ސަރުކާރާ ދެކޮޅަށް އީރާނުގައި ކުރިއަށް ދާ މުޒާހަރާގައި ބައިވެރިވާ ފަރާތްތަކަށް ތައުރީފް ކުރައްވާ އަދި ހިތްވަރު ދެއްވާ އެމެރިކާގެ ރައީސް ޑޮނަލްޑް ޓްރަމްޕް ކުރެއްވި ޓްވީޓް ތަކަކަށް އީރާނުން ވަރުގަދަ ރައްދެއް ދީފިއެވެ.
ރައީސް ޓްރަމްޕްގެ އަންގާރަ ދުވަހު ކުރެއްވި ޓްވީޓް ގައި ވިދާޅުވެފައި ވަނީ، އީރާނުގެ ރައްޔިތުން އެންމެ ފަހުން އަނިޔާވެރި އަދި ކަރަޕްޓް ވެރިކަމާ ދެކޮޅަށް ހަރަކާތްތެރި ވާން ފަށައިފި ކަމަށެވެ.
ރައީސް ޓްރަމްޕްގެ މި ޓްވީޓްގައި އެމެރިކާގެ ކުރީގެ ރައީސް ބަރަކް އޮބާމާ އަށް ވެސް ވަނީ ބަހުގެ ހަމަލާއެއް ފޮނުއްވާފައެވެ. ޓްރަމްޕް ވިދާޅުވީ، ރައީސް އޮބާމާ މޮޔަފުޅު ކަމުން އީރާނަށް ދެއްވި ހުރިހާ ފައިސާ އެއް ދިޔައީ ޓެރަރިޒަމަށާއި، ބައެއްގެ ޖީބަށް ކަމަށެވެ. ރައްޔިތުންނަށް ލިބިފައިވާ ކާ އެތިކޮޅު މަދު ކަމަށާއި، އިންފްލޭޝަން ދަނީ މައްޗަށް ކަމަށާއި، އިންސާނީ ހައްގު ތަކެއް ނެތް ކަމަށް ވެސް އީރާނުގެ ސަރުކާރަށް އަމާޒު ކުރައްވާ ޓްރަމްޕްގެ ޓްވީޓްގައި ވިދާޅުވެފައި ވެއެވެ. އަދި އެމެރިކާ އޮތީ ބަލަން ކަމަށް ވެސް ޓްރަމްޕް ވިދާޅުވެފައި ވެއެވެ.
The people of Iran are finally acting against the brutal and corrupt Iranian regime. All of the money that President Obama so foolishly gave them went into terrorism and into their “pockets.” The people have little food, big inflation and no human rights. The U.S. is watching!
— Donald J. Trump (@realDonaldTrump) January 2, 2018
ރައީސް ޓްރަމްޕްގެ ޓްވީޓްގެ ރައްދުގައި އީރާނުގެ ޚާރިޖިއްޔާގެ ތަރުޖަމާނަކު ވިދާޅުވީ، އީރާނުގެ ކަންކަމާ ބެހި ވަޑައިގަތުމަށް ވުރެ، އަމިއްލަފުޅު ގައުމަށް ފޯކަސް ކުރެއްވުން މާ ރަނގަޅު ވާނެ ކަމަށެވެ.
"އެހެން ގައުމަކާ ބެހޭ ގޮތުން ބޭނުމެއް ނެތް ޓްވީޓް ކުރެއްވުމަށް ވަގުތު ބޭކާރު ކުރެއްވުމުގެ ބަދަލުގައި އަމިއްލަފުޅު ގައުމުގެ އެތެރޭގެ މައްސަލަތަކުގެ ތެރޭގައި ހިމެނޭ ކޮންމެ ދުވަހަކު އެތައް ބަޔަކު މެރުމާއި، ގެދޮރު ނެތް މީހުންނާއި، ބަނޑުހައި ހޫނު ކަމުގައި ތިބި މީހުންނަށް ސަމާލު ކަން ދެއްވުން މާ ރަނގަޅު ވާނެ" އީރާނުގެ ޚާރިޖިއްޔާގެ ތަރުޖަމާނަކު ކަމުގައިވާ ބަހްރަމް ޣާސިމީ އޭ.އެފް.ޕީ އަށް ދެއްވި އިންޓަވިއު އެއްގައި ވިދާޅުވިއެވެ.
އީރާނުގެ ދާޚިލީ މައްސަލައިގެ ތެރެއަށް ޓްރަޕްމް ވަދެ ވަޑައިގަންނަވާތީ އީރާނުގެ ބައެއް އާއްމުންވެސް އެކަމާ ހިތްހަމަ ނުޖެހޭކަން މީޑިއާ މެދުވެރިކޮށް ހާމަ ކޮށްފައިވެއެވެ.
އީރާނުގައި ހިނގަމުންދާ ހަމަނުޖެހުން ތަކުގައި މިހާތަނަށް މަދުވެގެން 20 މީހުން މަރުވެއްޖެ ކަމަށް މީޑިއާ ރިޕޯޓުތައް ބުނެއެވެ. އަދި މުޒާހަރައިގެ ބައިވެރިންގެ ތެރެއިން 450 ށް ވުރެ ގިނަ މީހުން ވަނީ ހައްޔަރު ކޮށްފައެވެ.
