އެމެރިކާގެ ރައީސް ޑޮނަލްޑް ޓްރަމްޕް ވެރިކަމަށް ވަޑައިގެންފައި ވަނީ ސިޔާސީ ގޮތުން އެމެރިކާގެ މޫނުމަތި ބަދަލުކުރައްވައި، ރައްޔިތުންގެ ބާރު އަނބުރާ ރައްޔިތުންނަށް ދެއްވާނެ ކަމުގެ ވައުދާއެކުއެވެ. ރައީސް ޓްރަމްޕްގެ ވިސްނުންފުޅާ އެއްގޮތަށް, ވައުދު ފުއްދެވުމުގެ ގޮތުން ބައެއް ކަންކަން ވަނީ ތަންފީޒުކުރައްވާފައެވެ. އެންމެ ގިނަ ބައެއްގެ ނުރުހުމާއި ކުރިމަތިލަން ޖެހުނު އެއް ކަމަކީ މުސްލިމުން އެމެރިކާއަށް އެތެރެވުން މަނާކުރާ ގަރާރެވެ. ކޯޓުތަކާއި ރައްޔިތުންގެ ފަރާތުން ގޮންޖެހުންތަކެއް ކުރިމަތިވެ ވަޑައިގެންނެވި ނަމަވެސް ވެރިކަމުގެ ފުރަތަމަ 10 ދުވަހުގެ ތެރޭގައި އެކަން ވަނީ ކޮންމެވެސް ގޮތަކަށް ކުރައްވާފައެވެ. ވޭތުވެދިޔަ 30 އަހަރުގެ ތެރޭގައި އެމެރިކާގައި ޓެކްސްގެ ނިޒާމަށް ގެނެވުނު އެންމެ ބޮޑު ބަދަލު ގެންނެވީ ވެސް ޓްރަމްޕެވެ. އެއީ ވެސް ކެމްޕެއިންގައި ވަކާލާތުކުރެއްވި ކަމެކެވެ. ޑެމޮކްރެޓިކް ޕާޓީގެ އެއްމެ ވޯޓަކާ ވެސް ނުލައި ޓެކްސްގެ ގާނޫނު ފާސްވީ ޓްރަމްޕް ނިސްބަތްވެ ވަޑައިގަންނަވާ ރިޕަބްލިކަން އަށް ލިބިފައި އޮންނަ ހަނި އަޣްލަބިއްޔަތުންނެވެ. ޑެމޮކްރޭޓުންނާއި ގައުމުގެ އެތައް ބަޔަކު ޓެކްސްގެ ނިޒާމަށް ގެނައި ބަދަލާ ދެކޮޅެވެ. ރައީސް ޓްރަމްޕްގެ ފާހަގަކޮށްލެވޭ އެއް ވައުދަކީ މެކްސިކޯ އާއި އެމެރިކާއާ ދެމެދު ބިނާކުރާ ބޮޑުފާރެވެ. މި ވައުދު ފުއްދެވުމުގެ ކޮޅުމަތި ވެސް ނުފެންނައިރު ވާހަކަފުޅު ބަދަލުވެފައި ވަނީ ތަފާތު މިސްރާބަކަށެވެ. މިހާރު ދައްކަވަނީ މެކްސިކޯ މީހުންގެ ޚަރަދުގައި ފާރެއް ރާނާ ވާހަކައެވެ.

