މީހުން "ސްޓޯކް" ކުރާތީ އުނދަގޫ ނުވާ ކަމަށާއި ގިނަ މީހުން އޭނާ ފޮލޯ ކުރާތީ ގަޔާވާ ކަމަށް ޕްރިޔަންކާ ޗޮޕްރާ ބުނެފިއެވެ.
ޕަރިޔަންކާ ބުނީ އޭނާ އަމިއްލައަށް ފޮޓޯ ލުމަށް ފަހު މީހުން ލައިކް ދެނީ ކިހާވަރަކަށްތޯ ބަލާކަމަށެވެ. އޭނާއާއި ބެހޭގޮތުން މީހުންނަށް ގިނަ އެއްޗެހިތަކެއް އެނގުން އެއީ އެންމެ ބޭނުންވާ ކަންތައްތައް ކަމަށް ޕްރިޔަންކާ ބުންޏެވެ.
ޕްރިޔަންކާ ދެން އެންމެ އަވަހަށް ފެންނާނީ "އިންޑިއާސް ނެކްސްޓް ސުޕަސްޓާ" ގެ ޖަޖެއްގެ ގޮތުގައެވެ. އޭނާއާ އެކީ އެ ޝޯގައި ޖަޖް ކުރުމުގައި ބައިވެރިވާނީ ރޯހިތު ޝެޓީއާއި ކަރަން ޖޯހަރެވެ.
މި ޝޯ ދައްކާނީ ސްޓާ ޕްލަސް އިންނެވެ.
މީގެ އިތުރުން އޭނާ ވަނީ މިހާތަނަށް އޭނާއަށް އެންމެ ކަމުދާ ބޮލީވުޑްގެ ފިލްމާއި ބެހޭގޮތުން ވެސް ވާހަކަ ދައްކާފައެވެ. ޕްރިޔަންކާ ބުނީ އޭނާއަށް އެންމެ ކަމުދަނީ ބޮލީވުޑްގެ ފިލްމުތަކުގެ ތެރެއިން ޝާހުރުކް ކާން އާއި ކާޖޮލް އާއި އެކީ ކުޅެފައިވާ ފިލްމު"ދިލްވާލޭ ދުލްހަނިޔާ ލޭ ޖާއިނގޭ"ކަމަށެވެ.
ކުރީގެ މިސްވޯލްޑް އަދި މޮޑެލް އެއްގެ އިތުރުން ޕްރިޔަންކާއަކީ ކުޅަދާނަ ލަވަކިޔުންތެރިއެކެވެ. ޕްރިޔަންކާގެ އެންމެ ފުރަތަމަ ފިލްމަކީ ތަމަޅަ ފިލްމެއް ކަމަށްވާ "ތައިޒާން" އެވެ. އެއީ 2002 ވަނަ އަހަރު ރިލީޒްކުރި ފިލްމެކެވެ.