އީރާނުގެ މުޒާހަރާ އާ ގުޅިގެން ރައީސް ޓްރަމްޕް މީގެ ކުރިން ކުރެއްވި ޓްވީޓެއްގައި ރައްޔިތުންގެ ތަނަވަސްކަން ވަގަށް ނަގާ ޓެރަރިޒަމަށް ބޭނުން ކުރާ ކަން އީރާނުގެ ރައްޔިތުންނަށް ވިސްނިއްޖެ ކަމަށާއި، އަދި އިތުރަށް އެކަން ބަލަން ރައްޔިތުން ނުތިބޭނެ ކަމަށް ވިދާޅުވެފައި ވެއެވެ. އަދި އިންސާނީ ހައްގުތަކާ ޚިލާފް އަމަލުތައް އެމެރިކާ އިން ވަރަށް ގާތުން ބަލަމުން ގެންދާނެ ކަމަށް ވެސް ޓްރަމްޕް ވިދާޅުވެފައި ވެއެވެ.
Big protests in Iran. The people are finally getting wise as to how their money and wealth is being stolen and squandered on terrorism. Looks like they will not take it any longer. The USA is watching very closely for human rights violations!
— Donald J. Trump (@realDonaldTrump) December 31, 2017
އައު އަހަރު ފެށުނު ދުވަހު ވެސް ޓްރަމްޕް ވަނީ މުޒާހަރާގެ ބައިވެރިންނަށް ހިތްވަރު ލިބޭ ގޮތައް ޓްވީޓެއް ކުރައްވާފައެވެ. އެ ދުވަހުގެ ޓްވީޓްގައި ޓްރަމްޕް ވިދާޅުވީ، އީރާނަކީ ޓެރަރިޒަމް ސްޕޮންސަރ ކުރުމުގައި ދުނިޔޭގެ އެއްވަނަ ގައުމު ކަމަށާއި ކޮންމެ ގަޑީ އިރަކު ކަހަލަ ގޮތަކަށް އިންސާނީ ހައްގުތަކާ ޚިލާފު އަމަލުތައް އީރާނުން ހިންގަމުން ގެންދާ ކަމަށެވެ. އަދި ސުލްހަވެރި މުޒާހަރާގެ ބައިވެރިން މުއާމަލާތް ކުރުމަށް ހުރަސް އެޅުމަށް އިންޓަނެޓް ކަނޑާލާފައިވާ ކަމަށާއި އެއީ ރަނގަޅު ކަމެއް ނޫން ކަމަށްވެސް ޓްރަމްޕް ވިދާޅުވެފައި ވެއެވެ.
Iran, the Number One State of Sponsored Terror with numerous violations of Human Rights occurring on an hourly basis, has now closed down the Internet so that peaceful demonstrators cannot communicate. Not good!
— Donald J. Trump (@realDonaldTrump) December 31, 2017
އީރާނުގައި ކުރިއަށްދާ މުޒާހަރާ އާ ގުޅިގެން އިޒްރޭލުގެ ބޮޑު ވަޒީރު ބެންޔަމިން ނަތަންޔާހޫ ވެސް ވަނީ މުޒާހަރާގެ ބައިވެރިންނަށް ހިތްވަރު ދެއްވާ ބަޔާނެއް ދެއްވާފައެވެ. މި ބަޔާނުގައި އީރާނުގެ ސަރުކާރު ކޮންމެވެސް އިރަކުން ވެއްޓޭނެ ކަމަށާއި، ސަރުކާރު ވެއްޓުމުން އިޒްރޭލާ އީރާނަކީ ދެ ރަހްމަތްތެރިންނަށް ވާނެ ކަމަށް އޭނާ ވިދާޅުވިއެވެ.
އީރާނުގައި ސަރުކާރާ ދެކޮޅަށް މުޒާހަރާތައް ފެށުނީ ޑިސެމްބަރު މަހުގެ 28 ވީ ބުރާސްފަތި ދުވަހު މަޝްހަދު ގައެވެ. އެއީ އީރާނުގެ ދެވަނަ އަށް އެންމެ ބޮޑު ސިޓީ އެވެ.
މުޒާހަރާ މިހާރު ވަނީ އީރާނުގެ އެތައް ސިޓީ އަކަށް ފެތުރިފައެވެ. ބުނެވޭ ގޮތުގައި މިއީ ފާއިތުވި 10 ވަރަކަށް އަހަރުގެ ތެރޭގައި އީރާނުގައި ހިނގާ ސަރުކާރާ ދެކޮޅު އެންމެ ބޮޑު މުޒާހަރާ އެވެ.
ސަރުކާރާ ދެކޮޅަށް ރައްޔިތުންގެ ބަޔަކު ނުކުތީ ކާބޯތަކެތީގެ އަގު އުފުލުމާއި، ދިރިއުޅުމުގެ އަގު މައްޗަށް ދިއުމާއި، ކަރަޕްޝަން އިތުރުވާއި ގުޅިގެން އެކަމުގެ ރުޅިވެރި ކަމުގައި ކަމަށް މީޑިއާ ރިޕޯޓުތައް ބުނެއެވެ.
