް ފޯރުކޮށްދެވެން ފެށޭނެ ކަމަށް އެ ހޮސްޕިޓަލުން ބުނެއެވެ.

ފަސް ބުރީގެ އެ ހޮސްޕިޓަލުގައި އެކްސިޑެންޓްތަކާއި އެމަރޖެންސީ ހިދުމަތްތަކަށް ހާއްސަ ޓްރައޭޖެއް ވަނީ ގާއިމްކޮށްފައިވެއެވެ. ރާއްޖޭގައި ފުރަތަމަ ގާއިމްކުރާ ޕްރައިވެޓް ޓަރޝަރީ ހޮސްޕިޓަލުގައި 210 އެނދު ގާއިމް ކުރެވިފައިވާ އިރު އެ ހޮސްޕިޓަލުގެ ހިދުމަތްތަކަކީ މެލޭޝިއާގެ ސިމް ޑާބީ ހެލްތްކެއަރ އާއި އޮސްޓްރެއިލިއަރގެ ރަމްސީ ހެލްތްކެއަރއާ ގުޅިގެން ހިދުމަތްތައް ފޯރުކޮށްދިނުމަށް ވަނީ ހަމަޖެހިފައެވެ.

ހިދުމަތްތަކުގެ އިތުރުން ޓްރީ ޓޮޕް ހޮސްޕިޓަލް އިމާރާތްކުރެވިފައިވާ ގޮތަކީ ވެސް ފާހަގަ ކޮށްލެވޭ ކަމެކެވެ. އެގޮތުން ފުރަތަމަ ބުރިއަށް އެރުމަށް ދެ އެސްކަލޭޓަރު ހުރި އިރު ރެސްޓައުރެންޓެއް ވެސް ވަނީ ގާއިމް ކުރެވިފައެވެ.

ސިޓީ ސްކޭނާއި އެމްއާރްއައި ސްކޭންގެ ހިދުމަތާއި އެކްސްރޭ ފަދަ ހިދުމަތްތައް ހޯދާ ފަރާތްތަކަށް ޓްރީ ޓޮޕްގެ ފިލްމްލެސް ޕޮލިސީގެ ތެރެއިން ހާޑް ކޮޕީގެ ބަދަލުގައި ލިބިގެންދާނީ ސީޑީތަކުގައި ސޮފްޓް ކޮޕީ އެވެ. މީގެ އިތުރުން އަމިއްލައަށް ހޮސްޕިޓަލަށް ގޮސް އެމީހެއްގެ މައުލޫމާތެއް ރަޖިސްޓަރ ކޮށްލުމުގެ ހިދުމަތް ވެސް ވަނީ ގާއިމް ކުރެވިފައެވެ.

ހޮސްޕިޓަލުގައި ރޫމްތައް ތަފާތު ކެޓަގަރީތަކަށް ވަނީ ބެހިފަ އެވެ. އެގޮތުން 30 ސުޕީރިއަރ ރޫމް އާއި 36 ޑިލަކްސް ރޫމް އާއި 8 ޖޫނިއަރ ސޫޓްސް އާއި 2 ވީއައިޕީ ސޫޓްސް އިތުރުން 2 ޕްރެސިޑެންޝިއަލް ސޫޓްސް ހިމެނޭ ކަން ފާހަގަކޮށްލެވެއެވެ.

ހޮސްޕިޓަލުގައި ހިދުމަތް ހޯދައްވާ ހުރިހާ ޕޭޝަންޓުންނަށް ކެއުމަށް ބޭނުންވާ ތަކެއްޗާއި ބޭސް ލިބިގެންދާނީ ހޮސްޕިޓަލުގެ ބެލުމުގެ ދަށުންނެވެ.

އެޕޮއިންޓްމެން ހެއްދުމުގެ ފުރުސަތު މިހާރު ވެސް ހުޅުވިފައިވާ އިރު އެ ހޮސްޕިޓަލުން އާސަންދަ އާއި އެލައިޑް އަދި އަމާނާ ތަކާފުލްގެ އިންޝިއުރެންސް ސްކީމުގެ ތެރެއިން ވެސް ހިދުމަތް ލިބިގެންދާނެއެވެ.

 ޑޮކްޓަރުންނަށް ބަލާ އިރު ދުނިޔޭގެ އެކި ގައުމުތަކަށް ނިސްބަތްވާ އިރު ދިވެހި ރާއްޖޭގެ އިތުރުން އޮސްޓްރިއާ، އިޓަލީ، ފިލިޕީންސް، ޕާކިސްތާން، ފްރާންސް، އިނގިރޭސިވިލާތް، ސްވިޑެން، ސްޕެއިން، ޑެންމާކް، ގްރީސް، ހޮލެންޑް، ތުރުކީ އާއި ޖަރުމަރުވިލާތާއި ކޮލަމްބިއާ އާއި ސައުތް އެފްރިކާގެ ޑޮކްޓަރުން ހަރަކާތްތެރިވުމަކީވެސް މި ހޮސްޕިޓަލުގެ ތަފާތު ކަމެކެވެ.

ހޮސްޕިޓަލުގައި 80 އަށް ވުރެ ގިނަ ޑޮކްޓަރުން ހަރަކާތްތެރިވުމަށް ނިންމާފައިވާ އިރު 150 އަށް ވުރެ ނަރުހުން ހަރަކާތްތެރިވެ އެވެ. ހޮސްޕިޓަލުން 45 ތަފާތު ހިދުމަތެއް ފޯރުކޮށްދޭ އިރު އެންމެ ބޮޑަށް ހާއްސަ ވެގެންދާނީ ހިތުގެ ބަލިތަކުގެ ފަރުވާތަކަށް ކަމަށް  އެ ހޮސްޕިޓަލުގެ ޑައިރެކްޓަރ މެޑިކަލް ސަރވިސަސް ޑރ ރޮލެންޑް ފަސޯލް ވިދާޅުވިއެވެ.

އެ ހޮސްޕިޓަލުގެ ޑިރެކްޓަރ ހުސައިން އަފީފު ވިދާޅުވީ، މި ހޮސްޕިޓަލުގެ ސަބަބުން ދިވެހި ސިއްހީ ހިދުމަތްތައް އިތުރު ލެވެލްއަކަށް ދާނެ ކަމަށް ގަބޫލު ކުރާ ކަމަށާއި ކުރިއަށް އޮތް ތަނުގައި ބޭނުންވަނީ ރާއްޖޭގެ ސިއްހީ ދާއިރާގެ ހިންގުމުގައި އެންމެ އިސްކޮށް ދިވެހި ޑިކްޓަރުން ހަރަކާތްތެރިވުމަށް ކަމަށެވެ. އަދި އެކަން ހަގީގަތަކަށް ހެދުމަށް އެ ހޮސްޕިޓަލުން މަސައްކަތް ކުރައްވާނެ ކަމަށް އޭނާ ވިދާޅުވި އެވެ.

ހަމަގައިމު ވެސް އެ ހޮސްޕިޓަލު ވެގެންދާނީ ދުނިޔޭގެ ފެންވަރުގެ ހިދުމަތްތައް ރާއްޖެއިން ލިބިގެންދާނެ ފުރަތަމަ ހޮސްޕިޓަލަށެވެ. ޓްރީ ޓޮޕް ހޮސްޕިޓަލް ވެގެންދާނީ ސިއްހީ އާ ހިދުމަތްތަކުގެ ސަބަބުން ރާއްޖޭގެ މުޅި ސިއްހީ ނިޒާމަށް ބޮޑު ބަދަލެއް ގެންނާނެ އެވެ.