ބޭންކް އޮފް މޯލްޑިވްސް އިން އައްޑޫގައި ކުރަމުންދާ އިންވެސްޓްމަންޓް އިތުރަށް ފުޅާކުރުމުގެ ގޮތުން ގަން އިންޓަރނޭޝަނަލް އެއަރޕޯޓާއި ހިތަދޫ ރީޖަނަލް ހޮސްޕިޓަލްގައި ދެ އޭޓީއެމް ގާއިމްކޮށްފިއެވެ.

ބީއެމއެލުން ބުނީ، މި އޭޓީއެމްތައް ގާއިމްކޮށްފައިވަނީ މުޅި ރާއްޖެއަށް ބޭންކިންގެ ޚިދުމަތް ފޯރުކޮށްދިނުމަށް ބޭންކުން ކުރިއަށް ގެންދާ 300 މިލިއަން ރުފިޔާގެ އިންވެސްޓްމަންޓް ޕްރޮގްރާމްގެ ދަށުންކަމަށެވެ. މި ދެ އޭޓީއެމް ގާއިމްކޮށްފައިވަނީ އައްޑޫ ސިޓީގެ ގިނަ ރައްޔިތުންތަކެއް ބޭނުންކުރާ ސަރަހައްދުތަކަށްވުމުން، މި އެޓީއެމްތައް މެދުވެރިކޮށް ފަސޭހަކަމާއެކު ފައިސާ ނެގުމުގެ ޚިދުމަތް ކަސްޓަމަރުންނަށް ލިބިގެންދާނެކަމަށް ބޭންކުން ބުނެއެވެ.

" އައްޑޫގައި އިތުރު ދެ އޭޓީއެމްގެ ޚިދުމަތް  މިއަދު ފެއްޓޭކަމީ އަޅުގަނޑުމެންނަށް ލިބޭ އުފަލެއް. އެއަރޕޯޓާއި ހިތަދޫ ރީޖަނަލް ހޮސްޕިޓަލް ގައި މި ގާއިމްކޮށްފައިވާ މި އެޓީއެމްތަކުން ދަތުރުވެރިންނަށާއި ހިތަދޫ ހޮސްޕިޓަލަށް ޒިޔާރަތްކުރާ ގިނަ ފަރުދުންނަށާއި އާއިލާތަކަށް އިތުރުފަސޭހަކަމެއް ލިބިގެންދާނެ." ބީއެމްއެލް ޑެޕިއުޓީ ސީއީއޯ މުޙައްމަދު ޝަރީފް ވިދާޅުވިއެވެ.

ބީއެމްއެލްގެ މުޅި ރާއްޖެ ހިމެނޭ ބޭންކިންގ ވިއުގަޔަކާއެކު 20 އަތޮޅުގައި 34 ބްރާންޗް، 34 ސެލްފްސަރވިސް ބޭންކިންގ ސެންޓަރ، 95 އޭޓީއެމް، 4900 ޕީއޯއެސް މަރޗަންޓުން އަދި 230 ކޭޝް އޭޖެންޓުން ހަރަކާތްތެރިވެއެވެ.