ޒަޔަނިސްޓު މަހުޖަނުންގެ އެހީތެރިކަމާ އެކު ވެރިކަމަށް ވަޑައިގެންވި ޓްރަމްޕް ވަނީ ނިކަން ކެރިވަޑައިގެން، ބައިނަލްއަގްވާމީ ގާނޫނުތަކާއި ގަރާރުތައް ވީދާލެއްވުމަށް ފަހު ޒަޔަނިސްޓުންނަށް ޚާއްސަކޮށް ވެވަޑައިގެންނެވި ވައުދުގެ ބޮޑު ބައެއް ވެސް ފުއްދަވާފައެވެ. އެމެރިކާގެ އެކުވެރި ބޮޑެތި ބާރުތައް ކަމަށްވާ އިނގިރޭސިވިލާތް ފަދަ ގައުމުތަކުގެ ވެސް ނުރުހުމަކަށް ބެއްލެވުމެއް ނެތި ގުދުސްއަކީ އިސްރާއީލުގެ ވެރިރަށް ކަމަށް ބަލައިގަނެ އެމެރިކާގެ އެމްބަސީ ގުދުސްއަށް ބަދަލުކުރުމަށް ވަނީ ނިންމަވާފައެވެ. އދ. ގެ ސަލާމަތީ މަޖިލީހުގެ 128 ގައުމު އެމެރިކާއާ ދެކޮޅަށް އެކަމުގައި ތެދުވެ، ވޯޓް ދީފައި ވަނީ ޑިޕްލޮމެޓިކް ހަމައިން އެމެރިކާ ނެއްޓި ހަޑިހުތުރުކޮށް ގައުމުތަކަށް ބިރުދައްކަމުން ދަނިކޮށް އެކަމަށް ބެލުމެއް ނެތިއެވެ.

މުސްލިމުން އެމެރިކާއަށް ވަނުމުގެ ވައުދު ފިޔަވައި ކުރިން ބުނެވިފައިވާ އެންމެހާ ވައުދުތަށް ރައީސް ޓްރަމްޕް ފުއްދަވާފައި ވަނީ ވެރިކަމުގެ ފުރަތަމަ ހަ މަސްދުވަހަށް ފަހުއެވެ.

މީހުންގެ ނުރުހުން އޮތް ގިނަ ކަންތައްތަކެއް ތަންފީޒު ކުރެއްވުމުގެ ކުރިން ފުރަތަމަ ހަ މަސްދުވަހަށް ބަލާއިރު ވެސް ރައީސް ޓްރަމްޕަކީ ވޭތުވެދިޔަ ފަހުގެ މާޒީއެއްގައި އެމެރިކާގައި އެންމެ މަގުބޫލު ނޫން ރައީސްއެވެ.

ގެލަޕްގެ ރެކޯޑް ތަކަށް ބަލާއިރު ފުރަތަ ހަމަސް ނިމުނުއިރު ރައީސް ޓްރަމްޕްގެ މަގްބޫލުކަން ހުރީ 39 ޕަސެންޓުގައެވެ. ރައީސް ޖޯޖް ޑަބްލިއު ބުޝް އާއި ރައީސް ބަރަކް އޮބާމާގެ ވެރިކަމުގައި އެބޭފުޅުންގެ މަގުބޫލުކަން އެ މުއްދަތުގައި ހުރީ 56 ޕަސެންޓްގައެވެ.

ފުރަތަމަ ހަ މަސްދުވަހަށް ބަލާއިރު ރައީސް ޓްރަމްޕް ފަދަ މަގުބޫލު ނޫން ބޭފުޅަކަށް އެންމެ ކައިރި މާޒީއަކުން ވެސް ފެންނަން އޮތީ 1975 ވަނަ އަހަރު ވެރިކަމުގައި ހުންނެވި ޖެރަލްޑް ފޯޑެވެ. އެ މަނިކުފާނުގެ މަގުބޫލުކަން ވެސް ހުރީ 39 ޕަސެންޓްގައި ކަމަށްވާއިރު ރައީސް ޓްރަމްޕާ ސީދާ ދެކޮޅު ފަރާތްތައް ފޯޑްއަށް ވުރެ ވެސް އިތުރެވެ. ފޯޑްއާ ދެކޮޅު ފަރާތްތައް 45 ޕަސެންޓްގައި އުޅޭއިރު 56 ޕަސެންޓް މީހުން ރައީސް ޓްރަމްޕާ ދެކޮޅެވެ.