މަޝްހޫރު ބޮޑުބެރު ގްރޫޕެއް ކަމަށްވާ ރާޅުގަނޑުގެ މިއުޒިކް ބޭންޑް ޕަރޭޒް (ޕަރޭޒް ބައި ރާޅުގަނޑު) ގެ ފުރަތަމަ ވީޑިއޯ ލަވަ އާދިއްތަ ދުވަހު ނެރޭ ގޮތަށް ހަމަޖެހިފައިވާ ކަމަށް އެ ބޭންޑްގެ ބާނީ ހައްމާދު ރަޝީދު (ހަމްޕު) ބުނެފިއެވެ.

ރާއްޖެއެމްވީއަށް ހަމްޕު ބުނީ އާދިއްތަ ދުވަހު ހެނދުނު 8:00 ގައި ޔޫޓިއުބް މެދުވެރިކޮށް އެ ލަވަ ރިލީޒްކުރާނެ ކަމަށެވެ. މިއީ 100 ޕަސެންޓް އަމިއްލަ ލަވައެއް ކަމަށް ހަމްޕު ބުންޏެވެ.

ޕަރޭޒް ބައި ރާޅުގަނޑުގެ "ޖާދުވީ މާ" ލަވަ އާދިއްތަ ދުވަހު ނެރޭ ގޮތަށް ހަމަޖެހިފައިވާއިރު ހަމްޕު ބުނީ މި ލަވަ ކިޔާފައިވަނީ އެ ބޭންޑްގެ މެންބަރު އައްފާނު ކަމަށެވެ. މިލަވައިން ފެނިގެންދަނީ މޮޑެލްއެއް ކަމަށްވާ ފާތުމަތު ޒަޔަން (ކައިޒީން) އެވެ. އަދި މީގެ އިތުރުން ލަވައިގެ އެކްޓަރުންގެ ގޮތުގައި ފެނިގެންދަނީ ރާޅުގަނޑަށް ނިސްބަތްވާ ދެކުދިންކަމަށް ހަމްޕު ބުންޏެވެ.

ހަމްޕު ބުނީ މި ލަވައިގެ މެސެޖަކީ ތިމާ ބޭނުންވާހާ އެއްޗެއް ހޯދަން އުޅުމަކީ ބަދުނާމުވެ ބޭޒާރު ވާނެކަމެއް ކަމަށެވެ.

އަދި މީގެ އިތުރުން ވެސް އެ ބޭންޑުން އިތުރު ލަވަތައް މުޖުތަމައަށް ގެނެސްދޭނެ ކަމަށާއި އަދިވެސް ކުރިއަށް ލަވަތައް އެބަހުރި ކަމަށް އޭނާ ބުންޏެވެ.

ރާޅުގަނޑުގެ ނަމުގައި މިއުޒިކް ކަލެކްޓިވްއެއް ވުޖޫދަށް އައިސްފައިވާތާ 9 އަހަރު ފުރިފައިވާއިރު އެކަލެކްޓިވްގެ ދަށުން 3 ބޭންޑް މިހާރު ވަނީ އުފައްދާފައެވެ.