ރިޔާސީ އިންތިހާބު ބޯމަތިވަމުން އަންނައިރު، ރައީސް އަބްދުﷲ ޔާމީން ގެންދަވަނީ ރައްޔިތުން އިންތިހާބު ކުރަންވީ ބޭފުޅެއްގެ ޝަރުތުތަކާއި މެދު ސުވާލު އުފައްދަވަމުންނެވެ. ވެރިކަން ކުރުމުގެ ގާބިލުކަން ރައީސެއްގެ ކިބައިގައި ހުންނަންޖެހޭ ކަމަށް އެކި ޕޯޑިއަމްތަކުގައި ރައީސް ޔާމީން ވިދާޅުވަމުން ގެންދަވާއިރު، ފުރަތަމަ ކަމަކަށް ވެރިކަން ކުރެއްވުމުގެ ގާބިލުކަން އެމަނިކުފާނުގެ ކިބައިގައި ހުރިތޯ ބަލާލަންޖެހެ އެވެ.

ރައީސްއެއްގެ ހުންނަންޖެހޭ އެންމެ މުހިންމު ސިފައަކީ މަޝްވަރާ ކުރުމާއި އަޑުއެހުމުގެ ގާބިލުކަމެވެ. އަޅުގަނޑު މި ދައްކަނީ ތިން ބާރު ވަކިވެފައިވާ ޑިމޮކްރަސީއެއްގައި ވެރިކަން ކުރައްވާ ރައީސެއްގެ ކިބައިގައި ހުންނަންޖެހޭ ސިފަތަކެވެ. ޚުދުމުޚުތާރު ޑިކްޓޭޓަރޝިޕެއް ނުވަތަ ރަސްކަމެއްގެ ނުވަތަ ރާނީއެއްގެ ސިފަތަކެއް ނޫނެވެ. އަޑުއެހުމާއި މަޝްވަރާކުރުމުގެ ގާބިލުކަމެއް ރައީސް ޔާމީންގެ ނެތެވެ. އެއީ އެއްކޮޅު ފަރާތްތަކާއި އިދިކޮޅު ފަރާތްތައް ކަމުގައި ވިޔަސް، ބައިނަލްއަގްވާމީ ގައުމުތަކާއި ޖަމިއްޔާ ޖަމާއަތްތައް ވިޔަސް، ރައީސް ޔާމީނުއާ ޚިޔާލުތަފާތުވާ އެއްވެސް މަޝްވަރާއެއް އަދި ބައްދަލުވުމަކާއި ކުރިމަތިލައްވަން ޖެހިލުންފުޅުވެވަޑައިގަންނަވަ އެވެ. އަމިއްލަ ނަފްސަށް އޮންނަ އިތުބާރު ކުޑަކަން ފާހަގަކުރެވެއެވެ.

މިސާލެއްގެ ގޮތުން، ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ ތާއީދު ހޯއްދެވުމަށްޓަކައި މަޝްވަރާ ކުރައްވައި ކޯލިޝަނެއް ހެއްދެވީ ރައީސް މައުމޫން އަބްދުލްގައްޔޫމެވެ. ކެބިނެޓް ބައްދަލުވުންތައް ގަވާއިދުން ނުބާއްވަވާއިރު، ރައީސް މައުމޫންގެ އަތްޕުޅުން ޕީޕީއެމް އަތުލެއްވި ފަހުން ކައުންސިލް ބައްދަލުވުންތައް ވެސް ގަވާއިދުން ނުބާއްވަވަ އެވެ. މަޖިލިސް މެންބަރުންނާއެކު ގަވާއިދުން ބައްދަލުވުންތައް ނުބާއްވަވާއިރު، ރައީސް ޔާމީނުގެ އެޕޮއިންޓްމެންޓެއް ހޯދުމަކީ ވެސް ދަތި އުނދަގީ ކަމެކެވެ. ފަސް ވަރަކަށް މެންބަރުންނާއި ދެތިން ވަޒީރެއް ފިޔަވައެވެ. އެ ބޭފުޅުންނަށް ވެސް މަސައްކަތުގެ ވާހަކައެއް ދެއްކުން މަނާ ވެގެންވާއިރު، ތާސްކުޅުމާއި މަޖާ ޖޯކު ކިޔުން ފިޔަވައި އިތުރު ކަމެއް ނުވެ އެވެ. ދެން ސަރުކާރު ހިނގާނެގޮތް ތިޔަބޭފުޅުން އަންދާޒާ ކޮށްލައްވާށެވެ.

