ލަންކާގެ ފަރުބަދަމަތީ ސަރަޙައްދެއް ކަމަށްވާ ނުވަރައެލިޔާގެ ފިނިހޫނުމިން 4.7 ޑިގްރީސެލްޝިއަސްއަށް ވެއްޓިއްޖެއެވެ.

ލަންކާގެ މެޓް ޑިޕާޓްމަންޓުން ބުނާ ގޮތުގައި މިދިޔަ ހޮނިހިރު ދުވަހު އެސަރަހައްދުގެ ފިނިހޫނުމިން ވަރަށް ބޮޑަށް ދަށަށް ގޮސް، 4.7 ސެލްޝިއަސްއަށް ތިރިވިއިރު، ފަރުބަދަމަތީ އެހެން ސަރަަހައްދުތަކުގެ ފިނިހޫނުމިންވެސް ވަރަށް ބޮޑަށް ދަށަށް ގޮސްފައިވެއެވެ.

ލަންކާގެ ހުރިހާ ހިސާބެއްގައިވެސް ފިނިހޫނުމިން ދަށަށް ގޮސްފައިވާއިރު، ފަރުބަދަމަތީ ސަރަހައްދުތަކަށް ފިނިފައިބާފައިވާއިރު، ބިންމަތީގައިވެސް ގްރައުންޑް ފްރޮސްޓް އުފެދިފައިވާކަމަށް މެޓް އޮފީހުން ބުނެއެވެ.

ސްކޫލް ޗުއްޓީ އަދިވެސް ނިމިފައިނުވާތީ ގިނަ އަދަދެއްގެ ދިވެހިން އަދިވެސް ލަންކާގައި ޗުއްޓީ ހޭދަކުރަމުންދާއިރު، ބައެއް ދިވެހިންވެސް ފަރުބަދަމަތީ ސަރަހައްދުތަކުގައި ޗުއްޓީ ހޭދަކުރަމުންދެއެވެ.

ލަންކާގެ ސެންޓްރަލް ޕްރޮވިންސްގެ އިތުރުން ސަަރަގަމުވަ އަދި ވެރިރަށް ކޮޅުނބު ހިމެނޭ ވެސްޓަރން ޕްރޮވިންސްގެ ފިނިހޫނުމިން ވެސް މިދުވަސްވަރު ދަށަށް ދާނެކަމަށްވެއެވެ. 

ލަންކާގެ ގިނަ ހިސާބުތަކުގެ ފިނި ހޫނުމިން ދަށަށް ދިޔަ ނަމަވެސް، ރަތުނަޕޫރާގައި 32.7 ޑިގްރީ ސެލްޝިއަސްއަށް ހޫނުމިން މައްޗަށް އަރާފައިވެއެވެ.