ކަލާސް ޓީވީ އިން ދައްކަމުން އަންނަ ޓީވީ ސީރީޒް ކަމަށްވާ "ނާގިން"ގެ ތިންވަނަ ސީޒަނުގައި  "ނާގިން" ނުވަތަ ހަރުފައިގެ ރޯލުގައި ފެނިގެންދާނީ ސަންޖީތާ ޝޭޚްއެވެ.

"ނާގިން"އަކީ ސުޕަނެޗުރަލް ކަންތައްތަކެއް ދައްކުވައިދޭ ސީރީޒްއެކެވެ.

ސަންޖީދާ ޝޭޚް ވަނީ  މީގެ ކުރިން ވެސް ސީރީޒްތަކުން ފެނިގެން ގޮސްފައެވެ. އޭގެ ތެރޭގައި "ކިޔާ ހޯގާ ނިންމޯ ކާ"، "ކިޔާ ދިލް މޭ ހޭ", "ލަވް ކާ ހޭ އިންތިޒާރް" އަދި އިނގިރޭސި ސީރީޒް "ރިވެންޖް"ގެ މައްޗަށް ބިނާކޮށް ސްޓާ ޕްލަސް އިން އުފެއްދި "އެކް ހަސީނާ ތީ" އިން ވެސް އޭނާ ވަނީ ފެނިގެން ގޮސްފައެވެ.

މި ސިލްސިލާގެ ފުރަތަމަ ދެ ސީޒަންގައި ވެސް ނާގިން ނުވަތަ ހަރުފައިގެ ރޯލު ކުޅެފައި ވަނީ މޯނީ ރޯއީ އާއި އަދާ ޚާން އެވެ. އެހެން ނަމަވެސް މޯނީ އާއި އަދާ ވަނީ މި ސީރީޒްގެ ތިން ވަނަ ސީޒަން ނުކުޅުމަށް ނިންމާފައެވެ.

"ނާގިން"ގެ ފުރަތަމަ ސީޒަން ދައްކަން ފެށީ 1 ނޮވެމްބަރު 2015 އިން 5 ޖޫން 2016 އަށެވެ. މި ސީޒަނުން ފެނިގެން ގޮސްފައި ވަނީ މޯނީ ރޯއި، އަރުޖުން ބިޖްލާނީ، އަދާ ޚާން އަދި ސުދާ ޗަންދްރަންއެވެ.

ދެވަނަ ސީޒަނުން ފެނިގެން ގޮސްފައި ވަނީ މޯނީ ރޯއި، ކަރަންވީރު ބޮހްރާ، ސުދާ ޗަންދްރަން، އަދާ ޚާން އަދި އާސްކާ ގޮރާޑިއާއެވެ. މި ސީޒަން ދައްކާފައި ވަނީ 2016 ވަނަ އަހަރުގެ އޮކްޓޯބަރު މަހުގެ 8 އިން މިދިޔަ އަހަރުގެ ޖޫން މަހުގެ 25އާ ހަމައަށެވެ.

ތިން ވަނަ ސީޒަނުން ފެނިގެންދާނެ ކަމަށް ކަށަވަރުވެފައިވާ ތަރިންނަކީ ސަންޖީދާ ޝޭޚްގެ އިތުރުން ކަރަންވީރު ބޮހްރާއެވެ. ނާގިންގެ ދެ ސީޒަނަކީ ވެސް އިންޑިއާގައި އެންމެ މީހުން ބަލާ ދެ ސީރީޒްއަށް ވަނީ ވެފައެވެ.

މި ސިލްސިލާ އަންނަނީ 2015 ވަނަ އަހަރުން ފެށިގެން ޓެލެވިޒަން ރޭޓިން ޕޮއިންޓްސް (ޓީއާރުޕީ) ގެ އެންމެ ކުރި ހޯދަމުންނެވެ. ތިންވަނަ ސީޒަން ނެރޭނީ މިއަހަރުގެ ތެރޭގައެވެ.