އަދި މި ދެކެވުނީ ރައީސް ޔާމީން އެއްކޮޅު ފަރާތްތަކާއި މެދު ކަންތައްތައް ކުރައްވާ ގޮތެވެ.

ރާއްޖޭގެ ލޯކަލް މީޑިއާއާއި އެހާ ދުރުކޮށް އުޅުއްވާއިރު، ބޭރުގެ އެއްވެސް މީޑިއާއަކަށް އެންމެ އިންޓަވިއު އެއްވެސް ދެއްވާކަށް ކެރިވަޑައިނުގަންނަވަ އެވެ. ޕްރެސް ކޮންފަރަންސެއް ދެއްވީ އަތުން ގުނާލެވޭހާ މަދުންނެވެ. އޭގެ ކޮންމެ ފަހަރަކު ބައިކޮޅަށް އެތައް ގޯލެއް ޖެއްސެވި އެވެ. ދުނިޔޭގެ ހުރިހާ ގައުމެއްގެ ވެރިން ގައުމުތައް ތަމްސީލުކުރައްވާ އދ. ގެ އާންމު މަޖިލީހަށް ވަޑައިގަންނަވާކަށް ފާއިތުވީ ހަތަރު އަހަރު ކެރިވަޑައިނުގެންނެވި އެވެ. ދުނިޔޭގެ ވެރިންނާއި ދުނިޔޭގެ މީޑިއާ ކުރިމައްޗަށް އަރާވަޑައިގަންނަވަން ކެރިވަޑައިނުގަންނަވަ އެވެ. 

ރައީސް މުހައްމަދު ނަޝީދު މުޅި ދުނިޔޭގެ ސަމާލުކަމަށް ރާއްޖެ ގެންގޮސް ދެއްވައި، ބައިނަލްއަގްވާމީ އެތައް އެވޯޑެއް ހާސިލުކުރައްވައި، އެމަނިކުފާނުގެ ނަންފުޅު ދުނިޔޭގެ މީޑިއާގައި ވަނީ ވިދާލާފަ އެވެ. މިކަމާއި ވާދައަށް އިންޑިއާގެ އަވަށެއްގެ ޖަމިއްޔާއަކުން އެވޯޑެއް ހޯއްދަވައިގެން ރައީސް ޔާމީން ރާއްޖެ ވަޑައިގެންނެވިއިރު، އިންޑިއާގެ ނޫހެއްގައި އެ ވާހަކައެއް ނެތެވެ. ނަމަވެސް، ރައީސް ޔާމީން އުފާކޮށްދިނުމަށް ސަރުކާރު ބޭފުޅުން އެމަނިކުފާނު ރިސީވްކޮށް، ފޮޓޯޝޮޕް އިން އެޑިޓްކޮށްގެން އެމަނިކުފާނުގެ ފޮޓޯތައް ބިލް ބޯޑުތަކުގެ ސިފައިގައި މުޅި މާލޭގައި ހަރުކުރި އެވެ.

