ރާއްޖޭގައި ވިދަމުން އަންނަ މިއުޒިކް ލޭބަލް، ސިމްބޮލިކް ރެކޯޑްސްގެ ލަވަކިޔުންތެރިޔާ އަހުމަދު އާދިލް (އެޑިލް) ގެ ލަވަ "އިންޒާރު" އަޑުއެހުންތެރިންނަށް ދޫކޮށްލައިފިއެވެ.
މިއީ އެޑިލްގެ އަޑު ތިން އަހަރަށް ފަހު އިވޭ ފުރަތަމަ ފަހަރެވެ.
މި ލަވަ ސައުންޑް ކްލައުޑް އިން މިހާރު އަޑުއިވޭނެއެވެ. މީގެ ހަތަރު ދުވަސް ކުރިން ނެރެފައިވާ "އިންޒާރު" އަށް ދަނީ އާންމުގެ ބޮޑު ތަރުހީބެއް ލިބެމުންނެވެ.
ސިމްބޮލިކް ރެކޯޑްސްގެ މެންބަރަކު ބުނީ ކޮޕީ ރާގުގެ ލަވަތަކަށް މިއުޒިކް ހެދުމުގެ އުސޫލާ ދެކޮޅަށް ސިމްބޮލިކް ރެކޯޑްސް އިން ނެރެފައިވާ "އިންޒާރު" ލަވައާ އެކު "ހަނގުރާމަ" އިއުލާންކޮށް ހާއްސަ ކެމްޕޭނެއް ފަށާފައިވާ ކަމަށެވެ. ނާއިލް ބުނީ އަމިއްލަ ރާގުގެ ލަވަތަކަށް ފެށުނީއްސުރެ ސިމްބޮލިކް ރެކޯޑްސް އިން އިސްކަންދޭ ކަމެއް ކަމަށާއި އަމިއްލަ ރާގުގެ ލަވަތައް ހެދުމަށް އިސްކަން ދިނުމަށް ރާއްޖޭގެ މިއުޒީޝަނުންނާ ވާހަކަ ދައްކަމުން އަންނަ ކަމަށެވެ. އަދި އެފަރާތްތަކުގެ އެއްބާރުލުން ވެސް ލިބެމުން އަންނަ ކަމަށް އޭނާ ބުންޏެވެ.
ސިމްބޮލިކް ރިކޯޑްސްގެ ފުރަތަމަ އަލްބަމަކީ ރާއްޖޭގައި އެންމެ ފުރަތަމަ ހިޕް ހޮޕް އަލްބަމް ކަމަށްވާ "މަގުމަތި" އެވެ. އެ އަލްބަމުގެ ލަވަތަކަށް ބޮޑު ތަރުހީބެއް ވަނީ ލިބިފައެވެ. އޭގެ ފަހުން، އެ ލޭބަލް އިން ވަނީ "ސްޓޭޓް އޮފް އެރަރ" ގެ ނަމުގައި އީޕީ އަލްބަމެއް ވެސް ނެރެފައެވެ.
ހަމައެކަނި ހިޕް ހޮޕް މިއުޒިކަށް ހާއްސަވެގެން 2013 ވަނަ އަހަރު ސިމްބޮލިކް ރެކޯޑްސް އުފެދުނު ނަމަވެސް މިހާރު ލޭބަލްގެ މަސައްކަތްތައް ފުޅާވެ ހުރިހާ ވައްތަރެއްގެ މިއުޒިކް ވެސް ދަނީ އާންމުންނާ ހަމައަށް ގެނެސްދެމުންނެވެ. އެ ލޭބަލުން ގެނެސްދޭ ހުރިހާ ލަވައަކީ ވެސް އަމިއްލަ ރާގެވެ.
