ފަލަސްތީނުގެ މިނިވަން ދައުލަތް ބަލައިގަތުމަށް އދ.ގައި ޢަރަބި ޤައުމުތަކުން ވަރަށް އަވަހަށް ލޮބީކުރާނެ ކަމަށް އުރުދުންގެ ޚާރިޖީ ވަޒީރު އައިމަން ސަފާދީ ވިދާޅުވެއްޖެއެވެ.

ޢަރަބި ޤައުމުތަކުން މަސައްކަތްކުރަނީ ފަލަސްތީނުގެ މިނިވަން ދައުލަތުގެ ވެރިރަށުގެ ގޮތުގައި އިސްރާއީލުން 1967 ވަނަ އަހަރު ހިފާފައިވާ އިރުމަތީ ޤުދުސް ބަލައިގަތުމަށް އދ. އަށް ބާރުއެޅުމަށެވެ. 

ޢަރަބި 6 ޤައުމެއްގެ ޚާރިޖީ ވަޒީރުން ވަނީ ހޮނިހިރު ދުވަހު ފަލަސްތީނުގެ މައްސަލައިގައި މަޝްވަރާކުރުމަށް އުރުދުންގެ ވެރިރަށް ޢައްމާންގައި ބައްދަލުކުރައްވާފައެވެ. އެ ބޭފުޅުން މަޝްވަރާކުރައްވާފައި ވަނީ، ޤުދުސްއަކީ އިސްރާއީލުގެ ވެރިރަށްކަމަށް ބަލައިގަތުމަށް އެމެރިކާގެ ރައީސް ޑޮނަލްޑް ޓްރަމްޕް ނިންމެވި ނިންމެވުމާއި ދެކޮޅަށް މަސައްކަތްކުރުމަށް ޢަރަބި ލީޑަރުން މީގެ ކުރިން އެއްބަސްވެވަޑައިގެންނެވި އެއްބަސްވުމާއިގެން ކުރިއަށްދާނެ ގޮތަކާމެދުގައެވެ. 

ޓްރަމްޕްގެ ނިންމެވުމާއިއެކު މިސްރުގެ ވެރިރަށް ޤާހިރާގައި މިކަމާގުޅޭ ގޮތުން ޢަރަބި ޤައުމުތަކުގެ ވެރިން ބައްދަލުކުރައްވައި، 6 ޤައުމުގެ މައްޗަށް އެކުލެވޭ ޚާއްސަ ކޮމިޓީއެއް ވަނީ އެކުލަވާލާފައެވެ. މިކޮމިޓީގައި ހިމެނެނީ މިސްރު، މޮރޮކޯ، ސަޢޫދީ ޢަރަބިއްޔާ، އެކުވެރި ޢަރަބި ޢިމާރާތް އަދި ފަލަސްތީނުގެ އިތުރުން ކޮމިޓީގެ މުޤައްރިރެއްގެ ގޮތުގައި އުރުދުންއެވެ. 

އުރުދުންގެ ޚާރިޖީ ވަޒީރު ސަފާދީ ވިދާޅުވީ ފަލަސްތީނުގެ މިނިވަން ދައުލަތް ބަލައިގަތުމަށް އދ.އަށް ހުށަހެޅުމަށް 6 ޤައުމުގެ ކޮމިޓީއިން ނިންމި މައްސަލަ ޢަރަބި ލީގުގެ ވަޒީރުންގެ ފެންވަރުގެ ބައްދަލުވުމަކަށް މިމަހުގެ ފަހުކޮޅު ހުށަހަޅާނެއެވެ. މި މައްސަލަ އދ.އަށް ހުށަހަޅުއްވާނެ ކަމަށް ސަފާދީ ވިދާޅުވިނަމަވެސް، ހުށަހަޅުއްވާނީ އދ.ގެ ސަލާމަތީ މަޖިލީހަށްތޯ ނުވަތަ ޢާއްމު މަޖިލީހަށްތޯ ސާފުކޮށްދެއްވާފައެއް ނުވެއެވެ. 

މި ބައްދަލުވުމުގައި ބައިވެރިވެވަޑައިގެންނެވި ޢަރަބި ލީގުގެ އަމީން ޢާއްމު އަޙްމަދު އަބުލް ޣައިތު ވިދާޅުވީ ވަޒީރުންގެ ބައްދަލުުވުމުގައި ޢަރަބި-އިސްރާއީލް މައްސަލަތަކުގައި މެދުވެރިއެއްގެ ރޯލު އަދާކުރުމަށް އެމެރިކާއަށް އޮތް ފުރުސަތުތަކާބެހޭ ގޮތުންވެސް މަޝްވަރާކުރެވޭނެކަމަށެވެ. މެދުއިރުމަތީގެ މައްސަލައިގައި އެމެރިކާއިން މިހާރު ގެންގުޅެނީ އިސްރާއީލަށް ބުރަވެފައިވާ ސިޔާސަތެއްކަމުން، މެދުވެރިއެއްގެ ރޯލު އަދާކުުރުމުގައި އެމެރިކާއަށް ވަކިފަރާތަކަށް ނުޖެހި އޮވެވިދާނެކަމާއިމެދު ޢަރަބި ލީގުން ސުވާލު އުފައްދައެވެ. 

ފަލަސްތީނުގެ މިނިވަން ދައުލަތް އިއުލާންކުރުމުގެ މަސައްކަތް އިތުރަށް ފުޅާވެގެން މިދިޔައީ ޤުދުސްއަކީ އިސްރާއީލުގެ ވެރިރަށުގެ ގޮތުގައި ބަލައިގަތުމަށް އެމެރިކާއިން ނިންމި ހިސާބުންނެވެ.