މީގެ އިތުރުން، ގައުމުގެ ވެރިމީހާގެ ކިބައިގައި ޒާތީ ތައައްސުބާއި ހަސަދަވެރިކަމާއި ބަދަލުހިފުމުގެ ރޫހުން އެއްކިބާވެ ރައްޔިތުންނާއި މެދު ހަމަހަމަކޮށް އަމަލު ކުރެއްވުމުގެ ގާބިލުކަން ހުންނަންޖެހެ އެވެ. ނަމަވެސް، ރައީސް ޔާމީނުއަށް ވެރިކަމާއި މަޖިލީހުގެ ސުޕަރ މެޖޯރިޓީ ތަބަކަކަށް ލާފައި އެރުވުމުން، އެ ހުރިހާ ބޭފުޅުން ޖަލަށްލާފައި، ރައީސް ޔާމީން އުޅުއްވަނީ "ތަސައްރަފު ނުފުދޭ ކުޑަކުއްޖެއް އުޅޭ" ގޮތަށެވެ. އެހާ ބޮޑާވެސް ހާކާ ކަމަށް އަރިހުގައި އުޅުއްވާ ބޭފުޅުން ވިދާޅުވެއެވެ. ސަރުކާރުން ކަންކުރާގޮތުން މުޅިން ވެސް އިވެނީ "އޭނާ ޖަލަށްލާ! އޭނާ ގޭބަންދަށް ޖަހާ! އޭނާ ގޮޅިއަށް ވާނުވާ! އޭނާގެ ހުއްދަ ބާތިލުކުރޭ! މި ނޫސް އެ ޓީވީ ޖޫރިމަނާ ކުރޭ! އެ ޓީވީ މީހުންނަށް ދައުވާ ކުރޭ! އެ ޖަމިއްޔާއިން ކެނޑޭ! މިގައުމާ އެކުއޮތް ގުޅުން ކަނޑާލާ! އުމުރަށް ހުކުމް ކުރޭ! ބޭސްފަރުވާއެއް އޭނާއަކަށް ނޯންނާނެ! މި މެންބަރުންގެ ގޮނޑި ދުއްވާލާ! މީނާގެ ވިޔަފާރިއާއި ރިސޯޓްތައް ބަންދުކުރޭ! އެ ގާޒީ މި ކޯޓުން އެ ކޯޓަސް ބަދަލުކުރޭ!" މިފަދަ އަޑުތަކެވެ.

ނިކަން މިދިޔަ ހަތަރު އަހަރުގެ ނޫސްތަކުގެ ފަލަސުރުޚީތައް ބައްލަވާށެވެ. މިގޮތަށް ކަންތައްތައް ކުރެއްވުމުން، ގައުމަށް އިތުރު އިންވެސްޓްމެންޓެއް ނުވަތަ ރައީސް ޔާމީނުއަށް ވޯޓު ދޭނެ ފަރާތްތަކެއް އިތުރުވެއްޖެތޯ އެވެ؟ ސުޕަރ މެޖޯރިޓީ އިން ވީކަމެއް ނެތި މިހާރު މެޖޯރިޓީ ވަނީ ގެއްލި ނިމިފައެވެ.

ރައީސް ޔާމީނު އަކީ ވެސް މިއަދު 60 އަހަރުވާން ކައިރިވެފައިވާ ދުވަސްވީ ބޭފުޅެކެވެ. ސިޔާސީ މައިދާނުގައި ލައްކަ ގިނަ ދުވަސް ހޭދަކުރެއްވި އިރުވެސް ރައީސް ޔާމީނުއަކަށް ރައީސް މައުމޫނުގެ ޑިޕްލޮމަސީއެއް، ރައީސް ނަޝީދުގެ ޕީއާރްއެއް، ގާސިމްގެ މަސައްކަތްތެރިކަމެއް ދަސްވި ކަމަކަށް ނުވި އެވެ. އެންމެ ކުޑަމިނުން ރައީސް ޔާމީނުއަށްވުރެ ދެބައި އުމުރުން ހަގު، އަދި ރައީސް ޔާމީން މިއަދު ސިޔާސީ ގޮތުން އެންމެ ޖެހިލުންވެވަޑައިގަންނަވާ އެއްބޭފުޅާ ކަމުގައިވާ ކުރީގެ ނައިބު ރައީސް އަހުމަދު އަދީބު އުޅުއްވި ގޮތަށް ހުރިހާ މެންބަރުންނާއި ކެބިނެޓް ގޮވައިގެން، ވަރުގަދަ ޓީމެއްގެ ގޮތުގައި އުޅުއްވުމުގެ ގާބިލުކަމެއް ވެސް ރައީސް ޔާމީންގެ ކިބައިން ނުފެނުނެވެ.

ރައީސް ޔާމީނުއަށް އަޑު އިއްވަންޏާ ކަންފަތުގެ ވަރަށް ފުނުން މަޑު ނަގަންޖެހޭނެއޭ ވިދާޅުވެ، ބައެއް ޒުވާނުން "ގައްޑާވާ ގޮތަށް" ގަދަބަސްތައް ވިދާޅުވާއިރު، ރައީސުލްޖުމްހޫރިއްޔާގެ މަގާމަށް ރައީސް ޔާމީން ގާބިލުތޯ މިއަހަރު ރައްޔިތުން ނިންމާނެ އެވެ.