އެއްވެސް ޗެނަލަކުން ބަލައިނުގަތުމުން އޭނާގެ ބައްޕަ ވަރަށް އެހީވިކަމަށް މަޝްހޫރު ޕްރޮޑިއުސަރ އެކްތާ ކަޕޫރު ބުނެފިއެވެ.
އެކްތާ ކަޕޫރުގެ ބައްޕަ ޖީތެންދްރާއަކީ 2003 ވަނަ އަހަރު ފިލްމްފެއާ ލައިފްޓައިމް އެޗީވްމަންޓް އެވޯޑް ލިބިފައިވާ މީހެކެވެ. އެކްޓަރެއްގެ އިތުރުން އޭނާއަކީ ބަލާޖީ ޓެލެފިލްމު، ބަލާޖީ މޯޝަން ޕިކްޗާސް އަދި އޭއެލްޓީ އެންޓަޓައިންމަންޓްގެ ޗެއާމަނެވެ.
އޭކްތާ މިހެން ބުނީ ސްޓާ ޕްލަސް އިން ޝާހްރުކް ޚާން ހުށަހަޅައިދޭ "ޓެޑް ޓޯކްސް އިންޑިއާ ނަޔީ ސޯޗް" ޝޯގެ މި ހަފުތާގެ އެޕިސޯޑްގައެވެ. އިންޑިއާގެ ޕްރޮޑިއުސަރުންގެ ތެރެއިން އެންމެ ގިނަ ބައެއްގެ ތާއީދު ލިބިފައިވާ ޑްރާމާސީރީޒްތައް ޕްރޮޑިއުސް ކޮށްފައިވާ އޭކްތާ ވަނީ އޭނާ ޕްރޮޑިއުސަރަކަށް ވުމަށް ފަށައިގެން ދިމާވި ކަންތައްތައް ކިޔާދީފައެވެ.
އޭކްތާ އާއި އޭނާގެ ކޮއްކޮ، މަޝްހޫރު އެކްޓަރ ތުޝާރު ކަޕޫރާއި މަންމަ އާއި ބައްޕަ އުޅެމުންދިޔައީ ވަރަށް އުފާވެރިކޮށެވެ. އޭކްތާ ބުނާ ގޮތުން އޭނާގެ ދިރިއުޅުން ވަރަށް އުފާވެރިއެވެ. އެހެން ނަމަވެސް އޭކްތާ ބުނީ އޭނާގެ ކެރިއަރ ފެށި ދުވަސްވަރަކީ ވަރަށް ގިނަ ގޮންޖެހުންތައް ދިމާވި ދުވަސްވަރެއް ކަމަށެވެ. ކެރިއަރ ފެށުމުން އޭނާއަށް ދިމާވި އެންމެ ބޮޑު އެއް ގޮންޖެހުމަކީ އެއްވެސް ޗެނަލަކުން އޭނާ ބަލައިނުގަނެ އޭނާއާ އެކު މަސައްކަތްކުރަން ބޭނުން ނުވުމެވެ. އެކަމާ ގުޅިގެން ހަދާނެ ގޮތް ހުސްވި ކަމަށް އޭކްތާ ބުންޏެވެ. އޭކްތާ ބުނީ އޭނާއަށް ޓީވީ ސީރީޒްގެ ވިޔަފާރިއަށް ވަނުމަށް އެހީތެރިވެދީ އިންވެސްޓް ކޮށްދިނީ އޭނާގެ ބައްޕަ ކަމަށެވެ. ބައްޕަގެ މުޅި އުމުރު ދުވަހު ހޯދި ފައިސާ އޭނާއަށް ދިނީ އޭނާގެ ހުވަފެން ހަގީގަތަކަށް ހެދުމަށެވެ.
އޭކްތާ ބުނީ އޭނާ ކުރިމަގަށް ހަމައެކަނި ދަސްކުރީ ޕްރޮޑިއުސްކުރަން ކަމަށާއި އޭނާ އިތުރުކަމެއް ދަސް ނުކުރާ ކަމަށެވެ. އަދި އޭނާއަށް އެދާއިރާ އިން ކުރިއަށް ދިއުން ނޫން ގޮތެއް ނެތް ކަމުން އޭނާއަށް އޭރު ހަދާނެ ގޮތެއް ނޭނގިފައި ހުރި ކަމަށް ބުންޏެވެ.
އެހެން ނަމަވެސް އޭނާ ސީރީޒް ހެދުމައިގެން ކުރިއަށް ދިޔަ ކަމަށާއި އޭ ނާއަށް އެންމެ ކާމިޔާބު ސީރީޒްއަކަށް ފުރަތަމަވީ ސީރީޒްއަކީ ހަމް ޕާންޗް ކަމަށެވެ. އެ އަށް ފަހު އޭކްތާގެ މަގުބޫލުކަން ދިޔައީ އެއް ސީރީޒް އަށް ވުރެ އަނެއް ސީރީޒަގައި އިތުރުވަމުންނެވެ. އެ އަށް ފަހު އޭނާ ސްޓާޕްލަސްއަށް ޕްރޮޑިއުސްކޮށްދިން "ކިޔޫންކީ ސާސް ބީ ކަބީ ބަހޫ ތީ" އާއި "ކަހާނީ ގަރް ގަރް ކީ"، "ކަސައުޓީ ޒިންދަގީ ކީ" ވެގެންދިޔައީ އިންޑިއާގެ އެންމެން ބަލައިގަންނަ ޕްރޮޑިއުސަރަށް އޭކްތާ ވުމަށް މެދުވެރި ސަބަބަށެވެ.
