ސަންޖޭ ލީލާ ބަންސާލީގެ ޕަދްމަވަތީގެ ނަން ރަސްމީކޮށް ޕަދްމަވާތަށް ބަދަލުކޮށްފިއެވެ.
މިނަން ޕަދްމާވަތުގެ ޓީމުން ބަދަލުކޮށްފައި ވަނީ އިއްޔެގައެވެ.
ޕަދްމަވަތީގެ ނަމުގައި ހިންގި ޓްވިޓާ އެކައުންޓްވެސް ވަނީ މިހާރު ޕަދްމާވަތަށް ބަދަލުކޮށްފައެވެ. މިފިލްމުގެ ނަން ބަދަލުކޮށްފައި މިވަނީ ސެންޓްރަލް ބޯޑު އޮފް ފިލްމު ސާޓިފިކޭޝަން (ސީބީއެފްސީ)އިން މި ފިލްމު ފާސްކޮށްދިން އިރު ފިލްމުގެ ނަން ޕަދްމާވަތަށް ބަދަލުކޮށްދޭން އެދުމުންނެވެ.
އެތަކެއް ގޮންޖެހުންތަކާއި އެކު ޕަދްމަވަތު ސިނަމާތަކަށް އައުމަށް ހަމަޖެހިފައިވަނީ މިމަހުގެ 25 ގައެވެ.
މި ފިލްމު ސިނަމާތަކަށް އައުމަށް ކުރިން ހަމަޖައްސާފައި އޮތީ މިދިޔަ ޑިސެމްބަރު މަހުގެ 1 ވަނަ ދުވަހުގައެވެ. އެހެން ނަމަވެސް އެދުވަހަށް އެ ފިލްމު ސިނަމާތަކަށް އައިސްފައި ނުވަނީ ސެންސަރު ބޯޑުން އެ ފިލްމު ފާސްކުރުމަށް ހުށައެޅި ލިޔެކިޔުންތައް އަނބުރާ ފޮނުވާލުމާއި ގުޅިގެންނެވެ.
ދީޕިކާ މީގެ ކުރިން ޕަދްމަވަތީއާބެހޭ ގޮތުން ބުނެފައިވަނީ އޭނާ ޕަދްމަވަތީ ކުޅުމުން އެންމެ އުފާވަނީ އަންހެނަކަށްވެ ހުރެ އެކަހަލަ ތާރީޚީ ފިލްމެއް ކުޅުމަށް ފުރުސަތު ލިބުންކަމަށެވެ. އޭނާއަކީ ތާރީޚީ ކަންތައްތަކަށް ވަރަށް އަހުލުވެރި މީހެއްކަމަށް ދީޕިކާ ވަނީ ބުނެފައެވެ.
