ކޮންމެ ދުވަހަކު ވެސް ހެދުނު ތެދުވުމަށް ފަހު އަޅުގަނޑު އެންމެ ފުރަތަމަ ކުރާ ކަމަކީ ފޯނު ނެގުމަށް ފަހު އެންމެ ފަހުން ހިނގާފައިވާ ކަންކަން ބަލާލުމެވެ. ރައްޓެހިން ފޭސްބުކްގައި ކޮށްފައިވާ ޕޯސްޓްތަކާއި ކޮމެންޓްތަކާއި އިންސްޓަގްރަމްއަށް ލާފައިވާ ފޮޓޯތަކާއި ފޮނުވާފައިވާ ސްނެޕްތަކެވެ. ޚަބަރު ހޯދައިގަތުމަށް އެންމެ ފަސޭހަ ޕްލެޓްފޯމަކީ ޓްވިޓަރ ކަމަށް ވުމާ އެކު އެންމެ ފުރަތަމަ އަބަދުވެސް ބަލާލެވެނީ އެންމެ ފަހުގެ ޓްވީޓުތަކަށެވެ.

ހަފްތާއެއްހާ ދުވަސްވަނީއެވެ. ރާއްޖޭގެ ފުލުހުންގެ ވެރިފައިޑް އެކައުންޓުން ކޮންމެ ދުވަހަކު ވެސް ގުޑް މޯނިން ޓްވީޓެއް ކުރެއެވެ. މި ޓްވީޓުތަކާ އެކު ފުލުހުންގެ ހިދުމަތުގެ ތެރެއިން ނަގާފައިވާ ފޮޓޯއެއް ވެސް އެޓޭޗް ކުރެވިފައިވެއެވެ. އެތަކެއް ލައިކްތަކެއް މި ޓްވީޓްތަކަށް ކޮންމެ ދުވަހަކު ވެސް ލިބިފައި ހުރެއެވެ. ކަންވާނީ ވެސް އެހެންތާއެވެ. ފުލުހުންނަކީ އަޅުގަނޑުމެންގެ ސަލާމަތާއި ރައްކާތެރިކަން ކަށަވަރުކޮށްދޭން ތިބޭ ބަޔެކެވެ.

މި ޓްވީޓްތަކަށް އަޅުގަނޑު މާ ބޮޑު ސަމާލުކަމެއް ނުދެމެވެ. އެހެން ނަމަވެސް ދުވަހެއް ދުވަހަކަށް މި ޓްވީޓްތަކަށް ލިބެމުން އަންނަ ރިޕްލައިތައް އިތުރުވަމުންދިޔުމާ އެކު މިވާ ގޮތް ބަލާލާ ނަމޭ ހިތަށް އެރިއެވެ. މި ރިޕްލައިތަކުން އަޅުގަނޑަށް ފެނިގެންދިޔައީ ފުލުހުންނާ މެދު ގިނަ ދިވެހިން މިހާރު ދެކޭ ގޮތެވެ. ފުލުހުންގެ މުއައްސަސާއަށް އެ މުއައްސަސާގެ ޒިންމާ އެންމެ ރަނގަޅަށް އަދާނުކުރެވޭ ކަމެވެ. ރައްޔިތުންނަށް ސަލާމަތާއި ރައްކާތެރިކަން ކަށަވަރު ނުކޮށްދެވޭ ކަމެވެ. ފުލުހުންގެ މަސައްކަތަކީ މިހާރު ވަކި ފަރާތަކަށް ބުރަވެފައިވާ މަސައްކަތެއް ކަމެވެ. ރައްޔިތުންގެ މެދުގައި އިތުބާރު ގެއްލިފައިވާ ހިދުމަތެއް ކަމެވެ. މިގޮތަށް ރިޕްލައިތައް އައީ ވެސް ސަބަބުތަކެއް ނެތިއެއް ނޫނެވެ.

ދިރާސީ އާ އަހަރުގެ ކިޔެވުން ފެށުނުތާ ހަފަތާއެއް ނުވަނީސް މިހާރު ބެލެނިވެރިން އެތިބެނީ ދަރިވަރުން ސްކޫލަށް ފޮނުވަން ވެސް ބިރުންނެވެ. ސްކޫލުގެ އެތެރެއިންނާއި ބޭރުން ޖެހިޖެހިގެން ދެ ދުވަހަކު ސްކޫލް ދަރިވަރުންނަށް ހަމަލާ ދިނުމުން އަމިއްލަ ދަރިފުޅަށް އެ ހަމަލާ އަމާޒުނުވާނެކަމުގެ ޔަގީންކަން އޮންނާނީ ކާކަށްތޯއެވެ؟ 

މި ދެ ހަމަލާގެ ވެސް އެންމެ ހެއްވާ ކަމަކީ މި ދެ ހަމަލާ ވެސް ދީފައި ވަނީ ފުލުހުން އާންމު ގޮތެއްގައި ހަރަކާތްތެރިވާ ދެ ސްކޫލެއްގެ ކައިރީގައި ކަމަށް ވާތީއެވެ. ތާޖުއްދީން ސްކޫލާ އިންވެގެން އެހުރީ ފުލުހުންގެ މަރުކަޒެކެވެ. ދަރުމަވަންތަ ސްކޫލް ކުއްޖާއަށް ހަމަލާދިން އިރު ފުލުހުން އެ ސަރަހައްދުގައި ހަރަކާތްތެރިވިކަން އަޅުގަނޑުމެންނަށް އެނގިގެންދަނީ އެ ކުއްޖާއަށް އެންމެ ފުރަތަމަ އެހީ ފޯރުކޮށްދިނީ ވެސް ފުލުހަކަށްވާތީއެވެ. އަދި އެއީ ގްރީން ޒޯނެކެވެ.

ވާނެ ގޮތެއް ވެ ނިމިއްޖެއެވެ. ސްކޫލް ފެށޭ ގަޑިއާ ސްކޫލް ނިމޭ ގަޑީގައި ތޫނު އެއްޗަކުން ހަމަލާދިނަސް އަނިޔާ ނުލިބޭ ފަދަ ވެސްޓް އަޅައިގެން ފުލުހުން ހަރަކާތްތެރިވާން ޖެހުމުން އެކަމުން އަޅުގަނޑަށް ސާފު ވަނީ އެންމެ ކަމެކެވެ. ފުލުހުންނަކީ ޕްރޯ އެކްޓިވް ބައެއް ނޫން ކަމެވެ. ފުލުހުންނަކީ ރިއެކްޓިވް ބައެއް ކަމެވެ. މާނައަކީ ފުލުހުން ފިޔަވަޅު އަޅަނީ ކުށްކޮށް ނިމުމުން ކަމެވެ. ހަމަގައިމު ވެސް މާލެ ތެރޭގައި ސަލާމަތާއި ރައްކާތެރިކަން ބެލެހެއްޓުމަށް ބޮޑެތި އޮޕަރޭޝަންތައް ހިންގޭ ނަމަ މިފަދައިން ކަންކަން ނުހިނގާނެއެވެ.

އެއްވެސް ހާލެއްގައި މިއީކީ ހަމައެކަނި ފުލުހުންގެ އިހުމާލުން ހިނގާފައިވާ މާރާމާރީތަކެއް ވެސް ނޫނެވެ. މި މާރާމާރީތައް ހިނގުމުގައި މައިންބަފައިންނާއި މުޖްތަމައު އާއި ހަމަ އެ ކުދިންގެ އިހުމާލެއް ވެސް އެބައޮތެވެ. އެހެން ނަމަވެސް އަޅުގަނޑުމެން އެންމެން ވެސް ގަބޫލުކުރަން ޖެހޭ ތެދު ހަގީގަތަކީ ފުލުހުންގެ މުއައްސަސާއަކީ ދިވެހި ރައްޔިތުންގެ ފައިސާ އިން އެތަކެއް މިލިއަން ރުފިޔާ ހަރަދުކޮށްގެން ކުށް މަދުކޮށް، ކުށް ހުއްޓުވުމަށް ހާއްސަ ކުރެވިފައިވާ މުއައްސަސާއެއް ކަމެވެ. އަޅުގަނޑުމެން ފަރުދުންގެ ޒިންމާއަކީ އެކަމުގައި ފުލުހުންނަށް އެއްބާރުލުން ދިނުމެވެ.

ދިވެހި ރައްޔިތުންގެ ފައިސާއިން ފުލުހުންގެ ކާރުތަކާއި ސައިކަލްތަކަށް ޕެޓްރޯލް އަޅައިދޭއިރު ފިނި ބުރު ޖަހަން ދުއްވުމަކީ ހައްލު ކަމުގައި ނުދެކެމެވެ. ދެ އިރު ދެ ދަޅައަށް އަތްވެއް ވާރެޔެއް ހޫނެއް ފިންޔެއް ބެލުމެއް ނެތި އެއްގަމު އުޅަނދުތަކުގައި ސްޓިކާ ޖަހަމުން ދުވުމަކީ ޒިންމާ އަދާކުރުން ހެއްޔެވެ؟ އިދިކޮޅު ސިޔާސީ ހަރަކާތެއް ހިންގާ ނަމަ އެކަން ހުއްޓުވުން އެއީ ޒިންމާ އަދާކުރެވުނީތޯއެވެ؟ ސަރުކާރާއި މެޑަމް ބައްވާ ހަފްލާތައް ފަޅުފިލުވައިދީ ސެކިއުރިޓީ ބެލެހެއްޓުމުން ޒިންމާ އަދާކުރެވުނީތޯއެވެ؟ ފޮޓޯ ނަގާފައި ކޮންމެ ގަޑިއިރަކުން ޓްވީޓު ކުރުމުން ޒިންމާ އަދާކުރެވުނީ ހެއްޔެވެ؟

ފުލުހުންގެ މުއައްސާސާއަކީ މަދަނީ މުއައްސާސާއެކެވެ. ފުލުހުންގެ ޒިންމާ އަދާކުރެވުނު ކަމަށް ރައްޔިތުން ބަލައިގަންނާނީ އެމީހުންގެ ރައްކާތެރިކަމާއި ސަލާމަތްތެރިކަން ފުލުހުންނަށް ކަށަވަރު ކޮށްދެވިގެންނެވެ. ކޮންމެ ދުވަހަކު ހެދުނު ގުޑް މޯނިން ޓްވީޓް ކުރެއްވިޔަސް ޒިންމާ އަދާކުރެވުނީކީ ނޫނެވެ. ރައްޔިތުން ބޭނުން ވަނީ ގުޑް މޯނިން ޓްވީޓެއް ނޫނެވެ. ބޭނުންވަނީ ރައްޔިތު މީހާ ހޭލާ އިރު މާހައުލު އަމާންވެފައި އޮތުމެވެ. އާއިލާތަކުން ބޭނުން ވަނީ މޯނިން ކިޔައިގެން ހެނދުނު ގެއިން ބޭރަށް ދާ މީހުންނާއި ދަރިން އެ ސަލާމަތްތެރިކަމާ އެކު ގުޑް ނައިޓް ކިޔަން ވެސް ގެއަށް އާދެވޭނެ ފަދަ ރައްކާތެރި މާހައުލެއް ގާއިމުވެފައި އޮތުމެވެ.